முதலமைச்சர் குடும்பமே வந்தாலும் வெற்றி எங்களுக்கே! வில்லிவாக்கத்தில் அதிரடி கிளப்பும் ஆதவ் அர்ஜுனா!

தமிழகச் சட்டமன்றத் தேர்தலில் வில்லிவாக்கம் தொகுதியில் தமிழக வெற்றிக் கழகம் (தவெக) சார்பில் போட்டியிடும் அக்கட்சியின் தேர்தல் மேலாண்மைப் பிரிவுச் செயலாளர் ஆதவ் அர்ஜுனா, இன்று தனது பிரச்சாரத்தின் போது செய்தியாளர்களைச் சந்தித்தார். அப்போது திமுக-வின் செல்வாக்கு மற்றும் முதலமைச்சரின் குடும்பத்தினர் பிரச்சாரத்திற்கு வருவது குறித்த கேள்விகளுக்கு அவர் மிகத் தைரியமாகப் பதிலளித்தார்.

வில்லிவாக்கம் தொகுதியில் முதலமைச்சர் ஸ்டாலினின் மருமகன் சபரீசன் அல்லது முதலமைச்சரின் மொத்த குடும்பமுமே பிரச்சாரத்திற்கு வந்தாலும் தவெக-வின் வெற்றியைத் தடுக்க முடியாது என ஆதவ் அர்ஜுனா தெரிவித்தார். "யார் வந்தாலும் சரி, வில்லிவாக்கத்தில் இந்த முறை வெற்றி தவெக-விற்குத்தான். மக்கள் மாற்றத்தை விரும்புகிறார்கள் என்று அவர் உறுதியாகக் கூறினார்.

1977-ஆம் ஆண்டு நடந்த தேர்தலில் எம்.ஜி.ஆர் அவர்கள் ஏற்படுத்திய புரட்சியைப் போலவே, 2026 தேர்தலிலும் தவெக ஒரு மிகப்பெரிய மாற்றத்தை ஏற்படுத்தும். அந்த வரலாற்று முடிவு மீண்டும் திரும்பும். திமுக ஆளுங்கட்சியாக இருந்து எதிர்க்கட்சி வரிசைக்குச் செல்லும் சூழல் உருவாகியுள்ளது என அவர் நம்பிக்கை தெரிவித்தார்.

இதையும் படிங்க: அயனாவரம் தவெக கூட்டத்தில் மது பாட்டில் வீச்சு! மேடையிலேயே அமர்ந்து ஆதவ் அர்ஜுனா போராட்டம்!

தங்களது பிரச்சாரத்தை ஆம் ஆத்மி கட்சியின் டெல்லி மற்றும் பஞ்சாப் வெற்றிகளுடன் ஒப்பிட்டுப் பேசிய அவர், இது வெறும் அரசியல் கட்சி நடத்தும் தேர்தல் அல்ல, இது ஒரு 'மக்கள் இயக்கம்' (People's Movement) என்று குறிப்பிட்டார்.

வில்லிவாக்கம் தொகுதியில் திமுக வேட்பாளர் கார்த்திக் மோகனை (எம்.எல்.ஏ எம்.கே. மோகனின் மகன்) எதிர்த்து ஆதவ் அர்ஜுனா களம் காண்கிறார். திமுக-வின் கோட்டையாகக் கருதப்படும் இப்பகுதியில் தவெக-வின் 'விசில்' சின்னத்திற்கு மக்கள் அமோக வரவேற்பு அளித்து வருவதாக அவர் கூறினார்.

முன்னதாக, தவெக தலைவர் விஜய்க்குப் போதிய பாதுகாப்பு வழங்கப்படவில்லை எனக் குற்றம் சாட்டியிருந்த அவர், தேர்தல் ஆணையம் இதில் தலையிட வேண்டும் என்றும் கோரிக்கை விடுத்திருந்தார் என்பது குறிப்பிடத்தக்கது.

இதையும் படிங்க: விஜய்க்கு உரிய பாதுகாப்பு இல்லை! திமுக அரசு மீது தவெக நிர்வாகி ஆதவ் அர்ஜுனா கடும் சாடல்!