பாட்னாவில் இருந்து லக்னோ நோக்கி சென்ற இண்டிகோ விமானம் நடுவானில் மின்னல் தாக்குதலை எதிர்கொண்ட சம்பவம் பரபரப்பை ஏற்படுத்தியுள்ளது. சுமார் 17,000 அடி உயரத்தில் மோசமான வானிலைக்கு மத்தியில் சென்றுகொண்டிருந்த விமானத்தின் முன்பகுதி சேதமடைந்தது.

எனினும், விமானிகள் நிலைமையை சமாளித்து விமானத்தை லக்னோ விமான நிலையத்தில் பாதுகாப்பாக தரையிறக்கினர். விமானத்தில் இருந்த 104 பயணிகள் மற்றும் 6 பணியாளர்கள் அனைவரும் பாதுகாப்பாக உள்ளனர். யாருக்கும் காயம் ஏற்படவில்லை.

இண்டிகோவின் 6E925 விமானம் நேற்று பிற்பகல் பாட்னாவில் இருந்து புறப்பட்டது. லக்னோவை நோக்கி வந்து கொண்டிருந்தபோது மோசமான வானிலை நிலவியது. இந்த நேரத்தில் சுமார் 17,000 அடி உயரத்தில் விமானம் மின்னல் தாக்குதலை எதிர்கொண்டதாக முதற்கட்ட தகவல்கள் தெரிவிக்கின்றன. விமானத்தின் முன்பகுதியில் உள்ள ரேடார் பாதுகாப்பு அமைப்பான ‘ரேடோம்’ பகுதியில் சேதம் ஏற்பட்டது.

இதையும் படிங்க: இண்டிகோ பயணிகளுக்கு ஷாக்..! விமான டிக்கெட்டில் புதிய கட்டணம்... அதிரடி அறிவிப்பு..!!

சம்பவத்தையடுத்து விமானிகள் விமானப் போக்குவரத்து கட்டுப்பாட்டு அறைக்கு தகவல் தெரிவித்தனர். விமானத்தின் சேதத்தின் முழு அளவு அப்போது தெளிவாக தெரியாத நிலையில், விமானம் தொடர்ந்து பாதுகாப்பாக லக்னோவில் தரையிறக்கப்பட்டது.

சுமார் மாலை 4.05 மணியளவில் விமானம் தரையிறங்கியது. திட்டமிட்ட நேரத்தை விட சில நிமிடங்கள் முன்னதாகவே விமானம் லக்னோ சென்றடைந்தது குறிப்பிடத்தக்கது.

தரையிறங்கிய பின்னர் நடத்தப்பட்ட சோதனையில் விமானத்தின் முன்பகுதியில் சேதம் இருப்பது கண்டறியப்பட்டது. இதையடுத்து விமானம் இயக்கத்திலிருந்து நிறுத்தப்பட்டு, தொழில்நுட்ப ஆய்வுக்கு உட்படுத்தப்பட்டுள்ளது. விமானத்தை மீண்டும் இயக்குவதற்கு தேவையான பராமரிப்பு பணிகளும், அதிகாரப்பூர்வ அனுமதிகளும் பெறப்பட வேண்டும் என தெரிவிக்கப்பட்டுள்ளது.

இதற்கிடையே, அந்த விமானத்தில் பயணித்தவர்கள் தொடர்ந்து பயணம் செய்ய இண்டிகோ நிறுவனம் மாற்று விமானத்தை ஏற்பாடு செய்தது. அதில் 104 பயணிகளும் மாலை சுமார் 6.22 மணியளவில் அடுத்த பயணத்தைத் தொடர்ந்தனர்.

இதனால், நடுவானில் ஏற்பட்ட திடீர் அச்சுறுத்தல் பெரும் விபத்தாக மாறாமல் தவிர்க்கப்பட்டது. இந்த சம்பவம் குறித்து விமானப் பாதுகாப்பு அதிகாரிகளுக்கும் தகவல் தெரிவிக்கப்பட்டு விசாரணை நடைபெற்று வருகிறது.

இதையும் படிங்க: பலத்த காற்று... தடுமாறிய விமானம்! தரையில் மோதிய வால்பகுதி! இண்டிகோ பயணிகள் அதிர்ச்சி!!