பாகிஸ்தானுக்கும் ஆப்கானிஸ்தானின் தாலிபன் ஆட்சிக்கும் இடையே நீண்டகாலமாக நிலவி வரும் எல்லை மோதல்கள் தற்போது முழுமையான போராக மாறியுள்ளன. கடந்த சில மாதங்களாகவே இரு நாடுகளும் அவ்வப்போது தாக்குதல்களை நடத்தி வந்த நிலையில், இப்போது அது கடுமையான இராணுவ மோதலாக வெடித்துள்ளது.

பாகிஸ்தான் பாதுகாப்பு அமைச்சர் கவாஜா முகமது ஆசிப், "எங்கள் பொறுமை தீர்ந்துவிட்டது. இப்போது உங்களுடன் (ஆப்கானிஸ்தானுடன்) திறந்த போர் (open war)" என்று அதிகாரப்பூர்வமாக அறிவித்துள்ளார். இதற்கு முன்னதாக, ஆப்கானிஸ்தானின் தாலிபன் படைகள் பாகிஸ்தானின் எல்லைப் பகுதிகளில் உள்ள ராணுவ முகாம்கள் மீது பெரிய அளவிலான தாக்குதலைத் தொடங்கியதாகவும், பதிலடியாக பாகிஸ்தான் வான் வழி தாக்குதல்களை நடத்தியதாகவும் தகவல்கள் வெளியாகியுள்ளன.

பாகிஸ்தான் விமானப்படை காபுல் (தலைநகர்), கந்தஹார் மற்றும் பக்தியா மாகாணங்கள் உள்ளிட்ட முக்கிய இடங்களை குறிவைத்து வான் தாக்குதல்களை மேற்கொண்டுள்ளது. இதை 'ஆபரேஷன் கஜப் லில் ஹக்' (Operation Ghazab Lil Haqq - Righteous Fury) என்று பெயரிட்டு, தாலிபன் ராணுவ இலக்குகள், தளவாடங்கள் மற்றும் தலைமையகங்களை அழித்ததாக பாகிஸ்தான் அரசு தெரிவித்துள்ளது. இதனால் காபுல் மற்றும் கந்தஹாரில் வெடிப்பொலிகள் கேட்டதாக உள்ளூர் செய்தியாளர்கள் தெரிவித்துள்ளனர்.

இதையும் படிங்க: ஆபரேஷன் சிந்தூரை விட விளைவுகள் கொடூரமானதாக இருக்கும்! மேற்கு பிராந்திய கமாண்டர் மனோஜ் குமார் அதிரடி!

மறுபுறம், ஆப்கானிஸ்தான் தாலிபன் அரசு இதை மறுத்து, பாகிஸ்தானின் எல்லைப் பகுதிகளில் உள்ள 19க்கும் மேற்பட்ட ராணுவ சோதனைச் சாவடிகளையும் இரண்டு முகாம்களையும் அழித்ததாகவும், 55க்கும் மேற்பட்ட பாகிஸ்தான் வீரர்களை கொன்றதாகவும், சிலரை கைப்பற்றியதாகவும் கூறியுள்ளது. தங்கள் இழப்பு 8 கொல்லப்பட்டவர்கள் மற்றும் 11 காயமடைந்தவர்கள் என்று அவர்கள் தெரிவித்துள்ளனர். இரு தரப்பும் வெவ்வேறு இழப்பு எண்ணிக்கைகளை வெளியிட்டு வருவதால், சரியான நிலை தெளிவாகத் தெரியவில்லை. 

இந்த மோதலின் பின்னணியில், பாகிஸ்தானில் நடக்கும் பயங்கரவாத தாக்குதல்களுக்கு தாலிபன் ஆட்சியின் கீழ் ஆப்கானிஸ்தானில் இருந்து தஞ்சம் புகுந்துள்ள டெஹ்ரீக்-இ-தாலிபான் பாகிஸ்தான் (TTP) போன்ற குழுக்களே காரணம் என்று இஸ்லாமாபாத் குற்றம்சாட்டி வருகிறது. தாலிபன்கள் இதை மறுத்து வரும் நிலையில், கடந்த பிப்ரவரி 22ஆம் தேதி பாகிஸ்தான் நடத்திய வான் தாக்குதல்களுக்குப் பதிலடியாகவே இப்போதைய தாக்குதல்கள் தொடங்கியுள்ளன.

இரு நாடுகளுக்கும் இடையேயான டுரண்ட் லைன் எல்லை (Durand Line) நீண்டகால சர்ச்சைக்குரியது. இதனால் எல்லைப் பகுதிகளான கைபர் பக்துன்க்வா, நங்கர்ஹார், பக்தியா போன்ற இடங்களில் தொடர்ந்து மோதல்கள் நிகழ்ந்து வருகின்றன. அப்பாவி மக்கள் பலர் கொல்லப்பட்டு, காயமடைந்து வருவதால் மனிதாபிமான நெருக்கடி ஏற்பட்டுள்ளது. சர்வதேச அளவில் இந்தப் போர் பெரும் பதற்றத்தை ஏற்படுத்தியுள்ளது.

ரஷ்யா மற்றும் ஈரான் உள்ளிட்ட நாடுகள் உடனடியாக போரை நிறுத்தி சமாதானப் பேச்சுவார்த்தை நடத்த வேண்டும் என்று வலியுறுத்தியுள்ளன. குறிப்பாக ரஷ்யா மத்தியஸ்தம் செய்ய தயாராக இருப்பதாக அறிவித்துள்ளது. முன்னாள் ஆப்கான் அதிபர் ஹமீது கர்சாய் உள்ளிட்டோர் "நாட்டைப் பாதுகாக்க எந்த எல்லைக்கும் செல்வோம்" என்று கடுமையான அறிக்கை வெளியிட்டுள்ளனர். இரு நாடுகளும் மேலும் தாக்குதல்களைத் தொடர்ந்தால், பிராந்திய ஸ்திரத்தன்மைக்கு பெரும் அச்சுறுத்தல் ஏற்படும் என்ற அச்சம் நிலவுகிறது.

இதையும் படிங்க: ரவி நீரை நிறுத்தப்போகும் இந்தியா..!! தண்ணீரின்றி தவிக்கும் பாகிஸ்தான்..!! ஆட்டம் ஆரம்பம்..!!