கோவை நகரின் மையப் பகுதியில் அமைந்துள்ள வ.உ.சி. பூங்கா தற்போது ஒரு முக்கியமான வரலாற்று மற்றும் அறிவியல் நினைவுச் சின்னத்தைப் பெற்றுள்ளது. இங்கு இந்தியாவின் எடிசன் என்று போற்றப்படும் அறிவியல் மேதை ஜி.டி. நாயுடு திருவுருவச் சிலை நிறுவப்பட்டுள்ளது. ஜி.டி. நாயுடு 1893ஆம் ஆண்டு கோவை மாவட்டத்தில் பிறந்தவர்.

விவசாயக் குடும்பத்தில் பிறந்த இவர், பள்ளிப்படிப்பை முழுமையாக முடிக்காவிட்டாலும், தனது தன்னார்வ ஆர்வத்தால் அறிவியல், பொறியியல், விவசாயம் ஆகிய துறைகளில் பல்வேறு கண்டுபிடிப்புகளைச் செய்தவர். மோட்டார் வாகனங்கள், எலக்ட்ரிக் ரயில், விவசாய இயந்திரங்கள், கேமரா உள்ளிட்ட பல புதுமைகளை உருவாக்கிய இவர், கோவையின் தொழில்துறை வளர்ச்சிக்கு அடித்தளமிட்டவர் என்ற பெருமையைப் பெற்றவர்.

கோவை நகரின் பல முக்கிய இடங்கள், நிலங்கள் உள்ளிட்டவற்றை அரசுக்கு இலவசமாக வழங்கியும், தொழில்மயமாக்கலுக்கு வழிவகுத்தவராகவும் திகழ்ந்தார். தமிழக அரசு, இவரது பங்களிப்புகளை கௌரவிக்கும் வகையில், கோவையில் அவருக்கு ஒரு சிலை நிறுவ முடிவு செய்தது. இதற்கான அறிவிப்பை முதலமைச்சர் மு.க. ஸ்டாலின் சட்டசபையில் வெளியிட்டிருந்தார். அதன்படி, வ.உ.சி. பூங்காவில் உள்ள வ.உ.சி. சிலைக்கு அருகிலேயே, சுமார் 50 அடி அகலமும் 45 அடி நீளமும் கொண்ட இடத்தில் இச்சிலை அமைக்கப்பட்டது.

இதையும் படிங்க: கட்சி தாவியதும் மாறிய ஓபிஎஸ்.. சட்டை பாக்கெட், காரில் நடந்த மாற்றம்..!! ஒரே நாளில் இப்படி ஒரு சேன்ஜ்-ஆ..!!

பொதுப்பணித்துறை மூலம் 7 அடி உயரத்தில் சிலை தயாரிக்கப்பட்டு, கட்டுமானப் பணிகள் கடந்த பிப்ரவரி மாதம் தொடங்கின. இறுதிக்கட்டப் பணிகள் மார்ச் தொடக்கத்தில் முடிவடைந்தன. இன்று இச்சிலை திறப்பு விழா நடைபெற்றது. தமிழக முதலமைச்சர் மு.க. ஸ்டாலின் காணொலி வாயிலாக இச்சிலையைத் திறந்து வைத்தார். இச்சிலை நிறுவப்பட்டதன் மூலம், கோவை மக்களின் அறிவியல் மற்றும் தொழில்முனைப்பு வரலாற்றில் ஜி.டி. நாயுடு அவர்களின் பங்களிப்பு என்றும் நிலைத்து நிற்கும் வகையில் ஒரு அழியா நினைவுச் சின்னம் உருவாகியுள்ளது.

இதையும் படிங்க: நாளை மாலை திமுக மாவட்ட செயலாளர்கள் கூட்டம்.... முதல்வர் ஸ்டாலின் அவசர ஆலோசனை!