ஜப்பான் நாட்டின் நகோயா நகரில் நடைபெற்று வரும் பாரா ஆசிய விளையாட்டுப் போட்டிகளில் (Asian Para Games 2026), பாரா பேட்மிண்டன் பிரிவில் 1 தங்கம் மற்றும் 2 வெள்ளிப் பதக்கங்கள் என மொத்தம் 3 பதக்கங்களை வாரிக் குவித்துத் தாய்நாட்டிற்கும் தமிழ்நாட்டிற்கும் வரலாற்றுப் பெருமை தேடித்தந்துள்ள தமிழக வீராங்கனை துளசிமதி முருகேசனை நேரில் வாழ்த்தியுள்ள தமிழ்நாடு முதலமைச்சர் ஜோசப் விஜய், அவருக்குத் தமிழ்நாடு அரசின் சார்பில் ரூபாய் 1.25 கோடி உயரிய ஊக்கத்தொகை வழங்கப்படும் என அதிகாரப்பூர்வமாக அறிவித்துள்ளார்.   

பாரா ஆசிய விளையாட்டுப் போட்டிகளில் மகளிர் பேட்மிண்டன் போட்டிகள் மிக விறுவிறுப்பாக நடைபெற்றன. இதில் மகளிர் இரட்டையர் பிரிவின் (SL3-SU5) தங்கப் பதக்கத்திற்கான இறுதி ஆட்டத்தில், இந்தியாவின் நட்சத்திர வீராங்கனையான தமிழகத்தைச் சேர்ந்த துளசிமதி முருகேசன், மானசி ஜோஷியுடன் ஜோடி சேர்ந்து களம் கண்டார்.   பலமிக்க சீன வீராங்கனைகளான யாங் சியூசியா மற்றும் சியாவோ ஜுக்சியான் இணையை எதிர்த்துத் தொடக்கம் முதலே துணிச்சலாகவும் ஆக்ரோஷமாகவும் ஆடிய துளசிமதி - மானசி ஜோடி, 21-16, 21-13 என்ற நேர் செட் கணக்கில் சீன வீராங்கனைகளை வீழ்த்தி வரலாற்றுச் சிறப்புமிக்க தங்கப் பதக்கத்தைக் கைப்பற்றித் தேசியக் கொடியை உலக அரங்கில் பட்டொளி வீசிப் பறக்கவிட்டது.மேலும், இத்தொடரில் மகளிர் ஒற்றையர் பிரிவு (SU5) மற்றும் கலப்பு இரட்டையர் பிரிவிலும் (SL3-SU5) அபாரமாக விளையாடிய துளசிமதி முருகேசன், இரண்டு வெள்ளிப் பதக்கங்களையும் வென்று அசத்தினார். ஒரே தொடரில் 1 தங்கம், 2 வெள்ளி என 3 சர்வதேசப் பதக்கங்களை வேட்டையாடி தமிழ்நாட்டின் புகழைப் பறைசாற்றியுள்ளார். 

இதையும் படிங்க: ஆசிய விளையாட்டில் தங்கம் வென்ற வித்யா ராம்ராஜுக்கு ரூ.75 லட்சம் பரிசு: முதல்வர் விஜய் அறிவிப்பு!   

சர்வதேச அரங்கில் புதிய வரலாறு படைத்துள்ள சாதனை வீராங்கனை துளசிமதி முருகேசனுக்குத் தனது மனமார்ந்த பாராட்டுகளையும் வாழ்த்துகளையும் தெரிவித்துள்ள முதலமைச்சர் ஜோசப் விஜய்:அவரது தன்னம்பிக்கை, விடாமுயற்சி மற்றும் உலகத்தரம் வாய்ந்த விளையாட்டுத் திறனைப் பாராட்டி, தமிழ்நாடு அரசின் சார்பில் உயரிய ஊக்கத்தொகையாக ரூபாய் 1 கோடியே 25 லட்சம் (₹1.25 கோடி) வழங்கப்படும் என்று பெருமிதத்துடன் அறிவித்தார்.

மாற்றுத்திறனைக் கடந்து, கடுமையான சவால்களுக்கு மத்தியில் சீன வீராங்கனைகளை வீழ்த்தி தங்கப் பதக்கம் வென்றுள்ள துளசிமதியின் வெற்றி, தமிழ்நாட்டின் இளம் தலைமுறையினருக்கும் விளையாட்டு வீரர்களுக்கும் மிகப்பெரிய உத்வேகத்தை அளித்துள்ளது என்றும் முதல்வர் தனது வாழ்த்துச் செய்தியில் குறிப்பிட்டுள்ளார்.சர்வதேச அளவில் பதக்கங்களை வென்று தாயகத்திற்குப் பெருமை சேர்க்கும் தமிழக விளையாட்டு வீரர்களை ஊக்குவிப்பதில் தமிழ்நாடு அரசு தொடர்ந்து முன்னுரிமை அளித்து வருவது குறிப்பிடத்தக்கது.

இதையும் படிங்க: ஆடிட்டர் செய்த தவறுக்காக முதல்வர் விஜய் வெற்றியை ரத்து செய்ய முடியுமா?: ஐகோர்ட் கேள்வி!