திருச்சி கிழக்கு தொகுதியில் திமுக தலைவர் மு.க.ஸ்டாலின் போட்டியிட வேண்டுமென அக்கட்சி சார்பில் நிறைவேற்றப்பட்டுள்ள தீர்மானம் அரசியல் வட்டாரத்தில் பரபரப்பைக் கிளப்பியுள்ளது. 

தமிழக சட்டமன்ற தேர்தல் கடந்த ஏப்ரல் மாதம் 23ம் தேதி நடைபெற்றது. இந்த தேர்தலில் முதல் முறையாக களமிறங்கிய தமிழக வெற்றிக் கழக தலைவர் விஜய் பெரம்பூர் மற்றும் திருச்சி கிழக்கு ஆகிய 2 தொகுதிகளில் போட்டியிட்டார். காங்கிரஸ், விசிக, இடது சாரிகள் மற்றும் இந்திய யூனியன் முஸ்லீம் லீக் ஆகிய கட்சிகளின் ஆதரவுடன் ஆட்சி அமைத்து, முதலமைச்சராக பொறுப்பேற்ற விஜய், கடந்த 10ம் தேதி திருச்சி கிழக்கு தொகு சட்டமன்ற உறுப்பினர் பதவியை ராஜினாமா செய்தார். 

அவரது ராஜினாமாவை ஏற்றுக்கொண்ட தேர்தல் ஆணையம் திருச்சி கிழக்கு தொகுதியை காலியானதாக அறிவித்தது. இதுதொடர்பான அறிவிப்பு தமிழக அரசின் அரசிதழில் வெளியாகியுள்ளது. வழக்கமாக ஒரு தொகுதி காலியாக அறிவிக்கப்பட்டால் அடுத்த ஆறு மாதங்களுக்குள் இடைத்தேர்தல் நடத்த வேண்டும். அதன்படி, வரும் நவம்பருக்குள் திருச்சி கிழக்கு தொகுதியில் இடைத்தேர்தல் நடைபெறவுள்ளது. திருச்சி கிழக்கு தொகுதியில் தவெக, திமுக யாரை வேட்பாளராக நிறுத்தவுள்ளனர் என்ற எதிர்பார்ப்பு எழுந்துள்ளது.

இதையும் படிங்க: தொகுதிக்கு விசிட் அடித்த முதல் நாளே இப்படியா?... தவெக அமைச்சர் செயலால் ஷாக்கில் மக்கள்... அம்பலமான ‘ஸ்டிக்கர்’ அரசியல்...!

தவெக சார்பில் விசிக தலைவர் திருமாவளவன், லால்குடி தொகுதியில் வெற்றி வாய்ப்பை தவறவிட்ட முன்னாள் அமைச்சர் கு.ப.கிருஷ்ணன், ஓய்வு பெற்ற ஐ.ஏ.எஸ். அதிகாரி சகாயம், விஜயுடன் ஆரம்ப காலம் முதலே பயணித்து வரும் ஆர்.கே.ராஜா உள்ளிட்டவர்களின் பெயர்கள் அடிபட்டு வருகின்றன. 

இதனிடையே, கொளத்தூர் தொகுதியில் தவெக வேட்பாளரிடம் தோல்வியைத் தழுவி திமுக தலைவர் மு.க.ஸ்டாலின் திருச்சி கிழக்கு தொகுதியில் போட்டியிட வாய்ப்புள்ளதாக தகவல்கள் வெளியாகின. இந்நிலையில், திருச்சி தெற்கு மாவட்ட திமுக சார்பில் மாவட்ட செயலாளர் அன்பில் மகேஷ் தலைமையில் நடந்த செயற்குழு கூட்டத்தில், திருச்சி கிழக்கு தொகுதியில் திமுக தலைவர் மு.க ஸ்டாலின் போட்டியிட வேண்டுமென தீர்மானம் நிறைவேற்றப்பட்டுள்ளது. இந்த தீர்மானம் தமிழக அரசியல் வட்டாரத்தில் பெரும் பரபரப்பையும், எதிர்பார்ப்பையும் ஏற்படுத்தியுள்ளது. 

இதையும் படிங்க: தமிழக அமைச்சரவையில் காங்கிரஸ்! 60 ஆண்டுகளுக்கு பின் நிகழும் மாபெரும் மாற்றம்!