தமிழகத்தின் புதிய முதலமைச்சராக விஜய் பதவியேற்றுள்ள நிலையில், பிரதான எதிர்க்கட்சியான அதிமுக-வில் வரலாறு காணாத பிளவு ஏற்பட்டுள்ளது. முன்னாள் அமைச்சர் சி.வி. சண்முகம் தலைமையில் 30-க்கும் மேற்பட்ட அதிமுக எம்.எல்.ஏ-க்கள், முதலமைச்சர் விஜய்யைச் சந்திக்கத் திட்டமிட்டுள்ளது தமிழக அரசியலில் மிகப்பெரிய அதிர்வலைகளை ஏற்படுத்தியுள்ளது.
தேர்தல் தோல்வியைத் தொடர்ந்து அதிமுக பொதுச்செயலாளர் எடப்பாடி பழனிசாமிக்கு எதிராகக் கட்சிக்குள் எதிர்ப்பு அலை கிளம்பியுள்ளது. தோல்விக்கு எடப்பாடி பழனிசாமியே பொறுப்பேற்றுப் பதவிய விலக வேண்டும் எனச் சி.வி. சண்முகம் தரப்பு வலியுறுத்தி வருகிறது.
எடப்பாடி பழனிசாமி இன்று மாவட்டச் செயலாளர்களுடன் ஆலோசனை நடத்திய அதே நேரத்தில், சி.வி. சண்முகம் தனது ஆதரவு எம்.எல்.ஏ-க்களுடன் சென்னையில் உள்ள ஒரு ரகசிய இடத்தில் ஆலோசனை நடத்தினார். தவெக அரசுக்குத் தங்களின் ஆதரவைத் தெரிவிக்கும் வகையிலும் அல்லது அரசியல் ரீதியான அடுத்தகட்ட நகர்வுகள் குறித்தும் விவாதிக்க, முதலமைச்சர் விஜய்யைச் சந்திக்கச் சி.வி. சண்முகம் நேரம் கேட்டுள்ளதாகத் தகவல்கள் தெரிவிக்கின்றன.
இதையும் படிங்க: "118 எம்.எல்.ஏ-க்கள் ஆதரவு இருந்தால் மட்டுமே ஆட்சி அமைக்கலாம் - ஆளுநர் அர்லேகர் அதிரடி!
பொது இடங்களைத் தவிர்த்து, சென்னையில் உள்ள ஒரு தனியார் மண்டபத்தில் இந்தச் சந்திப்பை நடத்தத் திட்டமிடப்பட்டுள்ளது. ஏற்கனவே 120 எம்.எல்.ஏ-க்களின் ஆதரவுடன் விஜய் ஆட்சியைத் தொடங்கியுள்ள நிலையில், அதிமுக-வின் ஒரு பெரிய குழு அவருக்கு ஆதரவு தெரிவித்தால் அது திமுக மற்றும் எடப்பாடி பழனிசாமி தரப்பிற்கு மிகப்பெரிய பின்னடைவாக அமையும்.
நாளை சட்டமன்றம் கூடி, மே 12-ல் சபாநாயகர் தேர்தல் நடைபெறவுள்ள நிலையில், இந்தச் சந்திப்பு மிகுந்த முக்கியத்துவம் பெற்றுள்ளது. சி.வி. சண்முகத்தின் இந்த அதிரடி நகர்வு, அதிமுக மீண்டும் பிளவுபடுவதையே காட்டுகிறது. எடப்பாடி பழனிசாமியின் தலைமையைத் தூக்கியெறிந்துவிட்டு, புதிய அரசியல் சக்தியான விஜய்யுடன் கைகோர்க்க ஒரு தரப்பு முனைப்புக் காட்டுவது தொண்டர்களிடையே குழப்பத்தை ஏற்படுத்தியுள்ளது.
தலைமைச் செயலகத்தில் சட்டம் ஒழுங்கு குறித்து முதல்வர் விஜய் ஆய்வு செய்து வரும் வேளையில், இந்த அரசியல் சந்திப்பு உறுதியானால் அது தமிழக அரசியல் வரைபடத்தையே மாற்றியமைக்கும் என்பதில் சந்தேகமில்லை.
இதையும் படிங்க: அதிமுக எம்.எல்.ஏ-க்களுடன் இபிஎஸ் ஆலோசனை.. தவெக ஆட்சி அமைப்பதை தடுக்க வியூகம்!