தமிழகத்தில் சட்டம் ஒழுங்கு உள்கட்டமைப்பை மேலும் பலப்படுத்தும் நோக்கில், சென்னை, மதுரை, சேலம், திருப்பூர் உள்ளிட்ட முக்கிய மாநகரங்களின் காவல் ஆணையர்கள் மற்றும் கூடுதல் டி.ஜி.பி.க்கள் உட்பட 14 உயர் ஐ.பி.எஸ். (IPS) அதிகாரிகளை அதிரடியாகப் பணியிட மாற்றம் செய்து தமிழக அரசின் உள் துறை கூடுதல் தலைமைச் செயலாளர் கே.மணிவாசன் இன்று அதிரடி உத்தரவு பிறப்பித்துள்ளார்.

தமிழகத்தில் சட்டம் ஒழுங்கு மற்றும் நிர்வாக உத்திகளை மேம்படுத்தும் வகையில் இந்த அதிரடி மாற்றங்கள் போர்க்கால அடிப்படையில் பேரவை விதிகளுக்கு உட்பட்டு மேற்கொள்ளப்பட்டுள்ளன. இதற்கான அதிகாரப்பூர்வ அரசாணை (Police Note No.SC/30/2026) சென்னை தலைமைச் செயலகத்திலிருந்து இன்று வெளியிடப்பட்டுள்ளது. அதன் முழு விவரங்கள் வருமாறு:

திருப்பூர் மாநகர காவல் ஆணையராக இருந்த எஸ்.ராஜேந்திரன், மதுரை மாநகர காவல் ஆணையராகப் பணியிட மாற்றம் செய்யப்பட்டுள்ளார். அங்குப் பணிபுரிந்த கபில் குமார் சி. சரத்கர், சென்னை பெருநகர காவல் துறையின் சட்டம் ஒழுங்கு (வடக்கு) கூடுதல் ஆணையராக நியமிக்கப்பட்டுள்ளார். சென்னை சட்டம் ஒழுங்கு (வடக்கு) கூடுதல் ஆணையராக இருந்த பிரவேஷ் குமார், சென்னை கடலோர பாதுகாப்பு குழுமத்தின் ஐ.ஜி.யாக (Coastal Security Group) மாற்றப்பட்டுள்ளார். சென்னை குற்றப்பிரிவு (Crime against Women and Children) ஐ.ஜி.யாக இருந்த எஸ்.ராஜேஸ்வரி, திருப்பூர் மாநகர புதிய காவல் ஆணையராக நியமிக்கப்பட்டுள்ளார். இதேபோல், சேலம் மாநகர காவல் ஆணையராக இருந்த அனில் குமார் கிரி, சென்னை சிலை கடத்தல் தடுப்பு பிரிவு (Idol Wing CID) ஐ.ஜி.யாக மாற்றப்பட, சென்னை தலைமையிட கூடுதல் ஆணையராக இருந்த கே.ஜோஷி நிர்மல் குமார் சேலம் மாநகர புதிய காவல் ஆணையராக அதிரடியாக நியமிக்கப்பட்டுள்ளார்.

இதையும் படிங்க: சட்டம் ஒழுங்கு குறித்து நாளை விளக்கமளிப்பார் முதல்வர் விஜய் - அமைச்சர் செங்கோட்டையன் தகவல்!

சென்னை போக்குவரத்து பிரிவு கூடுதல் ஆணையராக இருந்த ஜி.கார்த்திகேயன், சமூக நீதி மற்றும் மனித உரிமைகள் பிரிவு ஐ.ஜி.யாக மாற்றப்பட்டுள்ளார். அங்குப் பணிபுரிந்த பெண் அதிகாரி டாக்டர் பி.சாமுண்டீஸ்வரி, சென்னை பெருநகர போக்குவரத்து பிரிவு கூடுதல் ஆணையராக நியமிக்கப்பட்டுள்ளார். போலீஸ் நவீனமயமாக்கல் பிரிவு ஐ.ஜி.யாக இருந்த ஏ.ஜி.பாபு, சென்னை பெருநகர காவல் தலைமையிட கூடுதல் ஆணையராக நியமனம் செய்யப்பட்டுள்ளார். தமிழக டி.ஜி.பி. அலுவலகத்தின் பணியமைப்பு (Establishment) பிரிவு ஐ.ஜி.யாக இருந்த பி.சி.தேன்மொழி, சென்னை மத்திய குற்றப்பிரிவு (CCB) கூடுதல் ஆணையராக அதிரடியாக நியமிக்கப்பட்டுள்ளார். அங்குப் பணிபுரிந்த ஏ.ராதிகா, டி.ஜி.பி. அலுவலக நிர்வாகப் பிரிவு (Administration) ஐ.ஜி.யாக மாற்றப்பட்டுள்ளார்.

டி.ஜி.பி. அலுவலக நிர்வாகப் பிரிவு ஐ.ஜி.யாக இருந்த சி.மகேஸ்வரி, சென்னை லஞ்ச ஒழிப்பு மற்றும் ஊழல் தடுப்பு இயக்கத்தின் (DVAC) சிறப்பு புலனாய்வு பிரிவு-1 (Special Investigation Cell-I) ஐ.ஜி.யாக நியமிக்கப்பட்டுள்ளார். அங்குப் பணிபுரிந்த ஏ.டி.துரைகுமார், டி.ஜி.பி. அலுவலக பணியமைப்பு (Establishment) பிரிவு ஐ.ஜி.யாகப் பணியிட மாற்றம் செய்யப்பட்டுள்ளார். மேலும், தமிழ்நாடு மின் உற்பத்தி மற்றும் பகிர்மான கழகத்தின் (TANGEDCO) முதன்மை லஞ்ச ஒழிப்பு அதிகாரியாக இருந்த கூடுதல் டி.ஜி.பி. ஆயுஷ் மணி திவாரி, சென்னை டி.ஜி.பி. அலுவலக தலைமையிட கூடுதல் டி.ஜி.பி.யாக (ADGP Headquarters) அதிரடியாக நியமிக்கப்பட்டுள்ளார். தமிழகத்தில் நிர்வாக உள்கட்டமைப்பைச் சீரமைக்கப் புதிய தவெக அரசு எடுத்துள்ள இந்த அசுர வேக ஐ.பி.எஸ். அதிகாரிகள் அதிரடி இடமாற்றம், கோட்டை வட்டாரத்திலும் சட்டம் ஒழுங்கு காவல் வட்டாரங்களிலும் தற்பொழுது மிகப்பெரிய விவாதப் புயலையும் பரபரப்பையும் கிளப்பியுள்ளது.

இதையும் படிங்க: வெள்ளம் வந்தால் அரசு அதிகாரிகளே பொறுப்பு.. வேளச்சேரி விவகாரத்தில் பசுமைத் தீர்ப்பாயம் எச்சரிக்கை..!