மதுரை திருப்பரங்குன்றம் முருகன் கோயில் முன்பு போராட்டத்தைத் தொடர்ந்த பாஜக மாநிலத் தலைவர் நயினார் நாகேந்திரன் உள்ளிட்டோர் காவல்துறையினரால் இன்று கைது செய்யப்பட்டனர். இந்தக் கைது நடவடிக்கையானது சென்னை உயர்நீதிமன்ற மதுரை கிளையின் உத்தரவை நிறைவேற்ற மறுக்கும் செயல் என்று அதிமுக பொதுச்செயலாளர் எடப்பாடி பழனிசாமி கடும் கண்டனம் தெரிவித்துள்ளார்.

திருப்பரங்குன்றம் கோயில் முன்பு திரண்டிருந்த பாஜகவினர், ஒரு குறிப்பிட்ட கோரிக்கையை வலியுறுத்திப் போராட்டத்தில் ஈடுபட்டிருந்தனர். காவல்துறையினர் கலைந்து செல்லுமாறு விடுத்த கோரிக்கையை ஏற்காமல் அவர்கள் போராட்டத்தைத் தொடர்ந்த நிலையில், பாஜக மாநிலத் தலைவர் நயினார் நாகேந்திரன் உட்படப் பலர் கைது செய்யப்பட்டனர்.

இந்தக் கைது நடவடிக்கைக்கு அதிமுக பொதுச்செயலாளர் எடப்பாடி பழனிசாமி தனது சமூக வலைதளப் பக்கத்தில் உடனடியாகக் கடும் கண்டனம் தெரிவித்துள்ளார். அவர் தனது அறிக்கையில் குறிப்பிட்ட முக்கிய அம்சங்கள்:

இதையும் படிங்க: "படிப்பது ராமாயணம், இடிப்பது பெருமாள் கோயில்!" திமுகவை வறுத்தெடுத்த நயினார் நாகேந்திரன்!

சென்னை உயர்நீதிமன்ற மதுரை கிளை உத்தரவிட்டும், நீதிமன்ற உத்தரவை நிறைவேற்ற முடியாது என கங்கணம் கட்டிக்கொண்டு, சட்ட நெறிமுறைகளுக்கு முற்றிலும் விரோதமான அரசாகத் தன்னை நிரூபித்துள்ள ஸ்டாலின் மாடல் திமுக அரசின் ஏவல்துறை, பாஜக மாநிலத் தலைவர் திரு. நயினார் நாகேந்திரன் அவர்கள் உள்ளிட்ட பக்தர்கள் அனைவரையும் அராஜகப் போக்குடன் கைது செய்திருப்பது கடும் கண்டனத்திற்குரியது.

உயர் நீதிமன்றத்தின் தெளிவான உத்தரவுக்குப் பிறகும், திமுக அரசு இயந்திரத்தைப் பயன்படுத்தி இப்படி அடாவடித்தனத்தைக் கையாள்வதன் மூலம், இதை வேண்டுமென்றே பெரிய பிரச்சனையாக்கி, தமிழ்நாட்டின் மத நல்லிணக்கத்தைச் சிதைக்கும் நோக்கில், தேர்தல் அரசியல் ஆதாயத்திற்காகக் குளிர்காயத் துடிப்பது தெள்ளத்தெளிவாகிறது.

ஆட்சியில் இருக்கும் திமுக-வை மகிழ்விக்கவோ என்னவோ, சில அதிகாரிகளும் இத்தகைய நீதிமன்ற அவமதிப்புச் செயல்களுக்குத் துணைபோவது வருத்தமளிக்கிறது.

மக்களாட்சி விழுமியங்களை நசுக்கும் அராஜகப் போக்கை உடனடியாகக் கைவிட்டு, கைது செய்யப்பட்டுள்ள நயினார் நாகேந்திரன் உள்ளிட்ட அனைவரையும் உடனடியாக விடுவித்து, உயர் நீதிமன்றத் தீர்ப்பை நிறைவேற்றுமாறு ஸ்டாலின் மாடல் திமுக அரசை வலியுறுத்துவதாக இ.பி.எஸ். தெரிவித்துள்ளார்.

உயர் நீதிமன்றத்தின் உத்தரவு மற்றும் கைதுக்கான காரணம் குறித்து அரசியல் கட்சிகள் மத்தியில் தொடர்ந்து விவாதம் நடைபெற்று வருகிறது.

இதையும் படிங்க: வெறுப்பு அரசியலை வைத்து ஓட்டுப் பெறுவதே நோக்கம் - பாஜகவை விமர்சித்த சசிகாந்த் செந்தில்!