விமான கடத்தல் முயற்சியை துணிச்சலுடன் முறியடித்த இந்திய விமானி ஸ்மிட் மச்சார் உடல்நிலையில் தொடர்ந்து முன்னேற்றம் ஏற்பட்டுள்ளதாக ஐக்கிய அரபு அமீரகத்தில் உள்ள இந்திய தூதரகம் தெரிவித்துள்ளது. அபுதாபி மருத்துவமனையில் அவர் தொடர்ந்து சிகிச்சை பெற்று வரும் நிலையில், இந்த தகவல் அவரது குடும்பத்தினர் மற்றும் அவருக்காக பிரார்த்தனை செய்து வரும் பலருக்கும் நிம்மதியை ஏற்படுத்தியுள்ளது.

துபாயில் இருந்து டெல் அவிவ் நோக்கி சென்ற பிளைதுபாய் விமானத்தில் சமீபத்தில் பரபரப்பான சம்பவம் ஒன்று ஏற்பட்டது. விமானத்தை கடத்த முயற்சி நடந்ததாக கூறப்படும் நிலையில், அதனை எதிர்கொண்டு விமானத்தை பாதுகாக்கும் நடவடிக்கையில் இந்திய விமானி கேப்டன் ஸ்மிட் மச்சார் துணிச்சலுடன் செயல்பட்டதாக தெரிவிக்கப்பட்டுள்ளது.

இந்த சம்பவத்தின்போது ஸ்மிட் மச்சாருக்கு பலத்த காயம் ஏற்பட்டது. குறிப்பாக அவரது தலையில் ஏற்பட்ட காயம் காரணமாக அவர் அவசரமாக மருத்துவமனையில் அனுமதிக்கப்பட்டார். ஆரம்பகட்ட சிகிச்சை சவுதி அரேபியாவில் வழங்கப்பட்டது. அங்கு மருத்துவர்கள் அவரது மண்டை ஓட்டில் ஏற்பட்ட சேதத்தை சரிசெய்ய தேவையான சிகிச்சையை மேற்கொண்டனர்.

இதையும் படிங்க: இந்திய கேப்டன் ஸ்மிட் மச்சாரின் வீரத்தை பாராட்டி ரூ.1 கோடி வெகுமதி! பரிசை அறிவித்த நிறுவனம்!

இதையடுத்து மேல்சிகிச்சைக்காக ஸ்மிட் மச்சார் ஐக்கிய அரபு அமீரகத்தின் அபுதாபியில் உள்ள மருத்துவமனைக்கு மாற்றப்பட்டார். அங்கு மருத்துவர்கள் அவரை தீவிரமாக கண்காணித்து சிகிச்சை அளித்து வருகின்றனர்.

இந்த நிலையில், ஸ்மிட் மச்சாரின் தற்போதைய உடல்நிலை குறித்து ஐக்கிய அரபு அமீரகத்தில் உள்ள இந்திய தூதரகம் சமூக வலைதளம் மூலம் தகவல் வெளியிட்டுள்ளது. அதில், கேப்டன் ஸ்மிட் மச்சார் தொடர்ந்து சீரான முன்னேற்றம் கண்டு வருவதாகவும், அவரது உடல்நிலை படிப்படியாக தேறி வருவதாகவும் தெரிவிக்கப்பட்டுள்ளது.

மேலும், அவரது குடும்பத்தினர், மருத்துவக் குழுவினர் மற்றும் உள்ளூர் அதிகாரிகளுடன் இந்திய தூதரகம் தொடர்ந்து தொடர்பில் இருப்பதாக கூறப்பட்டுள்ளது. அவருக்கு தேவையான அனைத்து உதவிகளையும் வழங்கி வருவதாகவும் தூதரகம் தெரிவித்துள்ளது.

ஸ்மிட் மச்சார் விரைவில் முழுமையாக குணமடைய வேண்டும் என பலரும் பிரார்த்தனை செய்து வரும் நிலையில், அவருக்காக பிரார்த்தனை செய்த அனைவருக்கும் இந்திய தூதரகம் நன்றி தெரிவித்துள்ளது. உடல்நிலையில் ஏற்பட்டுள்ள முன்னேற்றம் தற்போது அவரது குடும்பத்தினருக்கு சற்று ஆறுதலை அளித்துள்ளது.

இதையும் படிங்க: இன்னொரு 9/11 நடக்காமல் தடுத்த இந்தியர்! சுமித் ஒரு ஹீரோ! இந்திய விமானியை பாராட்டிய மோடி!