தமிழ்நாட்டில் முதலமைச்சர்ச. ஜோசப் விஜய் தலைமையிலான தவெக அரசு பொறுப்பேற்ற இந்த 120 நாட்களில் சட்டம் ஒழுங்கு முழுமையாகச் சீர்குலைந்துவிட்டதாகவும், மாநிலத்தில் நாள்தோறும் படுகொலைகள், கொள்ளைகள், கஞ்சா புழக்கம் மற்றும் பாலியல் வன்கொடுமைச் சம்பவங்கள் அச்சமின்றி அரங்கேறி வருவதோடு, காவல்துறை மீது குற்றவாளிகளுக்கு எவ்விதப் பயமும் இல்லாத நிர்வாகச் சீரழிவு நிலை ஏற்பட்டுள்ளதாகவும், எட்டு வயது பிஞ்சுக் குழந்தைகள் முதல் எண்பது வயது மூதாட்டிகள் வரை பெண்களுக்குத் துளியும் பாதுகாப்பற்ற சூழல் நிலவுவதாகவும் தமிழக வாழ்வுரிமைக் கட்சியின் (தவாக) தலைவரும் சட்டமன்ற உறுப்பினருமான  தி. வேல்முருகன் மிகக் காரசாரமாகக் குற்றம்சாட்டியுள்ளார்.

சேலத்தில் இன்று செய்தியாளர்களைச் சந்தித்த தமிழக வாழ்வுரிமைக் கட்சி தலைவர் வேல்முருகன், ஆளும்கட்சியான தவெக அரசின் செயல்பாடுகளையும் மாநகராட்சி நிர்வாகங்களின் போக்கையும் மிகக் கடுமையாகத் தோலுரித்துப் பேசினார். சேலம் மாநகராட்சியின் குடிநீர் விநியோக விவகாரம் குறித்துக் குரல் எழுப்பிய அவர், "சேலம் மாநகராட்சியில் தனி குடிநீர் திட்டம் என்ற பெயரில் ஏழை, எளிய நடுத்தர மக்களின் வீடுகளில் மீட்டர்கள் பொருத்தி வரி வசூலிக்கும் பணியைத் தனியார் நிறுவனங்களுக்குத் தாரைவார்க்கும் விபரீத ஒப்பந்தத்தை மாநகராட்சி ஆணையர் முன்னெடுத்து வருகிறார். கடந்த காலத்தில் திமுக அரசு செய்த அதே மக்கள் விரோதத் தவறுகளை, இன்று ஆட்சிக்கு வந்துள்ள தவெக அரசும் கண்ணை மூடிக்கொண்டு செயல்படுத்தத் துடிக்கிறது. மக்களின் அத்தியாவசியத் தேவையான குடிநீரை வணிகமயமாக்கும் இந்த ஒப்பந்தத்தை அரசு உடனடியாக ரத்து செய்ய வேண்டும்" என்று போர்க்கொடி தூக்கினார்.

தொடர்ந்து தமிழகத்தின் சட்டம் ஒழுங்கு சீர்கேடுகள் குறித்து ஆவேசமாகப் பேசிய வேல்முருகன், "விலைமதிப்பற்ற மனித உயிர்கள் நடுரோட்டில் ஆடுகளைப் போலச் சர்வ சாதாரணமாக வெட்டிப் படுகொலை செய்யப்படுகின்றன. ஏற்கனவே முகமூடி அணிந்த ஒரு பெரும் தொழிலதிபர் பிஞ்சுக் குழந்தைகளைச் சிதைத்த விவகாரத்தில், செல்வாக்கு மிக்க அதிகாரிகளே அவரைக் காப்பாற்றத் துடித்த அவலம் அரங்கேறியது. விடுதி மாணவர்களைக் குறிவைத்து கஞ்சா உள்ளிட்ட போதைப் பொருட்களை விற்கும் சமூக விரோதிகளிடம் லஞ்சம் பெற்றுக்கொண்டு கண்டும் காணாமலும் இருக்கும் கருப்பு ஆடுகள் காவல்துறையிலேயே உள்ளனர். இந்த 120 நாட்களில் கொலை, குற்றங்களைக் கட்டுப்படுத்த முதலமைச்சர் விஜய் என்ன உருப்படியான நடவடிக்கை எடுத்தார்?. நடவடிக்கை எடுத்திருந்தால் ஏன் நாள்தோறும் கொலைகளும் பாலியல் அநீதிகளும் தொடர்கின்றன?" என்று அடுக்கடுக்கான கேள்விகளை எழுப்பினார்.

இதையும் படிங்க: அறிவிக்கப்படாத மின்வெட்டால் 50,000 சிறு குறு தொழில்கள் முடக்கம்: சிபிஐ வீரபாண்டியன் எச்சரிக்கை!  

மேலும், மாநிலத்தில் நிலவும் கடுமையான மின்வெட்டுப் பிரச்சனை மற்றும் அரசியல் அவதூறுகள் குறித்துப் பேசிய அவர், "கிராமப்புறங்களிலும் நகரங்களிலும் தினமும் 10 மணி நேரம் முதல் 12 மணி நேரம் வரை தொடர் மின்தடை ஏற்படுகிறது. இதைக் கேட்டால் காற்று வீசவில்லை, மழை பெய்யவில்லை, சூரியன் உதிக்கவில்லை, அதனால் காற்றாலை மற்றும் சூரிய மின் உற்பத்தி பாதிக்கப்பட்டுவிட்டது என்று அரசு நிர்வாகம் மிகவும் அநாகரிகமான முறையில் பதிலளிப்பது வெட்கக்கேடானது. 24 மணி நேரமும் தடையற்ற மின்சாரம் வழங்க மாற்று ஏற்பாடுகளைச் செய்ய தவெக அரசு முற்றிலுமாகத் தவறிவிட்டது. அதேபோன்று, உதயநிதி ஸ்டாலினோ அல்லது மு.க. ஸ்டாலினோ எப்போதுமே முதல்வர் விஜய்யின் தாயாரைப் பற்றித் தரம் தாழ்ந்து பேசியதே கிடையாது; பத்திரிகையாளர்களிடம் கூட அப்படி ஒரு வார்த்தை சொன்னதில்லை. ஆனால், முதலமைச்சர் விஜய் தேர்தல் அரசியலுக்காகவும் வாக்குகளை அறுவடை செய்வதற்காகவும் அத்தகைய அவதூறுப் பிரச்சாரங்களை முன்னெடுத்து வருகிறார்" என்று காட்டமாகத் தெரிவித்தார்.

இதையும் படிங்க: புதிய நீதிமன்றங்கள் அமைப்பது குறித்து 2 வாரங்களில் அறிக்கை: அரசுக்கு ஐகோர்ட் உத்தரவு!