திமுக ஆட்சியில் அறிமுகப்படுத்தப்பட்ட மகளிர் இலவச பேருந்து பயணத் திட்டம், தற்போது ‘வெற்றி பயணம்’ என்ற பெயரில் விரிவுபடுத்தப்பட உள்ளது. இந்தத் திட்டத்தின் கீழ் எக்ஸ்பிரஸ், எல்எஸ்எஸ் டீலக்ஸ், புறநகர் பேருந்துகள் மற்றும் 40 கிலோமீட்டருக்கு மேற்பட்ட மலைப்பகுதி சாதாரண பேருந்துகளிலும் பெண்கள் இலவசமாகப் பயணிக்க முடியும்.
அக்டோபர் 2 முதல் நடைமுறைக்கு வரவுள்ள இந்த விரிவாக்கத்தால் சுமார் 12,692 பேருந்துகள் இணைக்கப்படுகின்றன. இதன் மூலம் ஒரு நாளைக்கு சுமார் 84 லட்சம் பெண்கள் பயனடைய வாய்ப்புள்ளது. தமிழ்நாட்டில் சென்னை, மதுரை, கோவை, சேலம் உள்ளிட்ட எட்டு அரசு போக்குவரத்துக் கழகங்கள் மூலம் தினசரி 20 ஆயிரத்துக்கும் மேற்பட்ட பேருந்துகள் இயக்கப்படுகின்றன. இவற்றில் சுமார் 1.76 கோடி மக்கள் பயணம் செய்கின்றனர்.
பள்ளி மாணவர்கள், பெண்கள், முதியோர் மற்றும் மாற்றுத்திறனாளிகள் உள்ளிட்டோர் அரசுப் பேருந்துகளையே பெரிதும் நம்பி வருகின்றனர். இந்நிலையில், 2026 சட்டப்பேரவைத் தேர்தலில் வெற்றி பெற்ற தவெக தலைவர் விஜய், இந்தத் திட்டத்தை மேலும் விரிவுபடுத்துவதாக அறிவித்திருந்தார். சட்டப்பேரவைக் கூட்டத்தில் 110 விதியின் கீழ் பேசிய அவர், தற்போது ஏழு கழகங்களில் உள்ள சாதாரண பேருந்துகள் மற்றும் 40 கி.மீ. வரையிலான மலைப்பகுதி சேவைகளில் மட்டும் அமலில் உள்ள இலவச வசதியை விரிவுபடுத்துவதாகத் தெரிவித்தார்.
இதையும் படிங்க: மேயர் பிரியா மீதான தாக்குதல்..!! முதல்வர் அனுமதிப்பது ஏன்..? கனிமொழி எம்பி கேள்வி..!
பொதுமக்களிடையே பெரும் வரவேற்பைப் பெற்றுள்ள இந்தத் திட்டத்தை வரவேற்கும் அதே வேளையில், தனியார் பேருந்து உரிமையாளர்கள் கடும் எதிர்ப்பைத் தெரிவித்து வருகின்றனர். தமிழ்நாட்டின் பல்வேறு மாவட்டத் தலைநகரங்களில் அவர்கள் போராட்டத்தில் ஈடுபட்டுள்ளனர். அவர்களின் முக்கியக் கோரிக்கை, வெற்றி பயணத் திட்டத்தில் தனியார் பேருந்துகளையும் இணைத்து, நிர்ணயிக்கப்பட்ட அளவில் அரசு மானியத்துடன் செயல்படுத்த வேண்டும் என்பதே.
ஒரு பயணத்திற்கு 12 பெண்களுக்கான சீட்டுகள் ஒதுக்க வேண்டும் என்றும் அவர்கள் வலியுறுத்துகின்றனர். சுமார் இரண்டு லட்சத்துக்கும் மேற்பட்ட ஊழியர்கள் மற்றும் அவர்களது குடும்பங்களின் வாழ்வாதாரம் பாதிக்கப்படும் என்பதால், முதலமைச்சர் விஜய் இதற்கு உடனடித் தீர்வு காண வேண்டும் எனக் கோரிக்கை விடுத்துள்ளனர். இந்தத் திட்டம் பெண்களின் இயக்கம் மற்றும் பொருளாதார சுதந்திரத்தை மேம்படுத்தும் என்றாலும், தனியார் துறையின் கவலைகளையும் அரசு கவனத்தில் கொள்ள வேண்டியுள்ளது.
இதையும் படிங்க: தனியாருக்கு கொடுக்க விஜய்க்கு எவ்வளவு ஆர்வம்..? தவெக அரசு முடிவுக்கு TTV தினகரன் எதிர்ப்பு..!