தேனி மாவட்டம் ஆண்டிப்பட்டி தொகுதி தி.மு.க. எம்.எல்.ஏ. மகாராஜன் சமீபத்தில் கடமயிலம் ஒன்றியத்தில் நடைபெற்ற நிகழ்ச்சியில் பேசியபோது, “முதல்வர் ஸ்டாலின் மகளிருக்கு 5,000 ரூபாய் கொடுக்கிறார். எடப்பாடி பழனிசாமி 10,000 ரூபாய் தருவதாக சொல்கிறார். நான் சொல்கிறேன்… என்னை முதல்வராக்கினால் மகளிருக்கு மாதம் ஒரு லட்சம் ரூபாய் உதவித் தொகை தருவேன்” என்று பேசியிருக்கிறார்.
அவரது இந்தப் பேச்சு சமூக வலைதளங்களில் வேகமாகப் பரவியதும், தி.மு.க.வினர் அதிர்ச்சியும் கோபமும் அடைந்துள்ளனர். கட்சி தலைமைக்கு தேனி மாவட்ட நிர்வாகிகள் உடனடியாக புகார் அனுப்பியுள்ளனர்.
மகாராஜன் ஏற்கனவே இரண்டு முறை சர்ச்சையில் சிக்கியவர். முன்பு தேனி மாவட்டத்தில் அரசு நிகழ்ச்சியில் எம்.பி. தங்கதமிழ்ச்செல்வனுடன் கலெக்டர் முன்னிலையில் வாக்குவாதத்தில் ஈடுபட்டதால் கட்சித் தலைமை அவரைக் கண்டித்தது.
இதையும் படிங்க: சட்டசபை தேர்தலில் போட்டியிடுகிறாரா கனிமொழி?! குவியும் விருப்பமனு! நேர்காணலில் பங்கேற்க திட்டம்?!
அதற்குப் பிறகு வருசநாடு அருகே மண்ணூத்து மலை கிராமத்தில் பெண்களிடம் பேசும்போது, “ஓசி பஸ்சில் ஏறி ஜாலியாக ஆண்டிப்பட்டி, உசிலம்பட்டி, தேனி சென்று வாருங்கள். உங்கள் கணவர் வீட்டில் சமைத்து வைப்பார்” என்று பேசியதும் பெரும் சர்ச்சையை ஏற்படுத்தியது. அப்போதும் அவரை சென்னை அழைத்து கட்சித் தலைமை கடுமையாக எச்சரித்தது.
இந்நிலையில், “என்னை முதல்வராக்கினால் ஒரு லட்சம் ரூபாய் தருவேன்” என்ற அவரது புதிய பேச்சு தி.மு.க. தலைமையை கடும் அதிர்ச்சியில் ஆழ்த்தியுள்ளது. இது கட்சியின் ஒழுக்கத்துக்கு எதிரான செயல் என்று மூத்த நிர்வாகிகள் கருதுகின்றனர்.
தி.மு.க.வினர் இப்போது மகாராஜன் மீது கடும் நடவடிக்கை எடுக்க வேண்டும் என வலியுறுத்தி வருகின்றனர். 2026 சட்டமன்றத் தேர்தலுக்கு இன்னும் சில மாதங்களே உள்ள நிலையில், ஆண்டிப்பட்டி தொகுதியில் இந்த சர்ச்சை பெரும் பரபரப்பை ஏற்படுத்தியுள்ளது.
இதையும் படிங்க: 2026-ல் அதே ஈரோடு கிழக்கு தேர்தல் பாணி! கரூரில் தயாராகும் பட்டிகள்! வேலைய காட்டும் திமுக!