சென்னையின் பிரபலமான பறக்கும் ரயில் (மாஸ் ரேபிட் டிரான்சிட் சிஸ்டம் - MRTS) நிர்வாகத்தை இந்திய ரயில்வேயிடமிருந்து சென்னை மெட்ரோ ரயில் லிமிடெட் (CMRL) இடம் ஒப்படைக்கும் முக்கியமான புரிந்துணர்வு ஒப்பந்தம் (MoU), டிசம்பர் மாதம் கையெழுத்தாகும் என தகவல் வெளியாகியுள்ளது. இந்த ஒப்பந்தம், சென்னை போக்குவரத்து அமைப்பை இணைந்து செயல்படச் செய்யும் புதிய அத்தியாயத்தைத் தொடங்கும் என எதிர்பார்க்கப்படுகிறது.
தற்போது ரயில்வே துறையின் கீழ் இயங்கும் MRTS, 1997-ஆம் ஆண்டு தொடங்கப்பட்டது. சென்னையில் பூங்கா ரயில் நிலையத்திலிருந்து வேளச்சேரி வரை மொத்தம் 19.34 கி.மீ. தூரம் கொண்ட பறக்கும் ரயில் சேவை இயக்கப்படுகிறது. இந்த திட்டம் தெற்கு சென்னையை இணைக்கும் வகையில் நகரின் மையத்தில் அமைந்துள்ளது.
இதையும் படிங்க: சோலி முடிஞ்சுது...திமுக கூடாரம் காலி... ரவுண்டு கட்டிய இபிஎஸ்...!
தினசரி 6.5 லட்சம் பயணிகளைத் தாங்க வடிவமைக்கப்பட்டாலும், தற்போது வெறும் 80,000 பயணிகளே பயன்படுத்துகின்றனர். பராமரிப்புக்காக ஆண்டுதோறும் ரூ.100 கோடிக்கு மேல் தேவைப்படுவதாக கூறப்படுகிறது. குறிப்பாக கடந்த சில ஆண்டுகளாக, எம்ஆர்டிஎஸ் ரயில் சேவையின் பராமரிப்பு பணிகள் மேற்கொள்ளப்படவில்லை என்று பொதுமக்கள் குற்றம்சாட்டி வருகின்றனர். மேலும் பராமரிப்பு குறைபாடுகள், குறைந்த அளவிலான சேவைகள் ஆகியவற்றால் இது நீண்ட காலமாக சர்ச்சைக்குரியதாக இருந்து வந்தது.
இந்நிலையில், கடந்த ஜூலை மாதம் ரயில்வே வாரியம் இந்தத் திட்டத்தின் கொள்கை ரீதியான ஒப்புதலை வழங்கியது. சென்னை ஒருங்கிணைந்த நகர்புற போக்குவரத்து ஆணையம் (CUMTA) தலைமையில், தமிழ்நாடு அரசு, CMRL, ரயில்வே ஆகியவை இணைந்து MoU-ஐ தயார் செய்து வருகின்றன. இந்த ஒப்பந்தம் கையெழுத்துக்குப் பின், MRTS-ன் நிர்வாகம், பராமரிப்பு, விரிவாக்கம் ஆகியவற்றை CMRL ஏற்கும். இதன் மூலம், MRTS-ஐ மெட்ரோவின் ஊதா, நீலம் பாதைகளுடன் இணைக்க முடியும். அடுத்த 3 மாதங்களுக்குள் அனைத்து நடைமுறைப் பணிகளும் நிறைவடையும் என தமிழக போக்குவரத்துத் துறை வட்டாரங்கள் தெரிவிக்கின்றன.
இந்த ஒருங்கிணைப்பு, சென்னை மக்களின் பயண நேரத்தைக் குறைக்கும். உதாரணமாக, கடற்கரை-வேளச்சேரி இடையேயான பயணம் தற்போது 45 நிமிடங்கள் ஆகும்; இது மெட்ரோ அளவிலான சேவையுடன் 20-25 நிமிடங்களாகக் குறையலாம். மேலும், டிக்கெட் ஒருங்கிணைப்பு, ஒற்றை அட்டை முறை, பொதுமக்கள் போக்குவரத்து மேம்பாடு போன்றவை அமல்படுத்தப்படும்.
தமிழக அரசின் 2025 நிதிநிலை அறிக்கையிலும், RRTS (ரீஜியனல் ரேபிட் டிரான்சிட் சிஸ்டம்) போன்ற அரை வேக ரயில் திட்டங்களுக்கு CMRL-ஐ ஈடுபடுத்துவதாக அறிவிக்கப்பட்டது. இந்த முடிவுக்கு திமுக துணைப் பொதுச் செயலாளர் கனிமொழி காங்கிரஸ் எம்.பி., நாடாளுமன்றத்தில் கேள்வி எழுப்பியது முக்கிய காரணம். "MRTS-ஐ CMRL-இடம் ஒப்படைப்பதன் மூலம், சென்னை போக்குவரத்து துறை உலகத் தரத்தை அடையும்," என அவர் தெரிவித்தார்.
நிர்வாகத்தை முழுவதுமாக கைமாற்றும் பணி 2027ஆம் ஆண்டு டிசம்பரில் நிறைவு பெறும் என கூறப்படுகிறது. இந்த முயற்சி, சென்னையின் நகர்ப்புற போக்குவரத்தைப் புரட்சிகரமாக்கும். மக்கள் நீண்ட காலமாக வலியுறுத்தி வந்த இந்த ஒருங்கிணைப்பு, போக்குவரத்து நெரிசலைத் தீர்க்கும் பெரிய படியாக அமையும்.
இதையும் படிங்க: கோல்கட்டாவை புரட்டிப்போட்ட கனமழை! ரயில், விமான சேவைகள் பாதிப்பு.. 5 பேர் பலி!