தமிழகத்தில் முந்தைய தி.மு.க. ஆட்சிக் காலத்தில் மின்சார கொள்முதலில் ரூ.5,000 கோடிக்கு மேல் முறைகேடு நடந்ததாக எழுந்துள்ள புகார் தொடர்பாக, லஞ்ச ஒழிப்புத்துறை போலீசார் முதற்கட்ட விசாரணையை தொடங்கியுள்ளனர். மின்சார கொள்முதல் தொடர்பான ஆவணங்களை மின்வாரியத்திடம் இருந்து அதிகாரிகள் பெற்றுள்ளதாக தகவல் வெளியாகியுள்ளது.
மின்வாரியத்தின் கொள்முதல் நடவடிக்கைகள் தொடர்பாக ஏற்கனவே பல்வேறு புகார்கள் மற்றும் வழக்குகள் விசாரணையில் உள்ளன. மின் மாற்றிகள் கொள்முதலில் ரூ.397 கோடி அளவுக்கு முறைகேடு நடந்ததாக எழுந்த புகாரைத் தொடர்ந்து, அப்போது மின்துறை அமைச்சராக இருந்த செந்தில் பாலாஜி உள்ளிட்டோர் மீது சி.பி.ஐ. வழக்குப்பதிவு செய்துள்ளது.
இதனைத் தொடர்ந்து மின் கம்பிகள் கொள்முதலில் ரூ.1,028 கோடி முறைகேடு நடந்ததாக எழுந்த புகார் தொடர்பாக தமிழக லஞ்ச ஒழிப்புத்துறை போலீசார் வழக்குப்பதிவு செய்து விசாரணை நடத்தி வருகின்றனர். இந்த வழக்கின் ஒரு பகுதியாக தமிழகம் முழுவதும் 60 இடங்களில் சமீபத்தில் சோதனை நடைபெற்றது. மின்வாரிய அதிகாரிகள் மற்றும் மின் கம்பி தயாரிப்பு நிறுவனங்கள் தொடர்பான இடங்களில் நடைபெற்ற இந்த சோதனையில், முக்கிய ஆவணங்கள் கைப்பற்றப்பட்டதாக அதிகாரிகள் தெரிவித்துள்ளனர்.
இதையும் படிங்க: மோடி அமைச்சரவையில் திமுகவுக்கு இடம்? வடமாநில ஊடக தகவலால் தமிழக அரசியலில் திடீர் திருப்பம்!
இந்த நிலையில், முந்தைய தி.மு.க. ஆட்சிக் காலத்தில் மின்சாரம் கொள்முதல் செய்ததிலும் ரூ.5,000 கோடிக்கு மேல் முறைகேடு நடந்திருக்கலாம் என்ற புதிய புகார் எழுந்துள்ளது. இதையடுத்து, மின்வாரியத்திடம் இருந்து மின்சார கொள்முதல் தொடர்பான ஆவணங்களை லஞ்ச ஒழிப்புத்துறை போலீசார் பெற்றுள்ளனர்.
முதற்கட்ட விசாரணையில், குறிப்பிட்ட காலகட்டங்களில் மின்சார தட்டுப்பாடு ஏற்படும் சூழல் இருப்பதாக ஆவணங்கள் தயாரிக்கப்பட்டு, அதனை அடிப்படையாகக் கொண்டு அதிக விலைக்கு மின்சாரம் கொள்முதல் செய்யப்பட்டிருக்கிறதா என்பது குறித்து அதிகாரிகள் ஆய்வு செய்து வருகின்றனர்.
மின்சாரத்தின் தேவை, கொள்முதல் செய்யப்பட்ட அளவு, ஒப்பந்த விலை, சந்தை விலை மற்றும் கொள்முதல் நடைபெற்ற காலகட்டம் உள்ளிட்ட பல்வேறு அம்சங்கள் ஆய்வுக்கு உட்படுத்தப்பட உள்ளதாக கூறப்படுகிறது. இதில் விதிமுறைகள் மீறப்பட்டதா அல்லது அரசுக்கு கூடுதல் நிதிச்சுமை ஏற்படுத்தும் வகையில் நடவடிக்கைகள் மேற்கொள்ளப்பட்டதா என்பதும் விசாரணையில் தெரியவரும்.
லஞ்ச ஒழிப்புத்துறை அதிகாரிகள் தரப்பில், முறைகேடு நடந்தது விசாரணையில் உறுதி செய்யப்பட்டால், அதற்கேற்ப வழக்குப்பதிவு செய்து அடுத்தகட்ட சட்ட நடவடிக்கைகள் மேற்கொள்ளப்படும் என தெரிவிக்கப்பட்டுள்ளது.
ரூ.5,000 கோடிக்கு மேல் என்ற அளவில் குற்றச்சாட்டு முன்வைக்கப்பட்டுள்ளதால், இந்த விவகாரம் தமிழக அரசியல் மற்றும் நிர்வாக வட்டாரங்களில் கூடுதல் கவனத்தை பெற்றுள்ளது. இருப்பினும், தற்போது இது புகார் மற்றும் முதற்கட்ட விசாரணை மட்டுமே என்பதும், குற்றச்சாட்டு நிரூபிக்கப்பட வேண்டிய நிலை இருப்பதும் குறிப்பிடத்தக்கது.
இதையும் படிங்க: ஸ்மைல் ப்ளீஸ் நண்பா!! போட்டோகிராஃபர்களை வீடியோ எடுத்து மகிழ்ந்த முதலமைச்சர் விஜய்! சட்டசபையில் சுவாரஸ்யம்!