தருமபுரி மாவட்டம் ஒகேனக்கல்லில் தேமுதிக பொதுச் செயலாளர் பிரேமலதா விஜயகாந்த் தலைமையில் கர்நாடகாவின் மேகதாது அணைத் திட்டத்திற்கும், காவிரி நீர் திறப்பை மறுக்கும் அணுகுமுறைக்கும் எதிராக கண்டன ஆர்ப்பாட்டம் நடைபெற்றது. இளைஞர் அணித் தலைவர் விஜய் பிரபாகரன், எல்.கே. சுதீஷ் மற்றும் கூட்டணிக் கட்சியான திமுக முன்னாள் அமைச்சர் பழனியப்பன் உள்ளிட்ட நிர்வாகிகள் கலந்துகொண்டனர்.

ஆர்ப்பாட்டத்தில் பேசிய விஜய் பிரபாகரன், தமிழக முதல்வர் சி. ஜோசப் விஜய் காவிரி நீரைப் பெற உடனடி நடவடிக்கை எடுக்க வேண்டும் என வலியுறுத்தினார். “காவிரி தண்ணீர் கிடைக்க கர்நாடக மாநிலத்தை நோக்கி ஓட வேண்டும். ஓடு ஓடு ஓடு ஓடுனு ஓடணும்! நீங்கள்தான் வேட்டைக்காரனாச்சே” எனக் குறிப்பிட்ட அவர், விஜயகாந்த்தின் பாடல்களையும் நினைவுகூர்ந்தார். 

உண்மையான வேட்டைக்காரன் வீரப்பன் மட்டுமே என்றும், அவரது காலத்தில் தமிழகத்திற்கு நீர் மறுக்கப்படவில்லை என்றும் கூறினார். வீரப்பனை நல்லவராக சித்தரித்தவர் விஜயகாந்த் என்பதையும் சுட்டிக்காட்டினார். கர்நாடக மொழியில் “ஈ சாலக்காவேரி உந்து இல்லா, ஈ சாலக்காவேரி எந்து இல்லா… ஈ சாலக்காவேரி நம்து” எனப் பேசிய அவர், இரு மாநில அரசுகளும் சுமூகமாகப் பிரச்சினையைத் தீர்க்க வேண்டும் எனக் கோரினார். 

இதையும் படிங்க: பிரதமரிடம் பேசாதது ஏன்? மேகதாது தீர்மானம் என்ன ஆச்சு? மு.க.ஸ்டாலின் எழுப்பிய 6 கேள்விகள்!

திமுக ஆட்சியை ‘போட்டோஷூட் ஆட்சி’ என விமர்சித்தோர் இன்று முதல்வர் விஜய்யின் செயலற்ற தன்மையைக் கேள்வி எழுப்புகின்றனர் எனச் சாடினார். ஒகேனக்கல்லுக்கு வந்து விவசாயிகளைச் சந்திக்காததைக் குறை கூறினார். ஐபிஎல் வெற்றிக்குப் பிறகு விராட் கோலியை அழைத்த கர்நாடக முதல்வர், தற்போது டி.கே. சிவக்குமார் மூலம் ‘நிலைமை மோசம்’ எனத் தடுப்பதாகக் குற்றம்சாட்டினார். நீட் தேர்வுக்கு எதிரான போராட்டங்களைக் காட்டிலும் காவிரி பிரச்சினையே முன்னுரிமை எனக் கூறிய அவர், தமிழக மக்களை ஏமாற்ற முடியாது என எச்சரித்தார்.

விஜயகாந்த் மக்களுக்காக வாழ்க்கையை அர்ப்பணித்த தலைவர் எனப் புகழ்ந்தார். காவிரி நதிநீர் பங்கீடு நூற்றாண்டுக்காலப் பிரச்சினையாகும். 2007 நடுவர் மன்றத் தீர்ப்பும் 2018 உச்சநீதிமன்றத் திருத்தமும் தமிழகத்திற்கு ஆண்டுக்கு சுமார் 404 டிஎம்சி நீரையும், கர்நாடகாவிற்கு 284 டிஎம்சி நீரையும் ஒதுக்கின. மேகதாது சமநிலை நீர்த்தேக்கம் பெங்களூருக்குக் குடிநீர் வழங்கவும் 400 மெகாவாட் மின்சாரம் உற்பத்தி செய்யவும் முன்மொழியப்பட்டாலும், கீழ்நிலைப் பாய்ச்சலைப் பாதிக்கும் எனத் தமிழகம் எதிர்க்கிறது. 

உச்சநீதிமன்றம் திட்ட அறிக்கையை ஆய்வு செய்ய அனுமதித்த போதிலும், காவிரி மேலாண்மை ஆணையம் வழிகாட்டுதல்களைக் கடைப்பிடிக்க வேண்டும். ஆர்ப்பாட்டக்காரர்கள் உடனடி நீர்வெளியீட்டையும், விவசாயிகளின் நலனையும் வலியுறுத்தினர். 

இதையும் படிங்க: நெசவாளர்களுக்கு குட் நியூஸ்... பொங்கல் வேட்டி திட்டத்தில் முதல் முறையாக மாற்றம்..! அமைச்சர் விஜய் பாலாஜி பேட்டி..!!