ஒவ்வொரு மாதத் தொடக்கத்திலும் நிதி, நிர்வாகத் துறைகளில் சில மாற்றங்கள் அமலுக்கு வருவது வழக்கம். 2026 ஜூலை 1-ஆம் தேதி முதல் பொதுமக்களின் அன்றாட வாழ்க்கை, பயணம், சேமிப்பு மற்றும் செலவுத் திட்டங்களை நேரடியாகப் பாதிக்கும் பல முக்கிய மாற்றங்கள் அறிமுகப்படுத்தப்பட உள்ளன. ஆதார் புதுப்பிப்பு, ரயில்வே விதிகள், எரிவாயு விலை உயர்வு உள்ளிட்டவை இதில் அடங்கும். இந்த மாற்றங்கள் சாதாரண குடும்பங்கள் முதல் வணிக நிறுவனங்கள் வரை அனைவரையும் பாதிக்கும் என எதிர்பார்க்கப்படுகிறது.
ரயில்வே துறையில் புதிய கட்டுப்பாடுகள்: இந்திய ரயில்வே நிர்வாகம் பயணிகளின் பாதுகாப்பையும், டிக்கெட் முன்பதிவு செயல்முறையின் நேர்மையையும் உறுதி செய்ய பல அதிரடி நடவடிக்கைகளை எடுத்துள்ளது. தட்கல் டிக்கெட் முன்பதிவுக்கு ஆதார் இணைப்பு கட்டாயமாக்கப்பட்டுள்ளது. ஆன்லைன் அல்லது கவுண்ட்டர் மூலம் தட்கல் டிக்கெட் புக் செய்யும்போது, ஆதாருடன் இணைக்கப்பட்ட மொபைல் எண் அல்லது கணக்கு மூலமாக மட்டுமே முன்பதிவு செய்ய முடியும். இது போலி பதிவுகளையும், கறுப்புச் சந்தையையும் தடுக்க உதவும் என்று ரயில்வே அதிகாரிகள் தெரிவித்துள்ளனர்.
மேலும், வணிக டிக்கெட் ஏஜென்ட்களுக்கு முதல் அரை மணி நேரம் தடை விதிக்கப்பட்டுள்ளது. ஏசி வகுப்புகளுக்கு காலை 10 மணி முதல் 10:30 மணி வரையிலும், சாதாரண வகுப்புகளுக்கு 11 மணி முதல் 11:30 மணி வரையிலும் இந்தத் தடை அமலில் இருக்கும். இதனால் பொதுமக்கள் நேரடியாக டிக்கெட் பெற முடியும். டிக்கெட் இல்லாமல் பயணம் செய்பவர்களுக்கு விதிக்கப்படும் குறைந்தபட்ச அபராதம் ₹250லிருந்து ₹500ஆக உயர்த்தப்பட்டுள்ளது.
இதையும் படிங்க: இனி இவர்களுக்கெல்லாம் ஆதார் கார்டு வழங்கப்படாது..!! அசாம் முதல்வர் அதிரடி முடிவு..!!
‘ஜன் விஸ்வாஸ் சட்டம்’ கீழ் இந்த மாற்றம் கொண்டு வரப்பட்டுள்ளது. மேலும், இருக்கைகள் வீணாவதைத் தடுக்க ஏசி வகுப்புகளில் காத்திருப்போர் பட்டியல் வரம்பு 60 சதவீதமாகவும், சாதாரண ஸ்லீப்பர் வகுப்புகளில் 30 சதவீதமாகவும் உயர்த்தப்பட்டுள்ளது. இந்த நடவடிக்கைகள் ரயில் பயணத்தை மேலும் ஒழுங்குபடுத்தும் என எதிர்பார்க்கப்படுகிறது.
ஆதார் புதுப்பிப்புக்கு இலவச சலுகை முடிவு: இந்திய தனித்துவ அடையாள ஆணையம் (UIDAI) ஆதார் அட்டையில் பெயர், முகவரி, புகைப்படம் உள்ளிட்ட விவரங்களை இலவசமாகப் புதுப்பிக்க வழங்கிய சலுகை ஜூலை 1-ஆம் தேதியுடன் முடிவடைகிறது. அதன் பிறகு ஆன்லைன் அல்லது ஆதார் சேவை மையங்கள் மூலம் புதுப்பிப்பு செய்யும்போது நிலையான கட்டணம் செலுத்த வேண்டும். மின்னஞ்சல் முகவரியைப் புதுப்பிப்பதற்கு தற்போது சிறப்பு சலுகை அறிவிக்கப்பட்டுள்ளது. ஆதார் இணைப்பு பல அரசு சேவைகளுக்கும், வங்கி பரிவர்த்தனைகளுக்கும் அவசியமாக இருப்பதால், பொதுமக்கள் உடனடியாகப் புதுப்பித்துக் கொள்ள அறிவுறுத்தப்படுகின்றனர்.
எரிவாயு சிலிண்டர் விலை மறுஆய்வு: அரசுக்குச் சொந்தமான எண்ணெய் நிறுவனங்கள் (OMCs) ஜூலை 1 அன்று மாதாந்திர விலை மறுஆய்வை மேற்கொள்ள உள்ளன. சர்வதேச சந்தை விலை, டாலர் மதிப்பு உள்ளிட்ட காரணிகளின் அடிப்படையில் 14.2 கிலோ வீட்டு உபயோக சிலிண்டர் மற்றும் 19 கிலோ வணிக சிலிண்டர்களின் புதிய விலை அறிவிக்கப்படும். இது குடும்ப செலவினத்தை நேரடியாகப் பாதிக்கும்.
வங்கி மற்றும் பணப் பரிவர்த்தனை விதிகள்: வெளிநாட்டுச் செலவுகளுக்கு கிரெடிட் கார்டு பயன்படுத்தும்போது, தாராளமயமாக்கப்பட்ட பண அனுப்பும் திட்டம் (LRS) கீழ் கடுமையான வெளிப்படைத்தன்மை விதிகள் அமல்படுத்தப்படுகின்றன. அதிக மதிப்புள்ள பரிவர்த்தனைகள் கண்காணிக்கப்படும்.கடந்த இரண்டு ஆண்டுகளுக்கும் மேலாக பரிவர்த்தனை இல்லாத செயலற்ற (Dormant) வங்கிக் கணக்குகளை மீண்டும் செயல்படுத்த வாடிக்கையாளர்கள் நேரில் சென்று KYC ஆவணங்களைச் சமர்ப்பிக்க வேண்டும்.
வங்கி விடுமுறை நாட்களைக் கருத்தில் கொண்டு முன்கூட்டியே நடவடிக்கை எடுக்கலாம்.இந்த மாற்றங்கள் அனைத்தும் பொதுமக்களின் நிதி ஒழுக்கத்தையும், சேவைகளின் தரத்தையும் மேம்படுத்தும் நோக்கில் கொண்டு வரப்பட்டுள்ளன. எனவே, பாதிக்கப்படும் மக்கள் உடனடியாக தேவையான நடவடிக்கைகளை மேற்கொள்ளுமாறு அதிகாரிகள் கேட்டுக் கொண்டுள்ளனர்.
இதையும் படிங்க: இனி இவர்களுக்கெல்லாம் ஆதார் கார்டு வழங்கப்படாது..!! அசாம் முதல்வர் அதிரடி முடிவு..!!