தமிழ்நாடு சட்டப்பேரவையின் நடப்புக் கூட்டத்தொடர் நிறைவு பெற்றுள்ள நிலையில், கடந்த 28 நாட்கள் நடைபெற்ற சபை நடவடிக்கைகளை 32,000-க்கும் மேற்பட்ட பார்வையாளர்கள் நேரில் அமர்ந்து பார்வையிட்டுப் புதிய வரலாற்றுச் சாதனை படைத்துள்ளதாகவும், இதில் குறிப்பாகத் தமிழ்நாட்டின் இளைஞர்கள் மற்றும் கல்லூரி மாணவர்களின் எண்ணிக்கை மிக அதிகமாக உள்ளதாகவும் தமிழ்நாடு சட்டப்பேரவைத் தலைவர் (சபாநாயகர்) பிரபாகர் பெருமிதத்துடன் தெரிவித்துள்ளார்.

தமிழக சட்டப்பேரவையின் பட்ஜெட் கூட்டத்தொடர் மற்றும் துறை வாரியான மானியக் கோரிக்கைகள் மீதான காரசார விவாதங்கள் தொடர்ந்து 28 நாட்கள் விறுவிறுப்பாக நடைபெற்று இன்றுடன் நிறைவடைந்தது. கூட்டத்தொடரின் நிறைவு நாளில் செய்தியாளர்களைச் சந்தித்த சபாநாயகர் பிரபாகர், அவையின் செயல்பாடுகள் மற்றும் பொதுமக்களின் வருகை குறித்த அதிகாரப்பூர்வப் புள்ளிவிவரங்களை வெளியிட்டு விளக்கம் அளித்தார்.

அப்போது பேசிய சபாநாயகர் பிரபாகர், "ஜனநாயகத்தின் முதன்மைத் தூணாக விளங்கும் சட்டமன்ற நடவடிக்கைகளைப் பொதுமக்கள் நேரடியாகக் கண்டுகளிக்கும் வகையில் பார்வையாளர் மாடங்கள் தொடர்ந்து சீரமைக்கப்பட்டு வருகின்றன. இந்த நடப்புக் கூட்டத்தொடர் நடைபெற்ற 28 நாட்களில் மட்டும், சுமார் 32,000-க்கும் அதிகமானோர் நேரில் வருகை தந்து சபை நிகழ்வுகளை மிகுந்த ஆர்வத்துடன் பார்வையிட்டுள்ளனர். குறிப்பாக, தமிழகத்தின் எதிர்காலத் தூண்களான கல்லூரி மாணவ, மாணவிகள் மற்றும் இளைஞர்கள் பெருமளவில் வந்து ஜனநாயக விவாதங்களைக் கூர்ந்து கவனித்தது இந்த கூட்டத்தொடரின் மிகப்பெரிய சிறப்பம்சமாகும்" என்று குறிப்பிட்டார்.

இதையும் படிங்க: தமிழகத்தில் பூரண மதுவிலக்கு..? கள் இறக்க அனுமதிக்கலாம்... நீதிபதி கோகுல்தாஸ் ஆணையத்தின் முக்கிய பரிந்துரை!

தொடர்ந்து கடந்த கால புள்ளிவிவரங்களைச் சுட்டிக்காட்டிய அவர், "கடந்த 2021 முதல் 2025 வரையிலான முந்தைய திமுக ஆட்சிக் காலங்களில், ஆண்டு முழுவதும் நடைபெற்ற ஒட்டுமொத்த சட்டமன்றக் கூட்டத்தொடர்களையும் சேர்த்து ஒரு முழு ஆண்டுக்கே சுமார் 20,000 பேர் மட்டுமே நேரில் பார்வையிட வந்திருந்தனர். ஆனால், தற்போதைய ஆட்சிப் பொறுப்பில் ஒரே கூட்டத்தொடரின் 28 நாட்களில் மட்டும் 32 ஆயிரத்திற்கும் மேற்பட்டோர் வருகை தந்திருப்பது சட்டமன்றத்தின் மீதும், அரசின் நடவடிக்கைகள் மீதும் பொதுமக்கள் கொண்டுள்ள அளப்பரிய ஆர்வத்தையும் விழிப்புணர்வையும் அப்பட்டமாகக் காட்டுகிறது" என்று தெரிவித்தார். பார்வையாளர்களின் இந்த அபரிமிதமான வருகை சட்டப்பேரவை வரலாற்றில் புதிய மைல்கல்லாகப் பார்க்கப்படுகிறது.

இதையும் படிங்க: 5 தொகுதிகளுக்கு இடைத் தேர்தல் தடை நீட்டிப்பு..! நெருங்கியது இறுதி விசாரணை... பெரும் எதிர்பார்ப்பு..!!