ஈரோடு மாவட்டம் அந்தியூரில் இன்று நடைபெற்ற அதிமுக எழுச்சிப் பயணப் பொதுக்கூட்டத்தில் பங்கேற்ற அக்கட்சியின் பொதுச்செயலாளர் எடப்பாடி கே. பழனிசாமி (EPS), வரவிருக்கும் 2026 சட்டமன்றத் தேர்தலுக்கான இரண்டாம் கட்ட அதிரடித் தேர்தல் வாக்குறுதிகளை வெளியிட்டார். தனது தாயார் பிறந்த மண்ணான அந்தியூரில் திரண்டிருந்த ஆயிரக்கணக்கான மக்களிடையே உரையாற்றிய அவர், திமுக அரசின் விளம்பர அரசியலைக் கடுமையாகச் சாடினார்.
திமுக ஆட்சியில் பெண்களுக்கு மட்டுமே நகரப் பேருந்துகளில் கட்டணமில்லாப் பயணம் வழங்கப்படுகிறது. ஆனால், அதிமுக ஆட்சிக்கு வந்தவுடன் நகரப் பேருந்துகளில் பெண்கள் மட்டுமல்ல, ஆண்களும் கட்டணமின்றிப் பயணிக்கலாம் எனப் புதிய அதிரடி வாக்குறுதியை அளித்தார்.
தமிழகத்தில் சொந்த வீடு இல்லாத ஏழை மக்களுக்கு அரசாங்கமே நிலம் வாங்கி, அதில் கான்கிரீட் வீடுகளைக் கட்டிக் கொடுக்கும். மேலும், முடக்கப்பட்ட தாலிக்குத் தங்கம் திட்டம் மீண்டும் செயல்படுத்தப்படும்; திருமணத்தின் போது மணமகன் மற்றும் மணமகளுக்குப் பட்டு வேட்டி, சேலை வழங்கப்படும்.
இதையும் படிங்க: ஈரோட்டில் இ.பி.எஸ் சூறாவளி பிரச்சாரம்! மார்ச் 7-ல் அந்தியூர், மார்ச் 8-ல் பெருந்துறை, பவானியில் பரப்புரை!
அதிமுக ஆட்சியில் பயிர்க்கடன் தள்ளுபடி செய்யப்பட்டதையும், விவசாயிகளுக்கு மும்முனை மின்சாரம் தடையின்றி வழங்கப்பட்டதையும் நினைவுகூர்ந்த அவர், விவசாயிகளின் நலனே அதிமுகவின் சுவாசக் காற்று என்றார். செய்தவை அரைகுறை திட்டங்கள். அதிமுக திட்டங்கள் மீது ஸ்டிக்கர் ஒட்டுவதுதான் ஸ்டாலின் மாடல். அரசின் வேலையை மறந்து, வெறும் PR Machinery-யாக மட்டுமே திமுக இயங்கி வருகிறது எனச் சாடினார்.
ஏற்கனவே அறிவித்தபடி, அதிமுக ஆட்சி அமைந்ததும் குடும்பத் தலைவிகளுக்கு மாதந்தோறும் ₹2,000 'குலவிளக்குத் திட்டத்தின்' கீழ் வழங்கப்படும் என மீண்டும் உறுதி அளித்தார்.
"குடிக்கக் கூட நீர் இல்லாத வறட்சி காலத்திலும், கொரோனா போன்ற பெருந்தொற்று காலத்திலும் சிறப்பான ஆட்சியைத் தந்தது அதிமுகதான். மக்களின் துயர் துடைக்கும் அந்த பொற்கால ஆட்சி மீண்டும் மலரப் போகும் தேர்தலே இந்த 2026 சட்டமன்றத் தேர்தல்" என எடப்பாடி பழனிசாமி உணர்ச்சிப்பூர்வமாகப் பேசி தனது உரையை நிறைவு செய்தார்.
இதையும் படிங்க: அதிமுக மாவட்ட செயலாளர்கள் கூட்டம்! தம்பிதுரைக்கு மீண்டும் ராஜ்யசபா சீட்? இபிஎஸ் தலைமையில் ஆலோசனை!