மகாத்மா காந்தி தேசிய ஊரக வேலைவாய்ப்பு உறுதியளிப்புச் சட்டத்திற்கு (MGNREGA) மாற்றாக மத்திய அரசு கொண்டு வந்துள்ள 'வளர்ந்த பாரத ஊரக வேலைவாய்ப்பு மற்றும் வாழ்வாதார உறுதியளிப்புச் சட்டம்' (VB-GRAMG) அல்லது 'விபி-ஜி ராம் ஜி' சட்டத்திற்கு எதிராகத் தமிழ்நாடு சட்டப்பேரவையில் இன்று (ஜனவரி 23) அரசு சார்பில் ஒருமனதாகத் தீர்மானம் நிறைவேற்றப்பட உள்ளது. மகாத்மா காந்தியின் பெயரை நீக்கியது மற்றும் நிதி ஒதுக்கீட்டில் செய்யப்பட்டுள்ள மாற்றங்கள் கூட்டாட்சி தத்துவத்திற்கு எதிரானது எனச் சுட்டிக்காட்டி இந்தத் தீர்மானம் கொண்டு வரப்படுகிறது.
கடந்த டிசம்பர் மாதம் நாடாளுமன்றத்தில் நிறைவேற்றப்பட்ட இந்தப் புதிய சட்டத்தின்படி, வேலை நாட்கள் 100-லிருந்து 125-ஆக உயர்த்தப்பட்டுள்ளன. இருப்பினும், இதற்குத் தமிழக அரசு முன்வைக்கும் முக்கியப் புகார்கள் தேசத்தந்தை மகாத்மா காந்தியின் பெயரை நீக்கிவிட்டு, 'விபி-ஜி ராம் ஜி' எனப் பெயர் மாற்றியிருப்பது அரசியல் உள்நோக்கம் கொண்டது.
100 சதவீதம் மத்திய அரசு நிதி அளித்து வந்த இத்திட்டத்திற்கு, இனி மாநில அரசுகள் 40 சதவீத நிதியை (60:40 விகிதம்) அளிக்க வேண்டும் என மாற்றப்பட்டுள்ளது. இது தமிழக அரசின் கருவூலத்திற்குப் பெரும் கூடுதல் சுமையை ஏற்படுத்தும்.
வேலை நாட்களை நிர்ணயிக்கும் அதிகாரத்தை மத்திய அரசே தன்வசம் எடுத்துக்கொள்வது மாநிலங்களின் சுயாட்சி உரிமையைப் பறிப்பதாகும் எனத் திமுக அரசு குற்றம் சாட்டுகிறது.
நேற்று நடைபெற்ற விவாதத்தின் போது, திமுக தனது தேர்தல் வாக்குறுதியான '150 நாட்கள் வேலை' என்பதை இதுவரை ஏன் நிறைவேற்றவில்லை என எதிர்க்கட்சித் தலைவர் எடப்பாடி பழனிசாமி கேள்வி எழுப்பினார். இதற்குப் பதிலளித்த முதல்வர் மு.க.ஸ்டாலின், "மத்தியில் நாங்கள் ஆட்சிக்கு வரவில்லை; உங்கள் கூட்டணியில் இருக்கும் பாஜகதான் ஆட்சியில் இருக்கிறது, நீங்கள் ஏன் குரல் கொடுக்கவில்லை?" எனத் திருப்பிக் கேட்டார். மேலும், இன்று இந்தச் சட்டத்திற்கு எதிராகத் தீர்மானம் கொண்டு வரப்படும் என்றும், அதன் மீது விரிவாகப் பேசலாம் என்றும் அவர் தெரிவித்தார்.
இதையும் படிங்க: விடுபட்டோரின் கவனத்திற்கு! நாளை முதல் மீண்டும் பொங்கல் தொகுப்பு விநியோகம்.. அரசு அறிவிப்பு!
தமிழக அரசு கொண்டு வரவுள்ள இந்தத் தீர்மானம், இதே போன்ற பாதிப்புகளைச் சந்திக்கும் கேரளா உள்ளிட்ட பிற மாநிலங்களுக்கும் ஒரு வழிகாட்டியாக அமையும் என எதிர்பார்க்கப்படுகிறது. பிரதமர் மோடி இன்று தமிழகம் வரவுள்ள நிலையில், இந்தத் தீர்மானம் அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.
இதையும் படிங்க: ஓய்வூதியத் திட்டம் ஒரு பூசி மெழுகும் வேலை! திமுக அரசை சாடிய எடப்பாடி பழனிசாமி!!