சவுதி அரேபியாவின் ரியாத் விமான நிலையம் மீதான தாக்குதலைத் தொடர்ந்து, அங்கு வான்வழிப் போக்குவரத்து மற்றும் பாதுகாப்புச் சூழல் பாதிக்கப்பட்டுள்ளதால், அங்குள்ள இந்தியக் குடிமக்கள் உள்ளூர் அதிகாரிகளின் வழிகாட்டுதல்களைக் கண்டிப்பாகப் பின்பற்றுமாறு இந்திய அரசு அறிவுறுத்தியுள்ளது.

ரியாத் சர்வதேச விமான நிலையத்தில் ஏற்பட்ட பாதிப்புகள் காரணமாக விமானங்கள் தரை இறங்குவதிலும் புறப்படுவதிலும் சிக்கல் நீடித்து வருகிறது. மேலும், பாதுகாப்பு நடவடிக்கைகளின் காரணமாக பல்வேறு விமானச் சேவைகள் ரத்து செய்யப்பட்டுள்ளதுடன், சில சேவைகள் தாமதமாக இயக்கப்பட்டு வருகின்றன.

இந்நிலையில், சவுதியில் வசிக்கும் மற்றும் பயணம் மேற்கொண்டுள்ள இந்தியர்களின் பாதுகாப்பைக் கருத்தில் கொண்டு இந்தியத் தூதரகம் மற்றும் மத்திய அரசு இந்த எச்சரிக்கை வழிகாட்டுதலை வெளியிட்டுள்ளன.

இதையும் படிங்க: ஐரோப்பிய வர்த்தக ஒப்பந்தம் 2027இல் அமல்..! பல ஆண்டு போராட்டத்துக்கு கிடைத்த வெற்றி..!!

அதில், உள்ளூர் பாதுகாப்பு அமைப்புகள் மற்றும் அவசரகால நிர்வாகம் பிறப்பிக்கும் உத்தரவுகளை இந்தியர்கள் முழுமையாகப் பின்பற்ற வேண்டும் என்றும், வான்வழித் தாக்குதல் அபாய எச்சரிக்கைகளின் போது திறந்தவெளிகளில் நடமாடுவதைத் தவிர்த்துப் பாதுகாப்பான கட்டடங்களுக்குள் இருக்குமாறும் கேட்டுக்கொள்ளப்பட்டுள்ளது.

மேலும், பாதுகாப்பு நடவடிக்கைகள் தொடர்பான புகைப்படங்கள், காணொளிகள் மற்றும் சரிபார்க்கப்படாத தகவல்களைச் சமூக வலைத்தளங்களில் பகிர்வதைத் தவிர்க்குமாறும், விமானப் பயணங்களை மேற்கொள்வோர் சம்பந்தப்பட்ட விமான நிறுவனங்களின் அதிகாரப்பூர்வ அறிவிப்புகளைத் தொடர்ந்து கண்காணிக்குமாறும் இந்தியத் தூதரகம் அறிவுறுத்தியுள்ளது.

இதையும் படிங்க: இந்தியாவுக்கு ஆபத்து ஏற்படுத்த ஒருபோதும் இடமளிக்க மாட்டோம்! இலங்கை அதிபர் திசாநாயக்க உறுதி!