சென்னை: 2026 சட்டசபைத் தேர்தலில் படுதோல்வியை சந்தித்த தி.மு.க., கட்சியை மறுசீரமைக்கும் பணிகளை தீவிரப்படுத்தியுள்ளது. மாவட்ட செயலாளர்களின் அதிகாரத்தை கட்டுப்படுத்தும் வகையில் ஒவ்வொரு சட்டசபைத் தொகுதிக்கும் தொகுதி செயலாளர் என்ற புதிய பொறுப்பை உருவாக்க தி.மு.க., திட்டமிட்டுள்ளது. இந்த பதவிகளுக்கு இளைஞரணிக்கு முன்னுரிமை அளிக்கப்படும் என தகவல்கள் வெளியாகியுள்ளன.

தேர்தல் தோல்விக்கான காரணங்களை ஆராய கள ஆய்வுக் குழு அமைக்கப்பட்டது. அந்த அறிக்கையில் மாவட்ட செயலாளர்கள் உள்ளிட்டோர் மீது பல குற்றச்சாட்டுகள் எழுந்தன. பல மாவட்டங்களில் ஒரு தொகுதியில் கூட தி.மு.க., வெல்லாத நிலை ஏற்பட்டது. மு.க.ஸ்டாலின் தொகுதியிலேயே தோல்வி, பல அமைச்சர்களின் தோல்வி உள்ளிட்டவை பெரும் அதிர்ச்சியை ஏற்படுத்தின. இதனால் மாவட்ட செயலாளர்களின் அதிகாரம் அதிகமாக இருப்பதே தோல்விக்கு ஒரு முக்கிய காரணம் என கருதப்படுகிறது.

இந்நிலையில் தொகுதி செயலாளர் பதவியை உருவாக்கி அதிகாரத்தை பகிர்ந்தளிக்க தி.மு.க., தலைமை முடிவு செய்துள்ளது. இதன் மூலம் ஒவ்வொரு தொகுதியிலும் தனிப்பட்ட நிர்வாகக் கட்டமைப்பு உருவாகும். உறுப்பினர் சேர்க்கை, கட்சி நிகழ்ச்சிகள், தேர்தல் பணிகள் ஆகியவற்றில் இளைஞர்களை அதிக அளவில் ஈடுபடுத்த முடியும். உதயநிதி ஸ்டாலின் ஆதரவாளர்கள் இந்த முடிவால் உற்சாகம் அடைந்துள்ளனர்.

இதையும் படிங்க: Gen Z வாக்காளர்களை கவர திமுகவில் புது திட்டம்! புதிய அணிகளை உருவாக்கும் உதயநிதி ஸ்டாலின்!

மாவட்ட செயலாளர்களின் அதிகாரத்தை குறைப்பதன் மூலம் கட்சிக்குள் அதிருப்தியில் உள்ளவர்களுக்கு புதிய பதவிகள் வழங்கி திருப்திப்படுத்தவும் திட்டமிடப்பட்டுள்ளது. லண்டன் பயணத்துக்குப் பிறகு மு.க.ஸ்டாலின் இது குறித்த இறுதி முடிவு எடுக்க உள்ளார். தவெகவின் எழுச்சியை எதிர்கொள்ள தி.மு.க., தன்னை வலுப்படுத்தும் முயற்சியாக இந்த மாற்றங்கள் பார்க்கப்படுகின்றன.

தி.மு.க.,வில் இந்த மறுசீரமைப்பு இளம் தலைமுறைக்கு புதிய வாய்ப்புகளை உருவாக்கும் என எதிர்பார்க்கப்படுகிறது. மாவட்ட செயலாளர்களின் ஒரே அதிகாரத்தை முடிவுக்கு கொண்டு வரும் இந்த நடவடிக்கை கட்சியின் அடிமட்டத்தில் புதிய உற்சாகத்தை ஏற்படுத்தும் என கட்சி வட்டாரங்கள் தெரிவிக்கின்றன. 

இதையும் படிங்க: திமுகவை பலப்படுத்த போராடும் உதயநிதி ஸ்டாலின்! முட்டுக்கட்டை போட்டு குடைச்சல் கொடுக்கும் சீனியர்கள்!