மத்திய கிழக்கு பிராந்தியத்தில் அமெரிக்கா-இஸ்ரேல் கூட்டணியுடன் ஈரானுக்கு எதிரான போர் மூன்று வாரங்களாகத் தொடர்ந்து வரும் நிலையில், ஈரானின் பதிலடித் தாக்குதல்களால் அமெரிக்க ராணுவ வீரர்கள் 13 பேர் உயிரிழந்துள்ளனர். மேலும் 200க்கும் மேற்பட்டோர் காயமடைந்துள்ளதாக அமெரிக்க ராணுவம் அதிகாரப்பூர்வமாகத் தெரிவித்துள்ளது.
கடந்த பிப்ரவரி 28-ஆம் தேதி இஸ்ரேலும் அமெரிக்காவும் இணைந்து ஈரான் மீது பெருமளவிலான தாக்குதலைத் தொடங்கின. இதற்கு பதிலடியாக ஈரான், மேற்காசியாவில் உள்ள அமெரிக்க ராணுவ தளங்கள், உள்கட்டமைப்புகள் மற்றும் ஜெட் விமானங்களை குறிவைத்து ஏவுகணை, ஆளில்லா விமானத் தாக்குதல்களை நடத்தி வருகிறது.
இதில் அமெரிக்க வீரர்களின் உயிரிழப்பு எண்ணிக்கை 13-ஆக உயர்ந்துள்ளது. காயமடைந்த 200 பேரில் பெரும்பாலானோர் சிறிய காயங்களால் பாதிக்கப்பட்டுள்ளனர். 180க்கும் மேற்பட்டோர் சிகிச்சை பெற்று குணமடைந்து பணிக்குத் திரும்பியுள்ளனர்.
இதையும் படிங்க: ஈரானுக்கு அணு ஆயுதம் கிடைக்கவே கூடாது! கிடைச்சா அவ்ளோதான்!! பகீர் கிளப்பும் ட்ரம்ப்!
மீதமுள்ள 20 பேரில் 10 பேருக்கு படுகாயங்கள் ஏற்பட்டு மருத்துவமனையில் சிகிச்சை பெற்று வருகின்றனர். அவர்கள் சில நாட்களில் பணிக்குத் திரும்புவார்கள் என்று அமெரிக்க ராணுவ அதிகாரிகள் தெரிவித்துள்ளனர்.
ஈரான் தரப்பில், அமெரிக்க-இஸ்ரேல் தாக்குதல்களால் 1,200க்கும் மேற்பட்டோர் உயிரிழந்துள்ளனர். இதில் 200 பெண்கள், 200 குழந்தைகள் உட்பட பல சிவிலியன்கள் அடங்குவர். 10,000க்கும் அதிகமானோர் காயமடைந்துள்ளனர்.
இஸ்ரேலில் ஈரானின் தாக்குதல்களால் 14 பேர் கொல்லப்பட்டுள்ளனர். லெபனானில் இஸ்ரேல் தாக்குதல்களால் 886 பேர் உயிரிழந்துள்ளனர். அங்கு 10 லட்சத்துக்கும் மேற்பட்ட மக்கள் இடம்பெயர்ந்துள்ளனர். போர் தொடங்கியதிலிருந்து பிராந்தியம் முழுவதும் பதற்றம் உச்சத்தில் உள்ளது.
அமெரிக்க அதிபர் டிரம்ப், ஈரானின் அணு ஆயுத திட்டத்தை முற்றிலும் சிதைத்துவிட்டதாகவும், ஈரான் ஒருபோதும் அணு ஆயுதம் பெற அனுமதிக்க மாட்டோம் என்றும் தெரிவித்து வருகிறார். இருப்பினும், ஈரானின் பதிலடித் தாக்குதல்கள் தொடர்வதால், அமெரிக்க ராணுவ இழப்புகள் அதிகரித்து வருகின்றன.
இந்த மோதல் எண்ணெய் விலை உயர்வு, பிராந்திய அமைதி அச்சுறுத்தல் உள்ளிட்ட பல்வேறு பிரச்சினைகளை ஏற்படுத்தியுள்ளது. சர்வதேச சமூகம் உடனடி போர் நிறுத்தத்தை வலியுறுத்தி வரும் நிலையில், பதற்றம் தணியும் அறிகுறி இல்லை.
இதையும் படிங்க: இடைவிடாது தாக்கும் ஈரான்!! வளைகுடா நாடுகளில் பதற்றம்! ஓமனில் 2 இந்தியர்கள் பலி!