உத்தரப் பிரதேசத்தில் தலித் இளைஞர் ஹரியோம் வால்மீகி அடித்துக் கொல்லப்பட்ட சம்பவத்தில், அவரது குடும்பத்தினரை சந்தித்த காங்கிரஸ் எம்பி, லோக்சபா எதிர்க்கட்சித் தலைவர் ராகுல் காந்தி, "நாடு முழுவதும் தலித்களுக்கு எதிராக நடக்கும் அட்டூழியங்கள், கொலைகள், பாலியல் வன்கொடுமைகளுக்கு நீதி கிடைக்க போராடுவோம்" என உறுதியளித்துள்ளார். குடும்பம் கோரும் நீதிக்கு ஆதரவாக காங்கிரஸ் கட்சி அனைத்து உதவிகளையும் செய்யும் என்றார்.

அக்டோபர் 2-ஆம் தேதி உ.பி. ரேபரேலியில் தலித் இளைஞர் ஹரியோம் வால்மீகி (20) அடித்துக் கொல்லப்பட்டார். கொலை வீடியோவில் பதிவு செய்யப்பட்டுள்ளது. இதைத் தொடர்ந்து, குடும்பத்தினர் குற்றவாளிகளுக்கு தண்டனை கோரி போராடுகின்றனர். ராகுல் காந்தி அவர்களை நேரில் சந்தித்து ஆறுதல் கூறினார். 

பின்னர் நிருபர்களிடம் பேசிய அவர், "சமீபத்தில் ஒரு தலித் அதிகாரி தற்கொலை செய்து கொண்டார்; நான் அங்கு சென்றேன். இன்று இங்கு வந்து குடும்பத்தை சந்தித்தேன். அவர்களுக்கு எதிராக குற்றம் நடந்தது; குற்றவாளிகளைப் போல் வீட்டை விட்டு வெளியேற அனுமதிக்கப்படவில்லை. அவர்கள் நீதி மட்டும் கேட்கின்றனர்" என்றார்.

இதையும் படிங்க: பாஜகவுல இருந்து கூப்பிட்டாங்க!! முதல்வர் பதவிக்கு அடி போடும் சிவக்குமார்! கர்நாடகாவில் பரபரப்பு!

மேலும், "எங்கள் மகன் கொல்லப்பட்டான்; வீடியோவில் பதிவு உள்ளது. நீதி வேண்டும்" என குடும்பம் கூறியதாக ராகுல் தெரிவித்தார். "நாடு முழுவதும் தலித்களுக்கு எதிராக அட்டூழியங்கள் நடக்கின்றன. அவர்களுக்கு நீதி, மரியாதை வழங்க வேண்டும். குற்றவாளிகளுக்கு தண்டனை; அவர்களைப் பாதுகாக்க முயற்சி செய்யக்கூடாது. முதல்வரிடம் இதை கேட்கிறேன்" என வலியுறுத்தினார்.

காங்கிரஸ் கட்சியும் தானும் குடும்பத்துக்கு அனைத்து உதவிகளையும் செய்யும். "தலித்களுக்கு எதிராக எங்கு அட்டூழியம் நடந்தாலும், காங்கிரஸ் ஆதரவாக இருக்கும். நீதிக்காக போராடுவோம்" என ராகுல் உறுதிப்படுத்தினார். இந்த சம்பவம், தலித் உரிமைகள், சமூக நீதி தொடர்பான தேசிய விவாதத்தைத் தூண்டியுள்ளது.

இதையும் படிங்க: மத்திய அரசே காரணம்… முடிஞ்சா PERMISSION வாங்கி தாங்க இபிஎஸ்! பேரவையில் அமைச்சர் பதிலடி…!