புதுடெல்லி: பிரதமர் நரேந்திர மோடியின் 76-வது பிறந்தநாளையொட்டி தொடங்கப்பட்ட ‘சேவா யாத்ரா’ இருசக்கர வாகனப் பேரணி தற்போது பல்வேறு மாநிலங்கள் வழியாக பயணித்து வருகிறது. மோடியின் 25 ஆண்டுகால பொதுவாழ்க்கையை முன்னிறுத்தும் வகையில் ஏற்பாடு செய்யப்பட்டுள்ள இந்தப் பேரணி, குஜராத்தின் வாத்நகரையும் உத்தரப் பிரதேசத்தின் வாரணாசியையும் இணைக்கிறது.

கடந்த செப்டம்பர் 17-ம் தேதி ஒரே நேரத்தில் இரு திசைகளிலும் இந்தப் பயணம் தொடங்கப்பட்டது. வாத்நகரில் இருந்து வாரணாசி நோக்கியும், வாரணாசியில் இருந்து வாத்நகர் நோக்கியும் இருசக்கர வாகனக் குழுக்கள் புறப்பட்டன. இந்தப் பயணம் அக்டோபர் 7-ம் தேதி நிறைவடைய திட்டமிடப்பட்டுள்ளது. மொத்தமாக 10 குழுக்கள் பல்வேறு பகுதிகள் வழியாக பயணம் மேற்கொண்டு வருகின்றன.

வாத்நகர் பிரதமர் மோடியின் பிறந்த ஊராகவும், வாரணாசி அவர் மக்களவை உறுப்பினராக இருக்கும் தொகுதியாகவும் இருப்பதால், இரு நகரங்களையும் இணைக்கும் வகையில் இந்தப் பயணம் ஏற்பாடு செய்யப்பட்டுள்ளது. நகரங்கள் மட்டுமின்றி மாவட்டங்கள், வட்டங்கள் மற்றும் கிராமங்கள் வழியாகவும் பேரணி செல்கிறது. வழியெங்கும் பொதுமக்களை சந்திப்பது, இளைஞர்களுடன் கலந்துரையாடுவது, அரசு நலத்திட்டப் பயனாளிகளை சந்திப்பது உள்ளிட்ட நிகழ்ச்சிகளும் நடத்தப்படுகின்றன.

இதையும் படிங்க: மோடிக்காக காத்திருக்கும் மார்க் கார்னி! இந்தியா–கனடா உறவில் திடீர் திருப்பம்? பின்னணியில் நடக்கும் முக்கிய பேச்சுவார்த்தை!

மேலும், தூய்மை பணிகள், பள்ளிகள், மருத்துவமனைகள் மற்றும் முதியோர் பராமரிப்பு மையங்கள் உள்ளிட்ட இடங்களில் சேவை சார்ந்த நடவடிக்கைகளிலும் பங்கேற்பாளர்கள் ஈடுபட்டு வருவதாக தெரிவிக்கப்பட்டுள்ளது. இதனால், இந்தப் பயணம் வெறும் இருசக்கர வாகனப் பேரணியாக மட்டுமின்றி, மக்கள் தொடர்பு மற்றும் சமூக சேவை நடவடிக்கைகளையும் உள்ளடக்கியதாக அமைந்துள்ளது.

இந்த நிலையில், பேரணியில் பங்கேற்று வரும் ‘சேவா யாத்ரிகள்’ உடன் பிரதமர் மோடி காணொலி காட்சி வாயிலாக உரையாடினார். பயணத்தின் அனுபவங்கள், பொதுமக்களுடனான சந்திப்புகள் மற்றும் களத்தில் கிடைத்த புதிய தகவல்கள் குறித்து அவர் பங்கேற்பாளர்களிடம் கேட்டறிந்தார்.

அப்போது பேசிய பிரதமர் மோடி, கடந்த 12 ஆண்டுகளில் இந்தியாவில் நகரங்களுக்கும் கிராமங்களுக்கும் இடையிலான இடைவெளி குறைந்துள்ளதாகவும், கிராமப்புறங்களில் உள்கட்டமைப்பு வசதிகள் மேம்பட்டுள்ளதாகவும் தெரிவித்தார். மேலும், வெறும் வாக்கு வங்கி அரசியலை நோக்கமாகக் கொள்ளாமல், சமூகத்தில் தொடர்ச்சியான சீர்திருத்தங்களையும் ஆக்கப்பூர்வமான மாற்றங்களையும் ஏற்படுத்தும் வகையில் உழைக்க வேண்டும் என்றும் அவர் கூறினார்.

அக்டோபர் 7-ம் தேதி பயணம் நிறைவடைய உள்ள நிலையில், இந்தப் பேரணியின் அடுத்தகட்ட நிகழ்ச்சிகள் தொடர்ந்து நடைபெற உள்ளன.

இதையும் படிங்க: 8 ஆண்டுகள்... 60 கோடி பேர்! ரூ.5 லட்சம் இலவச மருத்துவக் காப்பீடு! ஆயுஷ்மான் பாரத் குறித்து பிரதமர் மோடி பெருமிதம்!