இந்திய உச்சநீதிமன்றத்தின் அலுவல் மொழியாக இந்தியைப் பயன்படுத்துவது மற்றும் ஏற்பது குறித்து ஆய்வு செய்ய மத்திய அரசுக்கு உத்தரவிட்டு ஒரு பிரத்யேக உயர்நிலைக் குழு அல்லது ஆணையத்தை அமைக்க வேண்டும் என்று கோரி தாக்கல் செய்யப்பட்ட பொதுநல மனுவை முற்றிலும் நிராகரித்து, உச்சநீதிமன்றத் தலைமை நீதிபதி திரு. சூர்யகாந்த் தலைமையிலான மூன்று நீதிபதிகள் கொண்ட அமர்வு வழக்கை அதிரடியாகத் தள்ளுபடி செய்து உத்தரவிட்டுள்ளது.

இந்திய அரசியலமைப்புச் சட்டம் பிரிவு 348(1)(a)-இன் படி உச்சநீதிமன்றத்தின் அனைத்து வாதங்களும் நடைமுறைகளும் ஆங்கிலத்திலேயே இயங்க வேண்டும் என்பது தெளிவான விதியாக இருந்து வருகிறது. இந்நிலையில், உச்சநீதிமன்றத்தில் இந்தியை அலுவல் மொழியாகப் பிரகடனம் செய்வதற்கு ஏதுவாக மத்திய அரசு உரிய ஆணையத்தை அமைக்க உத்தரவிட வேண்டும் எனக் கோரி தொடரப்பட்ட பொதுநல மனுவானது, தலைமை நீதிபதி சூர்யகாந்த், நீதிபதி ஜோய்மால்யா பாக்சி மற்றும் நீதிபதி வி. மோகனா ஆகியோர் அடங்கிய அமர்வு முன்பாக இன்று நேரில் விசாரணைக்கு வந்தது. அப்போது மனுதாரர் தரப்பில், இந்தியை அலுவல் மொழியாக்கப் பரிசீலிக்கும் வகையில் குறைந்தபட்சம் ஒரு குழுவையாவது அமைக்க உத்தரவிட வேண்டும் என்று தீவிரமாக வாதிடப்பட்டது.

இதனைத் தொடக்கத்திலேயே திட்டவட்டமாக நிராகரித்த நீதிபதி வி. மோகனா, நீங்கள் உண்மையில் அரசியலமைப்புச் சட்டத் திருத்தத்தைத்தான் கேட்கிறீர்கள்; நாடாளுமன்றம் செய்ய வேண்டிய சட்டத் திருத்தத்தை நீதிமன்றம் உத்தரவிட்டு எப்படிச் செய்ய முடியும்? எனக் கேள்வி எழுப்பினார். தொடர்ந்து கருத்து தெரிவித்த நீதிபதி ஜோய்மால்யா பாக்சி, இத்தகைய விவகாரங்களை நீங்கள் நாடாளுமன்றத்திடம் தான் கொண்டு செல்ல வேண்டும். அரசியலமைப்பைப் பாதுகாக்கும் உச்சநீதிமன்றம் இத்தகைய முடிவுகளை உத்தரவுகளாகப் பிறப்பித்தால், அது சமூகத்தின் மீது திணிக்கப்படும் ஜனநாயக விரோத முடிவுகளாகவே விமர்சிக்கப்படும் என்று ஆணித்தரமாகச் சுட்டிக்காட்டினார்.

இதையும் படிங்க: தேர்தல் ஆணையர் நியமனம் மத்திய அரசின் கட்டுப்பாட்டுக்குள் வந்துவிட்டது! உச்ச நீதிமன்றம் பகீர் கருத்து!

இறுதியாகத் தலைமை நீதிபதி சூர்யகாந்த் அவர்கள் தனது கருத்துக்களை மிகத் தெளிவாகப் பதிவு செய்து, இத்தகைய விவகாரங்களை நீதிமன்ற உத்தரவுகள் மூலமாக ஒருபோதும் நடைமுறைப்படுத்த முடியாது. சீர்திருத்தங்கள் என்பது படிப்படியாகவும் நிதானமாகவும் மட்டுமே கொண்டுவரப்பட வேண்டும். உச்சநீதிமன்றம் தனது நிர்வாக ரீதியான செயல்பாடுகளில் இந்தி மட்டுமின்றி, பிற மாநிலங்களின் வட்டார மொழிகளையும் முழுமையாக மதித்து நடைமுறைப்படுத்தி வருகிறது. முக்கியத் தீர்ப்புகளின் சுருக்கங்களை அனைத்து பிராந்திய மொழிகளிலும் கொண்டுவரும் பணிகளை நாம் மேற்கொண்டு வருகிறோம். நாம் அகில இந்தியப் பண்பாட்டைக் கட்டிக்காக்க வேண்டும்; பிற மாநிலங்களின் தாய்மொழிகளையும் நாம் சரிசமமாக மதிக்க வேண்டும். எனவே, இதற்கு எந்தவொரு நீதித்துறை உத்தரவோ அல்லது புதிய ஆணையமோ தேவையில்லை என்று கூறி மனுவை உடனடியாகத் தள்ளுபடி செய்து உத்தரவிட்டார்.

இதையும் படிங்க: SC/ST சட்டத்தை தளர்த்த முடியாது... முக்கிய திருப்பம்... வழக்கை தள்ளுபடி செய்த சுப்ரீம் கோர்ட்..!!