செங்கல்பட்டு: சமூக மாற்றம், முன்னேற்றம், மேம்பாடு ஆகிய அனைத்துக்கும் கல்வியே அடிப்படை என்றும், நாம் தமிழர் கட்சி ஆட்சிக்கு வந்தால் கட்டணம் இல்லாத கல்வியை வழங்குவோம் என்றும் அக்கட்சியின் தலைமை ஒருங்கிணைப்பாளர் சீமான் தெரிவித்துள்ளார். மதுராந்தகம் இடைத்தேர்தல் பிரசாரத்தில் அவர் பேசிய கருத்துகள் அரசியல் வட்டாரத்தில் கவனம் பெற்றுள்ளன.
மதுராந்தகம் இடைத்தேர்தலில் நாம் தமிழர் கட்சி சார்பில் ஜானகிராமன் போட்டியிடுகிறார். அவரை ஆதரித்து நடைபெற்ற பொதுக்கூட்டத்தில் சீமான் பேசினார். அப்போது, ஒரு கட்சியில் இருந்து போட்டியிட்டு வெற்றி பெற்ற பதவியை ராஜினாமா செய்துவிட்டு, மீண்டும் அதே பதவிக்கு வேறொரு கட்சி சார்பில் போட்டியிடுவது எந்த வகையில் நியாயம் என கேள்வி எழுப்பினார்.
தமிழக வெற்றிக் கழகம் சார்பில் போட்டியிடும் மரகதம் குமரவேல் அவசரமாக பதவியை ராஜினாமா செய்துவிட்டு புதிய கட்சியில் இணைந்ததன் காரணம் என்ன என்றும் சீமான் கேள்வி எழுப்பினார். இதுபோன்ற தேர்தல்களால் மக்களின் நேரமும், அரசின் பணமும் செலவாகிறது என்றும் அவர் விமர்சித்தார்.
இதையும் படிங்க: விறுவிறு இடைத்தேர்தல்... களமிறங்கிய சீமான்..! மதுராந்தகத்தில் அனல் பரப்புரை..!!
தேர்தல் வாக்குறுதிகளில் வழங்கப்படும் உதவித்தொகைகள் மற்றும் இலவசத் திட்டங்களுக்கான நிதி எங்கிருந்து வருகிறது என்பதை மக்கள் சிந்திக்க வேண்டும் என்றும் சீமான் கூறினார். அரசுக்கு வருவாய் தரும் வளங்களை இலவசத் திட்டங்களுக்காக பயன்படுத்திவிட்டு, பின்னர் கடன் வாங்கி செலவு செய்வதன் அவசியம் என்ன என்றும் அவர் கேள்வி எழுப்பினார்.
கல்வி குறித்து பேசிய சீமான், சமூக மாற்றத்துக்கான தொடக்கப்புள்ளி கல்விதான் என்றும், தங்கள் கட்சி ஆட்சிக்கு வந்தால் கட்டணம் இல்லாமல் கல்வி வழங்கப்படும் என்றும் தெரிவித்தார். அரசு மருத்துவமனைகளின் தரம் குறித்தும் அவர் விமர்சனங்களை முன்வைத்தார்.
மேலும், “ஒருமுறை மாற்றி ஓட்டு போடுங்கள். நான் ஏமாற்ற வந்தவன் அல்ல; அனைத்தையும் மாற்ற வந்தவன்” என்று சீமான் வாக்காளர்களிடம் கேட்டுக்கொண்டார்.
தொடர்ந்து, தன்னை ‘ஜீரோ’ கட்சி என்று சிலர் விமர்சிப்பதாகக் கூறிய அவர், “இந்த ஜீரோ கட்சியைப் பார்த்துதான் ஹீரோ கட்சி பயப்படுகிறது” எனக் குறிப்பிட்டார். அவரது இந்தப் பேச்சு மதுராந்தகம் இடைத்தேர்தல் பிரசாரத்தில் பரபரப்பை ஏற்படுத்தியுள்ளது.
இதையும் படிங்க: துணை முதல்வர் பதவி... சீமான் மனைவியிடம் டீல் பேசிய ஆதவ் அர்ஜுனா... கடைசியில் நடந்த ட்விஸ்ட்...!