சிறுமிகளுக்கு எதிரான பாலியல் வன்கொடுமை வழக்கில் கைதாகியுள்ள தொழிலதிபர் ஜெம் வீரமணி தொடர்பான வீடியோ காட்சிகளைத் தொலைக்காட்சி ஊடகங்கள் மற்றும் சமூக வலைதளங்கள் வெளியிடச் சென்னை உயர்நீதிமன்றம் அதிரடியாகத் தடை விதித்துள்ளதுடன், இவ்வழக்கு குறித்து ஊடகங்களில் விவாதங்கள் நடத்தவும் திட்டவட்டமாகத் தடை விதித்து உத்தரவிட்டுள்ளது.
தொழிலதிபர் ஜெம் வீரமணி மீதான போக்சோ பாலியல் வன்கொடுமை வழக்கு தமிழகத்தில் பெரும் அதிர்வலைகளை ஏற்படுத்தியுள்ள நிலையில், குழந்தைகளுக்கு எதிரான பாலியல் குற்றங்கள் தொடர்பான காணொளிகள் சமூக வலைதளங்களிலும் சில ஊடகங்களிலும் வெளியானது குறித்து சிறப்பு விசாரணை நடத்தக் கோரி துளிர் என்கிற தொண்டு நிறுவனம் சென்னை உயர்நீதிமன்றத்தில் பொதுநல மனு ஒன்றைத் தாக்கல் செய்தது. இந்த மனு நீதிபதி வி.லட்சுமிநாராயணன் முன்னிலையில் இன்று அவசர வழக்காக விசாரணைக்கு வந்தது.
மனுவை விசாரித்த நீதிபதி வி.லட்சுமிநாராயணன், ஊடகங்களின் பொறுப்பற்ற அணுகுமுறையைக் கடுமையாகச் சாடிப் பரபரப்பு கருத்துகளைப் பதிவு செய்தார். இந்த வழக்கின் கொடூரத் தன்மையையும் தீவிரத்தன்மையையும் உணராமல் சில ஊடகங்கள் பொறுப்பற்ற முறையில் செயல்பட்டுள்ளன. இதுபோன்ற விவகாரங்களில் வரம்பு மீறி வீடியோக்களை வெளியிடுவதால், பாதிக்கப்பட்ட சிறுமிகளோ அல்லது அவர்களது குடும்பத்தினரோ அச்சத்தின் காரணமாகப் புகார் அளிக்க முன்வராத சூழல் உருவாகிவிடும். பத்திரிகை சுதந்திரம் என்பது ஊடக விசாரணை நடத்துவதற்கான தனிப்பட்ட உரிமை கிடையாது என்று நீதிபதி மிகக் காட்டமாக எச்சரித்தார்.
இதையும் படிங்க: பட்டினப்பாக்கம் புதிய தலைமை செயலகத்திற்கு இடைக்கால தடை கோரி மனு! சென்னை ஐகோர்ட்டில் வழக்கு!
இதனைத் தொடர்ந்து நீதிபதி பிறப்பித்த அதிரடி உத்தரவில், ஜெம் வீரமணி வழக்கில் தொடர்புடைய எந்தவொரு வீடியோ காட்சிகளையும் தொலைக்காட்சி ஊடகங்களோ, யூடியூப் அல்லது சமூக வலைதளங்களோ எக்காரணம் கொண்டும் ஒளிபரப்பவோ பகிரவோ கூடாது. அதேபோல், இவ்வழக்கு தொடர்பாகத் தொலைக்காட்சிகளில் ஊடக விசாரணையாக விவாத நிகழ்ச்சிகள் எதையும் நடத்தக் கூடாது.
அதேநேரம், இந்த வழக்கின் முன்னேற்றம் மற்றும் புலன்விசாரணை நிலவரங்கள் குறித்து பொதுமக்கள் வெளிப்படையாக அறிந்துகொள்ளும் வகையில், தமிழ்நாடு காவல்துறை வாரம் ஒருமுறை அதிகாரப்பூர்வ பத்திரிகைச் செய்திக் குறிப்பை வெளியிட வேண்டும் எனத் திட்டவட்டமாக உத்தரவிட்டார். மேலும், துளிர் தொண்டு நிறுவனம் தாக்கல் செய்த இந்த மனு குறித்து மத்திய மற்றும் மாநில அரசுகள், காவல்துறை மற்றும் சம்பந்தப்பட்ட காணொளியை வெளியிட்ட ஊடகங்கள் ஆகியவை விரிவான பதிலளிக்க உத்தரவிட்டு வழக்கின் அடுத்தகட்ட விசாரணையை நீதிபதி ஒத்திவைத்தார்.
இதையும் படிங்க: அரசியல்வாதிகளுக்கு போராட உரிமையுண்டு! இபிஎஸ் மீதான வழக்குகளை ரத்து செய்த ஐகோர்ட்!