தமிழக சட்டசபைத் தேர்தல் நெருங்கி வரும் நிலையில், அதிமுக கூட்டணியில் புதிய திருப்பம் ஏற்பட்டுள்ளது. பாமக ராமதாஸ் தரப்பு எம்எல்ஏ அருள், அதிமுக பொதுச்செயலாளர் எடப்பாடி பழனிசாமியை சந்தித்து பேச்சு நடத்தியுள்ளார். இந்த சந்திப்பு ராமதாஸ் தரப்பு பாமகவை அதிமுக - பாஜக கூட்டணியில் இணைக்கும் முயற்சியா என்ற கேள்வியை எழுப்பியுள்ளது.

ஏற்கனவே அன்புமணி ராமதாஸ் தரப்பு பாமகவை எதிர்த்து அதிமுக கூட்டணியில் இணைந்து தொகுதி பங்கீட்டையும் முடித்துவிட்டது. அன்புமணி தரப்பு இணைந்த பிறகே எடப்பாடி பழனிசாமி டெல்லி சென்று அமித்ஷாவை சந்தித்தார். இந்நிலையில் ராமதாஸ் தரப்பு பாமகவை சமாதானப்படுத்த பாஜக பேச்சுவார்த்தை நடத்தியது. 

ஆனால் திமுக சில சீனியர் அமைச்சர்கள் ராமதாஸ் தரப்புடன் தொடர்பு கொண்டனர். திருமாவளவன் விசிக இணைந்தால் ராமதாஸ் தரப்பு பாமகவை திமுக கூட்டணியில் சேர்க்க மாட்டோம் என்று வெளிப்படையாக அறிவித்தார். இதனால் திமுக ராமதாஸ் தரப்பை கூட்டணியில் சேர்க்க ஆர்வம் காட்டவில்லை. தனியாக போட்டியிட வைத்து வன்னிய வாக்குகளை பிரிக்க திட்டமிட்டது.

இதையும் படிங்க: 3 வாரம்தான் டைம்!! ராமதாஸ் தொடர்ந்த வழக்கு! தேர்தல் ஆணையம் பதில் தர உத்தரவு

அன்புமணியும் ராமதாஸ் தரப்பை என்டிஏ கூட்டணியில் சேர்க்கக் கூடாது என பிடிவாதமாக இருந்தார். இதனால் அதிமுக ராமதாஸ் அணியுடன் நேரடி பேச்சு நடத்தவில்லை. ராமதாஸ் தரப்புக்கு தனியாக நிற்பது அல்லது தவெகவுடன் செல்வது என்ற இரு வழிகளே இருந்தன. இந்நிலையில் தான் பாமக ஆதரவு எம்எல்ஏ அருள் எடப்பாடி பழனிசாமியை சந்தித்துள்ளார். இந்த சந்திப்பு ரகசியமாக நடந்ததாக தகவல்கள் தெரிவிக்கின்றன.

சேலம், தர்மபுரி, கோவை, திருப்பூர், கிருஷ்ணகிரி உள்ளிட்ட வன்னியர் ஆதிக்க மாவட்டங்களில் பெருவாரியான வாக்குகள் உள்ளன. ராமதாஸ் தரப்பு பாமகவை கூட்டணியில் இணைத்தால் வன்னிய வாக்குகள் பெருமளவு அதிமுக பக்கம் திரும்பும். அன்புமணி தரப்பு இணைந்தாலும் ராமதாஸ் தரப்பு இணைந்தால் அதிமுகவுக்கு கூடுதல் பலம் கிடைக்கும். இதனால் எடப்பாடி பழனிசாமி ராமதாஸ் அணியை சமாதானப்படுத்த முயற்சி செய்கிறாரா என்ற கேள்வி எழுந்துள்ளது.

இந்த சந்திப்பு அதிமுக - பாஜக கூட்டணியை மேலும் வலுப்படுத்தும் முயற்சியாக பார்க்கப்படுகிறது. தேர்தல் நெருங்கும் வேளையில் கூட்டணி விரிவாக்கம் தீவிரமடைந்துள்ளது. ராமதாஸ் தரப்பு என்ன முடிவெடுக்கும் என்பது அடுத்த சில நாட்களில் தெரியவரும். தமிழக அரசியலில் இது பெரும் தாக்கத்தை ஏற்படுத்தும் என எதிர்பார்க்கப்படுகிறது.

இதையும் படிங்க: கணக்கு போட்டு காத்திருக்கும் விஜய்!! தைலாபுரம் - தேமுதிக நிலைப்பாடு என்ன? ராமதாஸ் - பிரேமலதா யாருடன் கூட்டணி?