திண்டுக்கல்: மதுபான விற்பனையில் முறைகேடு, கள்ளச்சந்தை விற்பனை உள்ளிட்ட புகார்கள் மீது எந்தக் கட்சியையும் பார்க்காமல் நடவடிக்கை எடுக்கப்படும் என்று அமைச்சர் விக்னேஷ் தெரிவித்துள்ளார். “நாங்க திமுக மாதிரி கிடையாது” என்று அவர் கூறியிருப்பது தமிழக அரசியல் வட்டாரத்தில் கவனம் பெற்றுள்ளது.

திண்டுக்கல்லில் செய்தியாளர்களிடம் பேசிய அமைச்சர் விக்னேஷ், முந்தைய ஆட்சியில் இருந்ததைப் போன்ற பார் செயல்பாட்டு நடைமுறை இனி இருக்காது என்றார். இதற்காக சில சட்ட மாற்றங்கள் கொண்டு வரப்பட்டு வருவதாகவும் தெரிவித்தார்.

மதுபான விற்பனையில் தவறு செய்வது யாராக இருந்தாலும் நடவடிக்கை எடுக்கப்படும் என்று அவர் கூறினார். தவெக, திமுக, அதிமுக என எந்தக் கட்சியைச் சேர்ந்தவர்களாக இருந்தாலும் தவறு செய்தால் நடவடிக்கை எடுக்கப்படும் என்றும், தங்களது கட்சியைச் சேர்ந்தவர்கள் முறைகேட்டில் ஈடுபட்டாலும் கட்சி ரீதியாகவும் சட்ட ரீதியாகவும் நடவடிக்கை எடுக்கப்படும் என்றும் அமைச்சர் தெரிவித்தார்.

இதையும் படிங்க: மு.க.ஸ்டாலினுக்கு திடீர் உடல்நலக்குறைவு! திமுக முப்பெரும் விழா ஒத்திவைப்பு! துரைமுருகன் பரபரப்பு அறிவிப்பு!

ஏற்கனவே பலர் கட்சியில் இருந்து நீக்கப்பட்டுள்ளதாகவும் அவர் கூறினார். கள்ளச்சந்தையில் மதுபானம் விற்பனை செய்வது, நிர்ணயிக்கப்பட்ட விலையைவிட அதிக விலைக்கு மதுபானங்களை விற்பது போன்ற சம்பவங்கள் குறித்து பொதுமக்கள் உடனடியாக தகவல் தெரிவிக்க வேண்டும் என்றும் கேட்டுக்கொண்டார்.

சமூக வலைதளங்களில் அதிக விலைக்கு மதுபானம் விற்பனை செய்வது தொடர்பான வீடியோக்கள் வெளியானால், அவற்றைத் தொடர்ந்து நடவடிக்கை எடுத்து வருவதாகவும் அமைச்சர் கூறினார். தவறு செய்தவர்கள் எந்தப் பின்னணியைச் சேர்ந்தவர்கள் என்பதைப் பார்க்காமல் நடவடிக்கை எடுப்பதே அரசின் நிலைப்பாடு என்றும் அவர் தெரிவித்தார்.

மேலும், கடந்த செப்டம்பர் 8-ம் தேதி நடைபெற்ற ஆய்வுக் கூட்டத்தில் டாஸ்மாக் தொடர்பான பிரச்னைகள் குறித்து முக்கிய முடிவுகள் எடுக்கப்பட்டதாக அமைச்சர் கூறினார். ஒரு மாவட்டத்தில் அதிக அளவில் பிரச்னைகள் ஏற்பட்டால், அதற்கு விற்பனையாளர் மற்றும் மேற்பார்வையாளரை மட்டும் பொறுப்பாக்காமல், சம்பந்தப்பட்ட மாவட்ட மேலாளருக்கும் பொறுப்பு இருப்பதாக அவர் தெரிவித்தார்.

இனிமேல் மாவட்ட மேலாளர்கள் மீதும் நடவடிக்கை எடுக்கப்படும் என்றும் அமைச்சர் விக்னேஷ் கூறினார். தவறு நடந்த பிறகு கடுமையான தண்டனை மட்டும் வழங்குவதால் மாற்றத்தை ஏற்படுத்த முடியாது என்பதால், தேவையான வாய்ப்புகளை வழங்கி, கடந்த செப்டம்பர் 1-ம் தேதி முதல் நடவடிக்கைகளைத் தொடங்கியுள்ளதாகவும் அவர் தெரிவித்தார்.

எந்தக் கட்சியைச் சேர்ந்தவராக இருந்தாலும் முறைகேட்டில் ஈடுபட்டால் பாரபட்சமின்றி நடவடிக்கை எடுக்கப்படும் என்ற அமைச்சரின் இந்த பேச்சு தற்போது அரசியல் வட்டாரத்தில் பரபரப்பை ஏற்படுத்தியுள்ளது.

இதையும் படிங்க: சேகர்பாபுவுக்கு இது அவமானமா? அதிகாரிகளுக்கு வேற வேலையே இல்லையா? அமைச்சர் ரமேஷ் ஆவேசம்!