கேரள மாநிலம் மலப்புறம் மாவட்டத்தில் தனியார் பேருந்து ஒன்று கட்டுப்பாட்டை இழந்து சாலையின் தடுப்புச்சுவரில் மோதி தலைகீழாகக் கவிழ்ந்து விபத்துக்குள்ளானதில் இளைஞர் ஒருவர் பரிதாபமாக உயிரிழந்தார்; மேலும் 26 பேர் படுகாயமடைந்து மருத்துவமனையில் அனுமதிக்கப்பட்டுள்ளனர்.

கேரள மாநிலம் கோழிக்கோட்டில் இருந்து பயணிகளை ஏற்றிக்கொண்டு திருச்சூர் நோக்கிச் சென்ற தனியார் பேருந்து, மலப்புறம் மாவட்டத்தில் உள்ள குட்டிப்புறம் ரயில்வே மேம்பாலம் அருகே உள்ள ஆறுவழிச் சாலையில் வந்துகொண்டிருந்தது. அப்போது, எதிர்பாராதவிதமாகப் பேருந்து ஓட்டுநரின் கட்டுப்பாட்டை இழந்து சாலையில் வழுக்கிச் சென்று, சாலையின் நடுவே இருந்த தடுப்புச் சுவரின் மீது பலமாக மோதியது. மோதிய வேகத்தில் பேருந்து தலைகீழாகக் கவிழ்ந்து விபத்துக்குள்ளானதில், அந்த வாகனம் எதிர்பாராதவிதமாக இரண்டாகப் பிளந்தது.

இதையும் படிங்க: விரைவில் கேரளா செல்லும் முதல்வர் விஜய்.. கேரள உள்துறை அமைச்சர் தகவல்..!

இந்தக் கோர விபத்தில் பேருந்தில் பயணித்த 27 பேர் படுகாயமடைந்தனர். உடனே அங்கிருந்த உள்ளூர் மக்களும் மீட்புக் குழுவினரும் விரைந்து செயல்பட்டு, காயமடைந்தவர்களை மீட்டு அருகில் உள்ள மருத்துவமனைகளுக்கு அனுப்பி வைத்தனர். இருப்பினும், சிகிச்சை பலனின்றி கோழிக்கோடு பெருவயல் பகுதியைச் சேர்ந்த வைஷ்ணவ் என்ற இளைஞர் பரிதாபமாக உயிரிழந்தார். மேலும், மருத்துவமனையில் அனுமதிக்கப்பட்டுள்ளவர்களில் மூன்று பேரின் நிலைமை தற்சமயம் கவலைக்கிடமாக உள்ளதாக மருத்துவமனை வட்டாரங்கள் தெரிவிக்கின்றன.

இதனிடையே, இந்த நரம்புகளை உறையவைக்கும் விபத்து தொடர்பான சிசிடிவி காட்சிகள் தற்போது வெளியாகி பெரும் அதிர்ச்சியை ஏற்படுத்தியுள்ளன. பேருந்தில் ஏற்பட்ட திடீர் இயந்திரக் கோளாறு காரணமாக இந்த விபத்து நடந்ததா அல்லது ஓட்டுநரின் அதிவேகப் பயணமே இதற்குக் காரணமா என்பது குறித்துக் காவல்துறையினரும் மோட்டார் வாகனப் போக்குவரத்துத் துறையினரும் தீவிர விசாரணை மேற்கொண்டு வருகின்றனர்.

இதையும் படிங்க: ரூ.10,000 கோடி முதலீட்டில் மெகா கப்பல் கட்டும் திட்டம்! கேரளாவில் தடம் பதிக்கும் டாடா குழுமம்!