பெரு நாட்டின் புகழ்பெற்ற நாஸ்கா கோடுகளை வானில் இருந்து பார்வையிட சுற்றுலாப் பயணிகளை ஏற்றிச் சென்ற சிறிய விமானம் திடீரென வயல்வெளியில் விழுந்து நொறுங்கியதில் 13 பேர் உயிரிழந்த சம்பவம் உலகம் முழுவதும் அதிர்ச்சியை ஏற்படுத்தியுள்ளது. இந்த கோர விபத்தில் விமானத்தில் இருந்த அனைத்து பயணிகளும் மற்றும் பணியாளர்களும் உயிரிழந்ததாக அதிகாரிகள் உறுதிப்படுத்தியுள்ளனர்.

நாஸ்கா நகருக்கு அருகே நடைபெற்ற இந்த விபத்து குறித்து அந்நாட்டு அதிகாரிகள் வெளியிட்ட தகவலின்படி, விபத்துக்குள்ளான விமானம் நாஸ்கா கோடுகளை வானில் இருந்து பார்வையிடும் சிறப்பு சுற்றுலா சேவையில் ஈடுபட்டிருந்தது.

நாஸ்கா கோடுகள் என்பது பல நூற்றாண்டுகளுக்கு முன்பு பெருவின் பழங்குடியினரால் பாலைவனப் பகுதியில் உருவாக்கப்பட்ட மிகப்பெரிய புவிக்கோட்டு வடிவங்களாகும். விலங்குகள் மற்றும் பல்வேறு உருவங்களை ஒத்திருக்கும் இந்த பிரம்மாண்ட கோடுகளை முழுமையாக ரசிக்க விமானம் அல்லது உயரமான கண்காணிப்பு கோபுரங்களில் இருந்தே பார்க்க முடியும் என்பதால், உலகம் முழுவதும் இருந்து ஏராளமான சுற்றுலாப் பயணிகள் அங்கு வருகை தருகின்றனர்.

இதையும் படிங்க: மம்தா அனுபவத்தால் அதிரடி முடிவு எடுத்த மாயாவதி... ஆகாஷ் ஆனந்துக்கு புதிய கட்டுப்பாடு; உ.பி. தேர்தலுக்கு முன் பரபரப்பு!

இந்த நிலையில், இகா நகரில் இருந்து புறப்பட்ட சுற்றுலா விமானம் நாஸ்கா கோடுகளை சுற்றிக் காண்பிக்கும் பயணத்தின் போது திடீரென கட்டுப்பாட்டை இழந்து வயல்வெளியில் விழுந்ததாக கூறப்படுகிறது. விபத்து ஏற்பட்டவுடன் மீட்புக் குழுவினர் சம்பவ இடத்திற்கு விரைந்து சென்றாலும், விமானத்தில் இருந்த 13 பேரையும் உயிருடன் மீட்க முடியவில்லை.

பெரு நாட்டின் வர்த்தக மற்றும் சுற்றுலா அமைச்சகம் வெளியிட்ட தகவலின்படி, உயிரிழந்தவர்களில் ஜெர்மனியைச் சேர்ந்த இரண்டு பேர், ஸ்பெயினைச் சேர்ந்த இரண்டு பேர், இத்தாலியைச் சேர்ந்த ஏழு சுற்றுலாப் பயணிகள் மற்றும் இரண்டு விமானப் பணியாளர்கள் அடங்கியுள்ளனர்.

இதற்கிடையில், விமான சேவை நிறுவனம் வெளியிட்ட அறிக்கையில், கடந்த 14 ஆண்டுகளாக செஸ்னா கிராண்ட் கேரவன் வகை விமானங்கள் மூலம் நாஸ்கா கோடுகளை பார்வையிடும் சுற்றுலா சேவையை பாதுகாப்பாக வழங்கி வருவதாக தெரிவித்துள்ளது. இந்த துயர விபத்துக்கான காரணம் என்ன என்பது குறித்து பெரு விமானப் பாதுகாப்பு அதிகாரிகள் தீவிர விசாரணை மேற்கொண்டு வருகின்றனர்.

இதையும் படிங்க: பாராளுமன்றத்தில் அடுத்த வாரம் அதிரடி... தொகுதி மறுவரையறை மசோதா அறிமுகம்? நாடு முழுவதும் எதிர்பார்ப்பு!