மத்திய கிழக்கில் உள்ள அமெரிக்க ராணுவப் படைகளை குறிவைத்து ஈரான் ஏவிய பாலிஸ்டிக் ஏவுகணைகள் அனைத்தும் வெற்றிகரமாக இடைமறிக்கப்பட்டதாக அமெரிக்க மத்தியப்படை தலைமையகம் (CENTCOM) தெரிவித்துள்ளது. இந்த சம்பவம் மத்திய கிழக்கில் மீண்டும் பதற்றத்தை அதிகரித்துள்ளது.
ஈரான் தொடர்பான பாதுகாப்பு நிலைமை குறித்து அமெரிக்க அதிபர் டொனால்ட் டிரம்ப் மற்றும் இஸ்ரேல் பிரதமர் பெஞ்சமின் நெதன்யாகு ஆகியோர் வெள்ளை மாளிகையில் முக்கிய ஆலோசனையில் ஈடுபட்டனர். முன்னதாக, வெள்ளை மாளிகைக்கு வந்த நெதன்யாகுவை டிரம்ப் வரவேற்றார். இந்த சந்திப்பு நடைபெற்ற சில மணி நேரங்களிலேயே, மத்திய கிழக்கில் உள்ள அமெரிக்க ராணுவத் தளங்களை குறிவைத்து ஈரான் ஏவுகணை தாக்குதல் நடத்தியதாக தகவல்கள் வெளியாகின.
சில நாட்களுக்கு முன்பு, ஈரான் மீது மேற்கொள்ள திட்டமிடப்பட்டிருந்த ராணுவத் தாக்குதல்களை அமெரிக்க அதிபர் டிரம்ப் தற்காலிகமாக நிறுத்தி வைத்திருந்தார். அதன் பின்னர், மத்திய கிழக்கில் உள்ள அமெரிக்க ராணுவத் தளங்களை குறிவைத்து ஈரான் நேரடியாக நடத்திய முதல் தாக்குதல் இதுவாகக் கருதப்படுகிறது.
இதையும் படிங்க: 'Where to kill Melania?' ஈரான் வெளியிட்ட ஷாக் வீடியோ..!! டிரம்ப் குடும்பத்தை சுற்றும் புதிய சர்ச்சை!!
இந்த சம்பவம் தொடர்பாக அமெரிக்க மத்தியப்படை தலைமையகம் வெளியிட்டுள்ள அறிக்கையில், "மத்திய கிழக்கில் உள்ள அமெரிக்கப் படைகள் மீது திடீர் தாக்குதல் நடத்தும் முயற்சியாக, இஸ்லாமியப் புரட்சிகரப் பாதுகாப்புப் படையினர் ஈரானிலிருந்து பல பாலிஸ்டிக் ஏவுகணைகளை ஏவினர். ஈரானின் அனைத்து ஏவுகணைகளும் வெற்றிகரமாக இடைமறிக்கப்பட்டன. அமெரிக்கப் படைகள் விழிப்புடனும், தயார் நிலையிலும் உள்ளன" என்று தெரிவிக்கப்பட்டுள்ளது.
இந்த தாக்குதலில் உயிரிழப்பு அல்லது சேதம் ஏற்பட்டதா என்பது குறித்து அமெரிக்க தரப்பில் இதுவரை விரிவான தகவல் வெளியாகவில்லை. இருப்பினும், பாதுகாப்பு அமைப்புகள் முழுமையாக செயல்பட்டு ஏவுகணைகளை இடைமறித்ததாக தெரிவிக்கப்பட்டுள்ளது.
ஈரான் - அமெரிக்கா - இஸ்ரேல் இடையேயான பதற்றம் மீண்டும் அதிகரித்து வரும் சூழலில், இந்த சம்பவம் சர்வதேச அளவில் கவனத்தை ஈர்த்துள்ளது. மத்திய கிழக்கின் பாதுகாப்பு நிலைமை மற்றும் அடுத்தகட்ட அரசியல், ராணுவ நடவடிக்கைகள் குறித்து உலக நாடுகள் தீவிரமாக கண்காணித்து வருகின்றன.
இதையும் படிங்க: அமெரிக்கா - ஈரான் போர் புதிய திருப்பம்... தாக்குதலை நிறுத்திய டிரம்ப்! ஆயுதப் பற்றாக்குறையா?!