தேமுதிக வேட்பாளர் பட்டியல் வெளியீடு: விருத்தாசலத்தில் பிரேமலதா, விருதுநகரில் விஜய பிரபாகர் போட்டி!

தமிழக சட்டமன்றத் தேர்தலுக்கான திமுக தலைமையிலான மதச்சார்பற்ற முற்போக்குக் கூட்டணியில் இடம்பெற்றுள்ள தேசிய முற்போக்கு திராவிட கழகம் (தேமுதிக), தனக்கு ஒதுக்கப்பட்ட 10 தொகுதிகளுக்கான வேட்பாளர் பட்டியலை இன்று அதிகாரப்பூர்வமாக வெளியிட்டுள்ளது. அக்கட்சியின் பொதுச்செயலாளர் பிரேமலதா விஜயகாந்த் அவர்கள் இந்தப் பட்டியலை அறிவித்தார்.

கடந்த 2011-ஆம் ஆண்டிற்குப் பிறகு மீண்டும் திமுக-வுடன் கூட்டணி அமைத்துள்ள தேமுதிக, தனது செல்வாக்குமிக்கத் தொகுதிகளைக் கேட்டுப் பெற்றுள்ளது.

கட்சியின் பொதுச்செயலாளர் பிரேமலதா விஜயகாந்த் அவர்கள் களம் காண்கிறார். மறைந்த தலைவர் விஜயகாந்த் அவர்கள் முதல்முறையாகச் சட்டமன்ற உறுப்பினராகத் தேர்ந்தெடுக்கப்பட்ட தொகுதி என்பதால், மீண்டும் அங்கேயே போட்டியிட அவர் முடிவு செய்துள்ளார்.

இதையும் படிங்க: விருகம்பாக்கம், ரிஷிவந்தியம் தொகுதிகள்.. தேமுதிகவுக்கு NO சொன்ன திமுக..!! அப்செட்டில் பிரேமலதா..!!

தேமுதிக இளைஞரணிச் செயலாளர் மற்றும் விஜயகாந்தின் மூத்த மகன் விஜய பிரபாகர் அவர்கள் தனது தேர்தல் அரசியல் பயணத்தை இங்கிருந்து தொடங்குகிறார். கடந்த நாடாளுமன்றத் தேர்தலில் விருதுநகரில் அவர் காட்டிய கடும் போட்டி தற்போது சட்டமன்றத் தேர்தலில் அவருக்கு வாய்ப்பைப் பெற்றுத் தந்துள்ளது.

தமிழ்நாடு சட்டமன்ற தேர்தலில் மதச்சார்பற்ற முற்போக்குக் கூட்டணியில் தேசிய முற்போக்கு திராவிட கழகத்தின் சார்பில் போட்டியிடும் கீழ்க்கண்ட வேட்பாளர்பட்டியல் வெளியீடு:

1. விருத்தாசலம்

திருமதி.பிரேமலதா விஜயகாந்த்,B.A.,

கழக பொதுச் செயலாளர்

2. தருமபுரி

டாக்டர் திரு.v.இளங்கோவன்,M.B.B.S.,

கழக அவைத்தலைவர்

3. சேலம் மேற்கு

திரு.அழகாபுரம்.R.மோகன்ராஜ்,Ex:MLA

கழக கொள்கைப்பரப்பு செயலாளர்

4. விருதுநகர்

திரு. வி.விஜய பிரபாகர்,B.Arch.,

கழக இளைஞர் அணி செயலாளர்

5. ஓமலூர்

திரு.ஏ.ஆர்.இளங்கோவன்,

சேலம் கிழக்கு மாவட்ட கழக செயலாளர்

6. மைலம்

திரு.எல்.வெங்கடேசன்,M.A.,EX:MLA.,

விழுப்புரம் மாவட்ட கழக செயலாளர்

7. பல்லாவரம்

திரு.அனகை.D.முருகேசன், Ex:MLA.,

செங்கல்பட்டு மாவட்ட கழக செயலாளர்

8. திருத்தணி

திரு.D.கிருஷ்ணமூர்த்தி

திருவள்ளூர் மேற்கு மாவட்ட கழக செயலாளர்

9. குடியாத்தம் (தனி)

திரு.K.B.பிரதாப்,B.B.A.,

வேலூர் புறநகர் மாவட்ட கழக செயலாளர்

10. போளூர்

திரு.T.P.சரவணன், M.Com.M.Bhil, B.L.,

திருவண்ணாமலை வடக்கு மாவட்டம்

இந்த 10 தொகுதிகளிலும் தேமுதிக வேட்பாளர்கள் தங்களது சொந்தச் சின்னமான 'முரசு' சின்னத்திலேயே போட்டியிடுகின்றனர். குறிப்பாக, பிரேமலதா விஜயகாந்த் போட்டியிடும் விருத்தாசலம் தொகுதி, தேமுதிக-வின் செல்வாக்கு மிகுந்த கோட்டையாகக் கருதப்படுகிறது. விஜய பிரபாகர் போட்டியிடும் விருதுநகர் தொகுதியில் ஏற்கனவே கடந்த நாடாளுமன்றத் தேர்தலில் அவர் கணிசமான வாக்குகளைப் பெற்றிருந்தது குறிப்பிடத்தக்கது.

திமுக கூட்டணியின் பலத்துடன், கேப்டனின் புகழை முன்வைத்துத் தேமுதிக இம்முறை மிகப்பெரிய வெற்றியைப் பெறும் எனப் பிரேமலதா நம்பிக்கை தெரிவித்துள்ளார். தமிழகத்தில் ஏப்ரல் 23-ஆம் தேதி ஒரே கட்டமாகத் தேர்தல் நடைபெறவுள்ளது.

இதையும் படிங்க: 200 தொகுதிகளுக்கு மேல் வெற்றி உறுதி! திமுக கூட்டணி குறித்து பிரேமலதா விஜயகாந்த் அதிரடி!