பாகிஸ்தானில் நடைபெறும் எஸ்.சி.ஓ. உச்சி மாநாடு... பிரதமர் மோடிக்கு அதிகாரப்பூர்வ அழைப்பு விடுக்க முடிவு!

அடுத்த ஆண்டு பாகிஸ்தான் தலைநகர் இஸ்லாமாபாத்தில் நடைபெறவுள்ள ஷாங்காய் ஒத்துழைப்பு அமைப்பு (SCO) உச்சி மாநாட்டில் பங்கேற்க இந்திய பிரதமர் நரேந்திர மோடிக்கு அதிகாரப்பூர்வமாக அழைப்பு விடுக்கப்படும் என்று பாகிஸ்தான் அறிவித்துள்ளது. இந்த தகவல் இந்தியா–பாகிஸ்தான் உறவுகள் குறித்த அரசியல் வட்டாரங்களில் கவனத்தை ஈர்த்துள்ளது.

ஐரோப்பா மற்றும் ஆசிய நாடுகளுக்கு இடையிலான பாதுகாப்பு, பொருளாதாரம், வர்த்தகம் மற்றும் பிராந்திய ஒத்துழைப்பை மேம்படுத்தும் நோக்கில் 2001-ஆம் ஆண்டு சீனாவின் பீஜிங்கில் ஷாங்காய் ஒத்துழைப்பு அமைப்பு தொடங்கப்பட்டது. தற்போது இந்த அமைப்பில் இந்தியா, சீனா, ரஷ்யா, பாகிஸ்தான், ஈரான் உள்ளிட்ட 10 நாடுகள் உறுப்பினர்களாக உள்ளன.

சுழற்சி முறையின் அடிப்படையில், அடுத்தாண்டுக்கான எஸ்.சி.ஓ. உச்சி மாநாட்டை நடத்தும் பொறுப்பு பாகிஸ்தானுக்கு வழங்கப்பட்டுள்ளது. இதையடுத்து, இஸ்லாமாபாத்தில் நடைபெறவுள்ள மாநாட்டில் பங்கேற்க அனைத்து உறுப்பு நாடுகளின் தலைவர்களுக்கும் அழைப்பு அனுப்புவதற்கான நடவடிக்கைகளை அந்நாட்டு அரசு தொடங்கியுள்ளது.

இதையும் படிங்க: இந்தியாவின் மிகப்பெரிய சர்வதேச விமான நிலையத்தை திறந்து வைத்த பிரதமர் மோடி... ரூ.4,750 கோடி திட்டம் அசத்தல்!

இதுகுறித்து பாகிஸ்தான் வெளியுறவுத்துறை வெளியிட்டுள்ள தகவலில், ஷாங்காய் ஒத்துழைப்பு அமைப்பின் நடைமுறைகளின்படி அனைத்து உறுப்பு நாடுகளுக்கும் அழைப்பு விடுப்பது மாநாட்டை நடத்தும் நாட்டின் பொறுப்பு என்று குறிப்பிடப்பட்டுள்ளது. அதன்படி, உறுப்பு நாடான இந்தியாவின் பிரதமர் நரேந்திர மோடிக்கும் அதிகாரப்பூர்வ அழைப்புக் கடிதம் அனுப்பப்படும் என தெரிவிக்கப்பட்டுள்ளது.

இந்தியா மற்றும் பாகிஸ்தான் இடையே நீண்டகாலமாக அரசியல் மற்றும் பாதுகாப்பு தொடர்பான பதற்றம் நீடித்து வரும் நிலையில், இந்த அழைப்பு முக்கியத்துவம் பெற்றுள்ளது. இருப்பினும், பிரதமர் மோடி மாநாட்டில் நேரடியாக பங்கேற்பாரா அல்லது இந்தியா சார்பில் வேறு உயர்மட்ட பிரதிநிதி அனுப்பப்படுவாரா என்பது குறித்து இதுவரை அதிகாரப்பூர்வ தகவல் வெளியாகவில்லை.

சர்வதேச அளவில் முக்கியத்துவம் வாய்ந்த எஸ்.சி.ஓ. அமைப்பு, பிராந்திய பாதுகாப்பு, பயங்கரவாத எதிர்ப்பு நடவடிக்கைகள், பொருளாதார ஒத்துழைப்பு மற்றும் வர்த்தக வளர்ச்சி தொடர்பான முக்கிய விவாதங்களுக்கு தளமாக இருந்து வருகிறது. எனவே, அடுத்தாண்டு இஸ்லாமாபாத்தில் நடைபெறவுள்ள இந்த மாநாடு சர்வதேச அரசியல் வட்டாரங்களின் கவனத்தை ஈர்த்துள்ளது.

இதையும் படிங்க: டெல்லியில் திடீர் ட்ரோன் தடை! சுதந்திர தின விழாவை முன்னிட்டு பாதுகாப்பு அலர்ட்! அமலானது புதிய கட்டுப்பாடுகள்!