கடவுளின் தேசத்தில் கருணை காட்டாத வானிலை! கனமழை, மரம்முறிவு, சுவர் இடிந்து 7 பேர் மரணம்!

கேரளாவில் தென்மேற்குப் பருவமழை தீவிரமடைந்து வரும் நிலையில், கனமழை காரணமாக ஏற்பட்ட பல்வேறு விபத்துகளில் ஒரே நாளில் 7 பேர் உயிரிழந்த சம்பவம் பெரும் சோகத்தை ஏற்படுத்தியுள்ளது. தொடர்ந்து பெய்து வரும் மழையால் மாநிலத்தின் பல பகுதிகளில் இயல்பு வாழ்க்கை பாதிக்கப்பட்டுள்ளதுடன், பொதுமக்கள் மத்தியில் அச்சமும் அதிகரித்துள்ளது.

காசர்கோடு, கோழிக்கோடு, திருச்சூர் மற்றும் எர்ணாகுளம் உள்ளிட்ட மாவட்டங்களில் மழை தொடர்பான விபத்துகள் அதிகரித்துள்ளன. திருச்சூர் மாவட்டம் மணலூரில் தற்காலிகமாக அமைக்கப்பட்டிருந்த கொட்டகையின் மீது பெரிய மரம் ஒன்று முறிந்து விழுந்ததில், அதன் கீழ் உறங்கிக் கொண்டிருந்த 29 வயது இளைஞர் பரிதாபமாக உயிரிழந்தார்.

கோழிக்கோட்டில் உள்ள குட்டியாடி ஆற்றில் நிகழ்ந்த சம்பவம் மேலும் சோகத்தை ஏற்படுத்தியுள்ளது. துணி துவைக்கச் சென்றபோது நீரில் தவறி விழுந்த தனது 7 வயது மகனை காப்பாற்ற முயன்ற ரம்யா என்ற பெண்ணும், அவரது மகனும் பலத்த நீரோட்டத்தில் அடித்துச் செல்லப்பட்டு உயிரிழந்தனர். இந்த சம்பவம் அப்பகுதி மக்களை அதிர்ச்சியில் ஆழ்த்தியுள்ளது.

இதையும் படிங்க: ரெட் அலர்ட்!! கேரளாவில் தொடரும் கனமழை!! இதுவரை 7 பேர் பலியான சோகம்!

காசர்கோடு மாவட்டம் ஆதூர் அருகே வீட்டின் தடுப்புச் சுவர் இடிந்து விழுந்ததில் இரு சகோதரர்கள் உயிரிழந்தனர். தொடர்ந்து பெய்த மழையால் மண் தளர்ந்து சுவர் சரிந்ததாக அதிகாரிகள் தெரிவித்துள்ளனர். இதேபோல் எர்ணாகுளம் பகுதியில் உள்ள குளத்தில் குளிக்கச் சென்ற இளைஞர் ஒருவர் நீரில் மூழ்கி உயிரிழந்த சம்பவமும் பதிவாகியுள்ளது.

இதற்கிடையில் காசர்கோட்டில் உள்ள ஒரு பள்ளியின் சுவர் திடீரென இடிந்து விழுந்தது. அதிர்ஷ்டவசமாக மாணவர்கள் அப்பகுதியில் இல்லாததால் பெரும் உயிர்சேதம் தவிர்க்கப்பட்டது. இந்த சம்பவம் பள்ளி கட்டிடங்களின் பாதுகாப்பு குறித்து புதிய கேள்விகளை எழுப்பியுள்ளது.

இந்திய வானிலை ஆய்வு மையம் வெளியிட்டுள்ள எச்சரிக்கையின்படி, கேரளாவில் ஜூன் 10-ஆம் தேதி வரை பரவலான மழை, இடி-மின்னல் மற்றும் மணிக்கு 40 முதல் 50 கிலோமீட்டர் வேகத்தில் பலத்த காற்று வீசக்கூடும். கடலோரப் பகுதிகளில் காற்றின் வேகம் மேலும் அதிகரிக்க வாய்ப்புள்ளதால், மீனவர்கள் கடலுக்குச் செல்ல வேண்டாம் என அதிகாரிகள் எச்சரித்துள்ளனர். மழை தொடரும் நிலையில், மக்கள் தேவையற்ற பயணங்களை தவிர்த்து பாதுகாப்புடன் இருக்குமாறு அறிவுறுத்தப்பட்டுள்ளது.

இதையும் படிங்க: வானிலை மையத்தின் கணிப்பை தப்பாக்கிய 'எல் நினோ'! கேரளாவில் தீவிரமடையும் தென்மேற்கு பருவமழை!