சென்னை: தமிழ்நாடு சட்டசபைத் தேர்தல் களத்தில் பாட்டாளி மக்கள் கழகம் (பாமக) உள்ளேயே பிளவு ஏற்பட்டுள்ள நிலையில், டாக்டர் ராமதாஸ் அறிவித்த 35 வேட்பாளர்களுக்கு ஒரே சின்னம் கிடைக்காதது பெரும் பேச்சாகியுள்ளது.
அன்புமணி ராமதாஸ் தலைமையிலான பாமக, அதிமுக கூட்டணியில் இணைந்து 18 தொகுதிகளில் போட்டியிடுகிறது. இதற்கு நேர்மாறாக, ராமதாஸ் சசிகலாவின் அனைத்திந்திய புரட்சித் தலைவர் மக்கள் முன்னேற்றக் கழகத்துடன் கூட்டணி அமைத்து, ‘அனைத்திந்திய ஜனநாயக பாதுகாப்பு கழகம்’ என்ற பெயரில் 35 தொகுதிகளில் வேட்பாளர்களை நிறுத்தியுள்ளார்.
இந்த 35 வேட்பாளர்களுக்கும் ஒரே சின்னம் ஒதுக்கப்படாததால், அவர்கள் ஆறு வெவ்வேறு சின்னங்களில் போட்டியிட வேண்டிய நிலை ஏற்பட்டுள்ளது. தர்மபுரி, சேலம் மேற்கு, விக்கிரவாண்டி, காட்டுமன்னார்கோவில், விருத்தாசலம், போளூர், ஜெயங்கொண்டம், செஞ்சி, கீழ்வேளூர் உள்ளிட்ட 30 தொகுதிகளில் ராமதாஸ் வேட்பாளர்கள் ‘சிலிண்டர்’ சின்னத்தில் களமிறங்குகின்றனர்.
இதையும் படிங்க: மாம்பழ சின்னம் வழக்கு! சென்னை ஐகோர்ட் மறுப்பு!! பாமக நிறுவனர் ராமதாஸுக்கு சறுக்கல்!!
மற்ற தொகுதிகளில் சின்னங்கள் மாறுபடுகின்றன. சோளிங்கரில் ‘தர்பூசணி’, அணைக்கட்டில் ‘பச்சை மிளகாய்’, நெல்லையில் ‘கிரிக்கெட் பேட்’, பரமத்தி வேலூரில் ‘பேபி வாக்கர்’, திண்டுக்கல் ஆத்தூரில் ‘பிரஷர் குக்கர்’ ஆகிய சின்னங்கள் ஒதுக்கப்பட்டுள்ளன.
இதில் சுவாரசியம் என்னவென்றால், அன்புமணியின் மனைவி சவுமியா போட்டியிடும் தர்மபுரி உள்ளிட்ட பல தொகுதிகளில் ராமதாஸ் வேட்பாளர்களும் நிறுத்தப்பட்டுள்ளனர். அன்புமணி பாமக சார்பில் போட்டியிடும் 18 தொகுதிகளில் 11 தொகுதிகளில் ராமதாஸ் வேட்பாளர்களை நிறுத்தியிருந்தார்.
ஆனால், திருப்போரூரில் பாமக செய்தித் தொடர்பாளர் பாலு போட்டியிடும் இடத்தில் ராமதாஸ் தரப்பு வேட்பாளர் பொற்செழியன் வேட்புமனுவை திரும்பப் பெற்றுக்கொண்டார். உத்திரமேரூர் தொகுதியில் ராமதாஸ் வேட்பாளரின் மனு நிராகரிக்கப்பட்டது. இதனால், அன்புமணியுடன் ஒன்பது தொகுதிகளில் ராமதாஸ் தரப்பு நேருக்கு நேர் மோதுகிறது.
இந்தப் பிளவு பாமகவுக்குள் ஏற்பட்டுள்ள உள் மோதலின் தீவிரத்தை வெளிப்படுத்துகிறது. ஒரே குடும்பத்தைச் சேர்ந்த தந்தை-மகன் இடையேயான அரசியல் மோதல் தேர்தல் களத்தில் வெளிப்படையாகத் தெரியத் தொடங்கியுள்ளது. வாக்காளர்கள் இந்த சின்னங்களைக் கண்டு குழப்பமடையாமல் இருக்க வேண்டும் என்பதே இப்போதைய சவாலாக உள்ளது.
இதையும் படிங்க: பென்னாகரத்தில் மகனுக்கு போட்டியாக நீதான் களம் இறங்கணும்!! ஜி.கே.மணிக்கு அழுத்தம் தரும் பாமக ராமதாஸ்!!