தமிழ் திரையுலகின் வெற்றிகரமான தயாரிப்பாளரும், 'சூப்பர் குட் பிலிம்ஸ்' அதிபருமான ஆர்.பி. சவுத்ரியின் அகால மரணம் ஒட்டுமொத்தத் திரையுலகையும் சோகத்தில் ஆழ்த்தியுள்ளது. ராஜஸ்தான் மாநிலத்தில் நிகழ்ந்த கார் விபத்தில் சிக்கி அவர் உயிரிழந்த செய்தி வெளியானதிலிருந்து, சென்னை தியாகராய நகரில் உள்ள அவரது இல்லத்திற்குத் திரையுலகினரும் அரசியல் பிரமுகர்களும் படையெடுத்து வருகின்றனர்.

தமிழக வெற்றிக் கழகத்தின் தலைவரும், நடிகருமான விஜய் இன்று மதியம் ஆர்.பி. சவுத்ரியின் இல்லத்திற்கு நேரில் சென்றார். தனது ஆரம்பக்கால திரையுலகப் பயணத்தில் திருப்புமுனையாக அமைந்த பல வெற்றிப்படங்களைத் தயாரித்த ஆர்.பி. சவுத்ரியின் மறைவு விஜய்க்குப் பெரும் தனிப்பட்ட இழப்பாகும். அவரது உடலுக்கு மலர் வளையம் வைத்து அஞ்சலி செலுத்திய விஜய், சிறிது நேரம் மௌனமாக நின்று தனது மரியாதையைச் செலுத்தினார்.

ஆர்.பி. சவுத்ரியின் மகன்களான நடிகர் ஜீவா மற்றும் ஜித்தன் ரமேஷ் ஆகியோர் தந்தையின் இழப்பால் நிலைகுலைந்து போயிருந்தனர். அவர்களைக் கட்டிப்பிடித்துத் தழுவிக்கொண்ட விஜய், நீண்ட நேரம் அவர்களுக்கு ஆறுதல் கூறினார். 

இதையும் படிங்க: பதவியேற்பு நடக்குமா? விஜய்யின் முதல்வர் கனவில் சிக்கல்! ஆளுநருக்குத் திருப்தி இல்லை எனத் தகவல்!

விஜயைத் தொடர்ந்து, தமிழ்த் திரைப்படத் தயாரிப்பாளர் சங்கத்தின் முக்கிய நிர்வாகிகள் மற்றும் முன்னணி நடிகர்கள் பலரும் நேரில் வந்து அஞ்சலி செலுத்தினர். 'நாட்டாமை', 'சூர்யவம்சம்' போன்ற காவியங்களைத் தயாரித்து பல இயக்குநர்களையும், தொழில்நுட்பக் கலைஞர்களையும் வாழவைத்த ஒரு மாபெரும் ஆளுமையைத் தமிழ் சினிமா இழந்துவிட்டதாக அவர்கள் இரங்கல் தெரிவித்தனர்.

விபத்து நடந்த இடத்திலிருந்து தனி விமானம் மூலம் கொண்டு வரப்பட்ட ஆர்.பி. சவுத்ரியின் உடல், தற்போது பொதுமக்கள் அஞ்சலிக்காக வைக்கப்பட்டுள்ளது. இன்று மாலை சென்னை நுங்கம்பாக்கத்தில் உள்ள மின்மயானத்தில் அவரது உடல் நல்லடக்கம் செய்யப்பட உள்ளது. இதையொட்டி அவரது இல்லத்தைச் சுற்றிலும் ஏராளமான ரசிகர்கள் மற்றும் தொண்டர்கள் குவிந்துள்ளதால் பலத்த பாதுகாப்பு ஏற்பாடுகள் செய்யப்பட்டுள்ளன. 

இதையும் படிங்க: #TNElectionResults2026: தொடர்ந்து முன்னிலையில் தவெக..!! வெற்றிச் சான்றிதழ் பெற லயோலா செல்கிறார் விஜய்..!!