தமிழகச் சட்டமன்றத் தேர்தலின் வாக்கு எண்ணிக்கை விறுவிறுப்பாக நடைபெற்று வரும் நிலையில், தேசிய ஜனநாயகக் கூட்டணியில் (NDA) இடம்பெற்றுள்ள பாரதிய ஜனதா கட்சி (பாஜக) போட்டியிட்ட அனைத்துத் தொகுதிகளிலும் கடுமையான பின்னடைவைச் சந்தித்து வருகிறது. தமிழகத்தில் நிலவும் நான்கு முனைப் போட்டியில், பாஜக-வின் தேர்தல் வியூகங்கள் எடுபடவில்லை என்பதை இந்தத் தற்காலிக முடிவுகள் உணர்த்துகின்றன.

அதிமுகவுடன் கூட்டணி அமைத்துத் தேர்தலைச் சந்தித்த பாஜக-வின் தற்போதைய நிலை 27 தொகுதிகளில் தோல்வி முகம்: தமிழகத்தில் பாஜக போட்டியிட்ட 27 தொகுதிகளிலும் அக்கட்சி வேட்பாளர்கள் பின்னடைவிலேயே உள்ளனர்.  தமிழக வெற்றிக் கழகம் (தவெக) பல தொகுதிகளில் முன்னிலை பெற்று வருவதும், திமுக-அதிமுக இடையிலான வாக்குகள் சிதறியதும் பாஜக-வின் பின்னடைவுக்கு முக்கியக் காரணமாகப் பார்க்கப்படுகிறது. மதுரையில் தமிழகத்தில் என்டிஏ ஆட்சிதான் என்று நம்பிக்கையுடன் பேசிய பியூஷ் கோயலின் கணிப்புகளுக்கு மாறாக, கள நிலவரம் தற்போதைக்கு அக்கட்சிக்குச் சாதகமாக இல்லை.

தமிழகத்தில் தவெக 109 தொகுதிகளிலும், அதிமுக 73 தொகுதிகளிலும், திமுக 52 தொகுதிகளிலும் முன்னிலை பெற்றுள்ள சூழலில், பாஜக ஒரு இடத்தில் கூட முன்னிலை பெறாதது அரசியல் வட்டாரத்தில் பெரும் விவாதத்தை ஏற்படுத்தியுள்ளது. குறிப்பாக, கொளத்தூர் போன்ற முக்கியத் தொகுதிகளில் முதலமைச்சரே பின்னடைவைச் சந்திக்கும் அளவிற்குத் தவெக-வின் எழுச்சி அமைந்துள்ள நிலையில், பாஜக-வின் வாக்கு வங்கி பெருமளவில் பாதிக்கப்பட்டுள்ளதாகக் கருதப்படுகிறது.

இதையும் படிங்க: #TNElectionResults2026: விஜய்யுடன் கூட்டணி வைக்க ராகுல் விரும்பினார்: பிரவீன் சக்கரவர்த்தி வெளியிட்ட அதிரடி தகவல்!

வாக்கு எண்ணிக்கையின் அடுத்தடுத்த சுற்றுகளில் ஏதேனும் மாற்றம் நிகழுமா அல்லது இந்த நிலை நீடிக்குமா என்பது மாலைக்குள் உறுதியாகத் தெரிந்துவிடும்.
 

இதையும் படிங்க: #TNElectionResults2026: தவெகவுடன் கூட்டணி சேரும் காங்கிரஸ், பாமக? அரசியல் களத்தில் அதிரடி மாற்றங்கள்!