புனே: உள்நாட்டிலேயே தயாரிக்கப்பட்ட ‘வாயு அஸ்த்ரா-1’ ஏவுகணையின் சோதனையை புனேவைச் சேர்ந்த பாதுகாப்புத் தொழில்நுட்ப நிறுவனமான நிபே லிமிடெட் வெற்றிகரமாக நடத்தியுள்ளது. இந்த ஏவுகணை இந்திய ராணுவத்தின் பயன்பாட்டுக்காக விரைவில் வழங்கப்பட உள்ளது.

ராஜஸ்தானில் நடைபெற்ற இந்த சோதனையில் 10 கிலோ எடையுள்ள ஏவுகணை சுமார் 100 கிலோமீட்டர் தூரம் பறந்து சென்று இலக்கை துல்லியமாகத் தாக்கி அழித்தது. சோதனையின் போது தாக்குதலை நடுவிலேயே ரத்து செய்யும் திறன் மற்றும் மீண்டும் தாக்கும் திறன் ஆகியவை வெற்றிகரமாக சோதிக்கப்பட்டன.

தரைக்கட்டுப்பாட்டு நிலையத்திலிருந்து 70 கிலோமீட்டர் தொலைவில் உள்ள மற்றொரு முன்களக் கட்டுப்பாட்டுப் பிரிவுக்கு ஏவுகணையின் கட்டுப்பாட்டை மாற்றும் திறனும் சோதனை செய்யப்பட்டது. உத்தரகண்ட் மாநிலம் ஜோஷிமத் பகுதியில் உயர் மலைப்பகுதியில் 14,000 அடிக்கு மேல் உயரத்தில் 90 நிமிடங்களுக்கும் அதிக நேரம் தொடர்ந்து பறக்கும் திறன் சோதிக்கப்பட்டது. முக்கியமாக, இலக்கைத் தாக்கிய பிறகும் மீண்டும் பயன்படுத்தக்கூடிய திறன் கொண்டதாக இந்த ஏவுகணை வடிவமைக்கப்பட்டுள்ளது.

இதையும் படிங்க: இந்தியாவுக்கு எதிராக தொடர்ந்து செயல்பட்டால்..!! புவியியல் வரலாற்றில் பாக்., இருக்கவே இருக்காது! ராணுவ தளபதி வார்னிங்!

இதற்கு முன்பு மே 18 மற்றும் 19 ஆகிய தேதிகளில் ‘சூர்யஸ்த்ரா’ ராக்கெட்டுகளின் சோதனையையும் நிபே நிறுவனம் வெற்றிகரமாக நடத்தியது. இந்த ராக்கெட்டுகள் 150 கிலோமீட்டர் மற்றும் 300 கிலோமீட்டர் வரை தாக்கும் திறன் கொண்டவை.

இந்த சோதனைகள் இந்தியாவின் தற்சார்பு பாதுகாப்பு உற்பத்தியில் முக்கிய மைல்கல்லாகக் கருதப்படுகிறது. ‘அஸ்த்ரா-1’ ஏவுகணை இந்திய ராணுவத்தின் தாக்குதல் திறனை கணிசமாக அதிகரிக்கும் என எதிர்பார்க்கப்படுகிறது. உயர் மலைப்பகுதிகள், பாலைவனப் பகுதிகள் உள்ளிட்ட பல்வேறு சூழல்களில் சோதனை செய்யப்பட்டதால், இந்த ஏவுகணையின் நம்பகத்தன்மை அதிகரித்துள்ளது.

நிபே லிமிடெட் நிறுவனத்தின் இந்த சாதனை இந்திய பாதுகாப்புத் துறையில் உள்நாட்டு தொழில்நுட்பத்தின் வலிமையை மீண்டும் நிரூபித்துள்ளது. இந்த ஏவுகணை விரைவில் இந்திய ராணுவத்துக்கு வழங்கப்படும் என எதிர்பார்க்கப்படுகிறது. இந்த வெற்றி இந்தியாவின் ‘ஆத்மநிர்பர் பாரத்’ இலக்கை நோக்கிய முக்கிய அடியாகப் பார்க்கப்படுகிறது.

இதையும் படிங்க: இந்தியாவுக்கு எதிரான எந்த ஒரு செயலுக்கும் பதிலடி உறுதி!! எப்போதும் நீதி நிலைநாட்டப்படும்! இந்திய ராணுவம் எச்சரிக்கை!!