மேற்கு வங்கத் தேர்தல்: 2-ம் கட்ட பரப்புரை இன்றுடன் நிறைவு! நாளை மறுநாள் 142 தொகுதிகளில் வாக்குப்பதிவு!

மேற்கு வங்க மாநிலச் சட்டமன்றத் தேர்தலின் இரண்டாம் மற்றும் இறுதிக்கட்ட வாக்குப்பதிவிற்கான அனல் பறக்கும் தேர்தல் பரப்புரை இன்று (திங்கட்கிழமை) மாலை 6 மணியுடன் நிறைவடைந்தது. நாளை மறுநாள் (ஏப்ரல் 29) நடைபெறவுள்ள இந்த இறுதிக்கட்டப் போரில், 142 தொகுதிகளின் தலைவிதி நிர்ணயிக்கப்பட உள்ளது.

மேற்கு வங்கத்தில் மொத்தம் உள்ள 294 தொகுதிகளுக்கு இரண்டு கட்டங்களாகத் தேர்தல் அறிவிக்கப்பட்டது. இதில் முதற்கட்டமாக 152 தொகுதிகளுக்கு கடந்த ஏப்ரல் 23-ஆம் தேதி வாக்குப்பதிவு விறுவிறுப்பாக நடைபெற்றது. அதனைத் தொடர்ந்து, எஞ்சியுள்ள 142 தொகுதிகளுக்கு நாளை மறுநாள் (புதன்கிழமை) தேர்தல் நடைபெறுகிறது. இன்று மாலை பரப்புரை ஓய்ந்ததைத் தொடர்ந்து, தொகுதிக்குச் சம்பந்தமில்லாத வெளிநபர்கள் வெளியேற உத்தரவிடப்பட்டுள்ளது. மேலும், அடுத்த 48 மணிநேரத்திற்குத் தேர்தல் ஆணையத்தின் 'அமைதி காலம்' (Silence Period) நடைமுறைக்கு வந்துள்ளதால், ஊர்வலங்கள், பொதுக்கூட்டங்கள் மற்றும் ஒலிபெருக்கி மூலம் வாக்கு சேகரிக்கத் தடை விதிக்கப்பட்டுள்ளது.

இந்த இரண்டாம் கட்டத் தேர்தலில் ஹவுரா, ஹூக்ளி மற்றும் தெற்கு 24 பரகணாக்கள் உள்ளிட்ட முக்கிய மாவட்டங்கள் அடங்கியுள்ளன. ஆளும் திரிணாமுல் காங்கிரஸ் தனது கோட்டையைத் தக்கவைக்கவும், பாஜக மாற்றத்தை ஏற்படுத்தவும் தீவிரமாகப் போட்டியிடுகின்றன. முதற்கட்டத் தேர்தலில் மேற்கு வங்கத்தில் சுமார் 92.88% என்ற சாதனை அளவிலான வாக்குப்பதிவு பதிவாகியிருந்தது குறிப்பிடத்தக்கது. தமிழகம் மற்றும் புதுச்சேரியுடன் சேர்த்து, மேற்கு வங்கத் தேர்தலின் முடிவுகளும் வரும் மே 4-ஆம் தேதி அறிவிக்கப்பட உள்ளன. பாதுகாப்புப் பணிகளுக்காக மாநிலம் முழுவதும் ஆயிரக்கணக்கான மத்தியப் பாதுகாப்புப் படையினர் குவிக்கப்பட்டுள்ளனர்.

இதையும் படிங்க: தேசிய அரசியலில் தேஜஸ்வி யாதவ்! கேரளா, தமிழகத்தை தொடர்ந்து மேற்கு வங்கத்திலும் இந்தியா கூட்டணிக்கு ஆதரவு!

இதையும் படிங்க: வரலாற்று சாதனை! தமிழகம், மேற்கு வங்க வாக்காளர்களுக்கு தலைமை தேர்தல் ஆணையர் பாராட்டு!