சென்னையின் மெரினா கடற்கரையில் குதிரை சவாரி மேற்கொண்ட 6 வயது சிறுமி அளித்த புகாரைத் தொடர்ந்து, குதிரை சவாரி நடத்தி வந்த இளைஞர் ஒருவர் போக்சோ சட்டத்தின் கீழ் கைது செய்யப்பட்ட சம்பவம் பரபரப்பை ஏற்படுத்தியுள்ளது.

சென்னையின் முக்கிய சுற்றுலா தலங்களில் ஒன்றான மெரினா கடற்கரையில் தினமும் ஏராளமான மக்கள் வருகை தருகின்றனர். குறிப்பாக குதிரை சவாரி, குழந்தைகள் மற்றும் சுற்றுலாப் பயணிகளிடையே பிரபலமான பொழுதுபோக்கு அம்சமாக இருந்து வருகிறது. உள்ளூர் மக்கள் மட்டுமின்றி, பிற மாநிலங்கள் மற்றும் வெளிநாடுகளில் இருந்து வரும் சுற்றுலாப் பயணிகளும் குதிரை சவாரியில் ஆர்வம் காட்டுகின்றனர். இதற்காக சிறுவர்கள் மற்றும் பெரியவர்களிடம் தனித்தனியாக கட்டணம் வசூலிக்கப்படுவதாக கூறப்படுகிறது.

இந்த நிலையில், ஆவடி பகுதியைச் சேர்ந்த ஒரு குடும்பம் சமீபத்தில் மெரினா கடற்கரைக்கு சுற்றுலா வந்துள்ளது. அப்போது அவர்களுடன் வந்திருந்த 6 வயது சிறுமி குதிரை சவாரி செய்ய விருப்பம் தெரிவித்ததாக கூறப்படுகிறது. இதையடுத்து அங்கு குதிரை சவாரி நடத்தி வந்த நிதிஷ் (18) என்ற இளைஞரின் குதிரையில் சிறுமி சவாரி செய்துள்ளார்.

இதையும் படிங்க: மதுபான பாரில் தகராறு! சென்னையில் இளம்பெண் கார் ஏற்றிக்கொலை!! கதறி அழும் பெற்றோர்!

சவாரி முடிந்த பிறகு, தன்னிடம் தகாத முறையில் நடந்துகொண்டதாக சிறுமி தனது பெற்றோரிடம் தெரிவித்ததாக கூறப்படுகிறது. இதனால் அதிர்ச்சியடைந்த குடும்பத்தினர் உடனடியாக சம்பவம் குறித்து நடவடிக்கை எடுக்க முடிவு செய்தனர்.

பின்னர், அவர்கள் சென்னை ஐஸ் ஹவுஸ் அனைத்து மகளிர் காவல் நிலையத்தில் புகார் அளித்தனர். புகாரின் அடிப்படையில் காவல்துறையினர் விசாரணை நடத்தினர். சிறுமி மற்றும் குடும்பத்தினரிடம் முதற்கட்ட தகவல்களை சேகரித்த போலீசார், சம்பவம் தொடர்பாக வழக்குப் பதிவு செய்தனர்.

தொடர்ந்து மேற்கொள்ளப்பட்ட விசாரணையின் அடிப்படையில், நிதிஷ் மீது குழந்தைகள் பாலியல் குற்றங்களிலிருந்து பாதுகாப்பு சட்டமான போக்சோ சட்டத்தின் கீழ் வழக்குப் பதிவு செய்யப்பட்டு கைது செய்யப்பட்டுள்ளார். கைது செய்யப்பட்ட நபரிடம் காவல்துறையினர் தொடர்ந்து விசாரணை நடத்தி வருகின்றனர்.

இந்த சம்பவம் மெரினா கடற்கரைக்கு வரும் பொதுமக்கள் மற்றும் பெற்றோர்கள் மத்தியில் கவலையை ஏற்படுத்தியுள்ளது. குழந்தைகளின் பாதுகாப்பு தொடர்பாக கூடுதல் கண்காணிப்பு மற்றும் முன்னெச்சரிக்கை நடவடிக்கைகள் தேவை என்ற கோரிக்கையும் எழுந்துள்ளது.

இதையும் படிங்க: பாலியல் புகாரில் சிக்கிய வளசரவாக்கம் டாக்டர் விபரீத முடிவு! மன உளைச்சலால் உயிரை மாய்த்துக் கொண்ட சோகம்!