கௌஹாத்தியில் உள்ள பர்சப்பாரா மைதானத்தில் நடைபெற்ற நியூசிலாந்துக்கு எதிரான 3-வது டி20 போட்டியில், இந்திய அணி 8 விக்கெட் வித்தியாசத்தில் மெகா வெற்றி பெற்று வரலாற்றுச் சாதனை படைத்துள்ளது. முதலில் பேட்டிங் செய்த நியூசிலாந்து அணி, இந்திய அணியின் நட்சத்திரப் பந்துவீச்சாளர் ஜஸ்பிரித் பும்ராவின் துல்லியமான யார்க்கர் மற்றும் வேரியேஷன்களில் சிக்கித் தவித்தது. நீண்ட இடைவேளைக்குப் பிறகு களமிறங்கிய ரவி பிஷ்னோய் மற்றும் ஹர்திக் பாண்டியா தலா 2 விக்கெட்டுகளை வீழ்த்தி அழுத்தம் கொடுக்க, பும்ரா 3 விக்கெட்டுகளைக் கைப்பற்றி நியூசிலாந்தை 153 ரன்களுக்குள் முடக்கினார். ஒரு கட்டத்தில் 200 ரன்களைத் தாண்டும் என எதிர்பார்க்கப்பட்ட நிலையில், இந்திய பந்துவீச்சாளர்களின் டெத் ஓவர் ஸ்பெல்லால் நிலைகுலைந்தது.

பின்னர் 154 ரன்கள் என்ற இலக்கை நோக்கி ஆடிய இந்திய அணியில், தொடக்க வீரர் அபிஷேக் சர்மா ருத்ரதாண்டவம் ஆடினார். வெறும் 14 பந்துகளில் அரைசதம் கடந்து, சர்வதேச டி20 கிரிக்கெட்டில் அதிவேக அரைசதம் அடித்த இரண்டாவது இந்திய வீரர் என்ற பெருமையைப் பெற்றார். அவருக்குத் தகுந்த ஒத்துழைப்பு வழங்கிய கேப்டன் சூர்யகுமார் யாதவ், மைதானத்தின் நாலாபுறமும் பந்துகளைச் சிதறடித்து 26 பந்துகளில் 57 ரன்கள் குவித்து ஆட்டமிழக்காமல் இருந்தார். இந்த மின்னல் வேக ஆட்டத்தால், 154 ரன்கள் என்ற இலக்கை இந்திய அணி வெறும் 10 ஓவர்களிலேயே எட்டிப்பிடித்து அனைவரையும் வாயடைக்கச் செய்தது. 150-க்கும் மேற்பட்ட ரன்களை இவ்வளவு சீக்கிரம் சேஸ் செய்த முதல் முழுநேர அணி என்ற உலக சாதனையையும் இந்தியா தட்டிச் சென்றது.

இதையும் படிங்க: பெண்கள் மற்றும் இளைஞர்களே நாட்டின் பலம்! குடியரசு தின உரையில் திரௌபதி முர்மு பெருமிதம்!

இந்த வெற்றியின் மூலம் 5 போட்டிகள் கொண்ட டி20 தொடரை 3-0 என்ற கணக்கில் இந்திய அணி முன்கூட்டியே கைப்பற்றியுள்ளது. கௌஹாத்தி மைதானத்தில் திரண்டிருந்த ஆயிரக்கணக்கான ரசிகர்கள், அபிஷேக் மற்றும் சூர்யாவின் 'சிக்சர்' மழையில் நனைந்து உற்சாகமடைந்தனர். ஆட்டநாயகனாக 3 விக்கெட்டுகளை வீழ்த்திய ஜஸ்பிரித் பும்ரா தேர்வு செய்யப்பட்டார். நியூசிலாந்து தரப்பில் மேட் ஹென்றி மற்றும் இஷ் சோதி தலா ஒரு விக்கெட்டை வீழ்த்தினாலும், இந்திய பேட்டர்களின் அக்ரசிவ் ஆட்டத்தை அவர்களால் கட்டுப்படுத்த முடியவில்லை. இந்த வெற்றி, வரவிருக்கும் உலகக்கோப்பை தொடருக்கு இந்திய அணியின் பவர்-ஹிட்டிங் வலிமையை உலகுக்கு உரக்கச் சொல்லியுள்ளது.
 

இதையும் படிங்க: இந்தியாவின் கடன் உதவி..!! பட்டியல் இதோ..!! லிஸ்ட்ல டாப் எந்த நாடு தெரியுமா..??