மீண்டும் ஒரத்தநாட்டை குறிவைக்கும் வைத்திலிங்கம்..!! விருப்பமனு தாக்கல்..!

அதிமுகவில் இருந்து விலகி திமுகவில் இணைந்த முன்னாள் அமைச்சரும், ஒரத்தநாடு சட்டமன்ற உறுப்பினருமான ஆர். வைத்திலிங்கம், ஒரத்தநாடு தொகுதியில் திமுக சார்பில் போட்டியிட விருப்ப மனு தாக்கல் செய்துள்ளார். இது தமிழக அரசியலில் குறிப்பிடத்தக்க மாற்றத்தை ஏற்படுத்தியுள்ளது. வைத்திலிங்கம் நீண்ட காலமாக அதிமுகவின் முக்கிய தலைவர்களில் ஒருவராக இருந்து வந்தவர். கடந்த 2001ஆம் ஆண்டு முதல் ஒரத்தநாடு தொகுதியில் அதிமுக சார்பில் போட்டியிட்டு பலமுறை வெற்றி பெற்றவர்.

முன்னாள் முதல்வர் ஜெயலலிதா ஆட்சியில் அமைச்சரவையில் இடம்பெற்று, தொழில்துறை, வனம் மற்றும் சுற்றுச்சூழல், வீட்டுவசதி போன்ற துறைகளை கவனித்தவர். சமீப காலங்களில் முன்னாள் முதல்வர் ஓ. பன்னீர்செல்வத்தின் தீவிர ஆதரவாளராகவும், அதிமுகவின் தொண்டர் உரிமை மீட்புக் குழுவில் இணை ஒருங்கிணைப்பாளராகவும் செயல்பட்டு வந்தார். 2026 சட்டமன்றத் தேர்தல் நெருங்கி வரும் நிலையில், ஓபிஎஸ் அணியின் கூட்டணி முடிவுகளில் ஏற்பட்ட குழப்பம் மற்றும் தாமதம் காரணமாக வைத்திலிங்கம் கடும் அதிருப்தியடைந்தார்.

அதிமுகவின் தற்போதைய தலைமையின் போக்கு தனக்கு பிடிக்கவில்லை என்றும், திராவிட கொள்கைகளை பாதுகாக்க வேண்டும் என்ற நோக்கத்தில் திமுகவை தாய் கழகமாகக் கருதி இணைந்ததாக அவர் தெரிவித்தார்.ஜனவரி 21 அன்று, வைத்திலிங்கம் முதலில் தனது ஒரத்தநாடு எம்எல்ஏ பதவியை ராஜினாமா செய்தார். சென்னை தலைமைச் செயலகத்தில் சபாநாயகர் அப்பாவுவிடம் ராஜினாமா கடிதத்தை அளித்த பின்னர், அண்ணா அறிவாலயத்திற்கு சென்று முதல்வரும் திமுக தலைவருமான மு.க.ஸ்டாலின் முன்னிலையில் திமுகவில் இணைந்தார்.

இதையும் படிங்க: மம்தா சேலையயை கடன் வாங்கிக் கட்டிக்கோங்க ஸ்டாலின்… நாஞ்சில் சம்பத் விளாசல்….!

திமுகவில் இணைந்த பிறகு, வைத்திலிங்கம் தனது ஆதரவாளர்களுடன் கட்சியை வலுப்படுத்தும் பணிகளில் ஈடுபட்டார். முதல்வர் ஸ்டாலின் அவருக்கு கட்சியில் முக்கிய பொறுப்பு வழங்குவதாக உறுதியளித்தார். இந்நிலையில், தற்போது 2026 சட்டமன்றத் தேர்தலுக்கான விருப்ப மனு தாக்கல் தொடங்கியுள்ள நிலையில், வைத்திலிங்கம் ஒரத்தநாடு தொகுதியில் திமுக சார்பில் போட்டியிட விருப்ப மனு அளித்துள்ளார். 

இதையும் படிங்க: புறவாசல் வழியா கூட்டணி பேசும் கட்சி காங்கிரஸ் இல்ல… வதந்திகளுக்கு செல்லப் பெருந்தகை பதிலடி..!!