பள்ளி மாணவர்கள் பாதுகாப்பாகவும், கூட்ட நெரிசல் இல்லாமலும் பள்ளிக்குச் சென்று வருவதற்காக நாளை (ஜூலை 13) முதல் கூடுதல் சிறப்புப் பேருந்துகள் இயக்கப்பட உள்ளதாக போக்குவரத்துத் துறை அறிவித்துள்ளது. மாணவர்களின் பயண சிரமத்தை குறைக்கும் நோக்கில் தமிழக அரசு இந்த முக்கிய நடவடிக்கையை மேற்கொண்டுள்ளது.

தமிழக முதல்வர் சி. ஜோசப் விஜய்யின் உத்தரவின் பேரில், பள்ளி மாணவர்களை அவர்கள் வசிக்கும் பகுதிகளில் உள்ள பேருந்து நிறுத்தங்களில் இருந்து பள்ளிகளுக்கும், பள்ளி முடிந்த பிறகு மீண்டும் அவர்களது பகுதிகளுக்கும் பாதுகாப்பாக அழைத்துச் செல்லும் வகையில் இந்த சிறப்புப் பேருந்துகள் இயக்கப்படுகின்றன.

இந்த திட்டம் தொடர்பாக, சைதாப்பேட்டை சட்டமன்ற உறுப்பினர் ம. அருள் பிரகாசம் கடந்த ஜூன் 30-ஆம் தேதி போக்குவரத்துத் துறை அமைச்சரிடம் கோரிக்கை வைத்திருந்தார்.

இதையும் படிங்க: வியட்நாம் படகு விபத்து நடந்தது எப்படி? உயிர்தப்பியவர்கள் சொன்ன திக் திக் நிமிடங்கள்!! முழு விவரம்!

இதையடுத்து, கடந்த 10 நாட்களாக சைதாப்பேட்டை உள்ளிட்ட பல்வேறு பகுதிகளில் மாநகர் போக்குவரத்துக் கழக அதிகாரிகள் கள ஆய்வு மேற்கொண்டனர். பள்ளி மாணவர்கள், பெற்றோர் மற்றும் ஆசிரியர்களின் கருத்துகளும் பெறப்பட்டு விரிவான அறிக்கை அரசிடம் சமர்ப்பிக்கப்பட்டது.

அந்த அறிக்கையின் அடிப்படையில், முதல்வரின் ஒப்புதலுடன் கூடுதல் சிறப்புப் பேருந்துகள் இயக்க முடிவு செய்யப்பட்டுள்ளது. ஏற்கனவே சென்னையில் 25 பள்ளிகளுக்காக 25 சிறப்புப் பேருந்துகள் மூலம் தினமும் 50 பயண நடைகள் இயக்கப்பட்டு வந்தன.

தற்போது அதனை மேலும் விரிவுபடுத்தும் வகையில், மாநகர் போக்குவரத்துக் கழகத்தின் சார்பில் தினமும் 41 கூடுதல் சிறப்புப் பேருந்துகள் மூலம் 84 பயண நடைகள் நாளை முதல் இயக்கப்பட உள்ளன.

இந்த புதிய சேவையால் பள்ளி நேரங்களில் பேருந்துகளில் ஏற்படும் கூட்ட நெரிசல் குறைவதுடன், மாணவர்கள் பாதுகாப்பாகவும் நேரத்திற்கு பள்ளிக்குச் சென்று வரவும் உதவியாக இருக்கும் என அதிகாரிகள் தெரிவித்துள்ளனர்.

இதற்காக தயார்படுத்தப்பட்டுள்ள புதிய சிறப்புப் பேருந்துகளை போக்குவரத்துத் துறை அமைச்சர் ஆ. விஜய் தமிழன் பார்த்திபன் நேற்று நேரில் பார்வையிட்டு ஆய்வு செய்தார். மாணவர்களுக்கு சிறந்த போக்குவரத்து வசதியை வழங்கும் அரசின் முயற்சியாக இந்த திட்டம் பார்க்கப்படுகிறது.

இதையும் படிங்க: உடனே போங்க! படகு விபத்தில் சிக்கிய தமிழர்கள்! சேலம் DIG வியட்நாம் செல்ல முதல்வர் விஜய் உத்தரவு!