தமிழ் திரையுலகையே அதிரவைக்கும் ஒரு செய்தியாக, நடிகர் விஜய்யின் நடிப்பில் உருவான 'ஜனநாயன்' திரைப்படம் முழுமையாக இணையத்தில் வெளியானதால் அதன் தயாரிப்பு நிறுவனமான கேவிஎன் (KVN) நிறுவனத்திற்குப் பல கோடி ரூபாய் நஷ்டம் ஏற்பட்டுள்ளதாகத் தகவல்கள் வெளியாகியுள்ளன. இந்த இழப்பை ஈடுகட்டும் வகையில், அதே நிறுவனத்திற்கு மற்றொரு புதிய படத்தில் விஜய் நடிக்கச் சம்மதம் தெரிவித்துள்ளதாகக் கோலிவுட் வட்டாரங்கள் தெரிவிக்கின்றன.

விஜய்யின் அரசியல் வருகைக்கு முன்னதாக மிகப்பிரம்மாண்டமாக உருவான திரைப்படம் ஜனநாயன்: படம் திரையரங்குகளில் வெளியாவதற்கு முன்பே, மர்ம நபர்களால் முழுத் திரைப்படமும் இணையதளங்களில் கசியவிடப்பட்டது. இதனால் படத்தின் வசூல் கடுமையாகப் பாதிக்கப்பட்டு, தயாரிப்பு நிறுவனமான கேவிஎன் புரொடக்ஷன்ஸ் பெரும் நிதி நெருக்கடியில் சிக்கியுள்ளது.

தனது படத்தை நம்பி முதலீடு செய்த தயாரிப்பாளர் நஷ்டமடைவதைத் தளபதி விஜய் விரும்புவதில்லை. கேவிஎன் நிறுவனத்தின் நஷ்டத்தைச் சரிசெய்யும் நோக்கில், அவர்களுக்கு மீண்டும் ஒரு கால்ஷீட் கொடுக்க விஜய் முடிவு செய்துள்ளார். இதன் மூலம் அந்த நிறுவனம் மீண்டும் லாபப் பாதைக்குத் திரும்பும் என எதிர்பார்க்கப்படுகிறது.

இதையும் படிங்க: பெண்கள் மீதான தாக்குதல் கண்டிக்கத்தக்கது! பொள்ளாச்சி ஸ்டிக்கர் விவகாரத்தில் தவெக தலைவர் விஜய் ஆவேசம்!

தற்போது தமிழக வெற்றிக் கழகத்தின் தலைவராக முழுநேர அரசியலில் ஈடுபட்டு வரும் விஜய், ஏற்கனவே தனது கடைசிப் படம் இதுதான் என அறிவித்திருந்தார். இருப்பினும், தார்மீக அடிப்படையில் தயாரிப்பாளரைக் காப்பாற்ற அவர் எடுத்துள்ள இந்த முடிவு ரசிகர்களிடையே பெரும் வரவேற்பைப் பெற்றுள்ளது. இந்தப் புதிய படம் குறித்த அதிகாரப்பூர்வ அறிவிப்பு விரைவில் வெளியாகும் எனத் தெரிகிறது.

மறுபுறம், 'ஜனநாயன்' படம் எப்படி இணையத்தில் கசிந்தது என்பது குறித்துச் சைபர் கிரைம் போலீசார் தீவிர விசாரணை நடத்தி வருகின்றனர். இதற்குக் காரணமானவர்கள் மீது கடுமையான நடவடிக்கை எடுக்கத் தயாரிப்பாளர் சங்கம் வலியுறுத்தியுள்ளது. தயாரிப்பாளர்களின் நலன் கருதி விஜய் எடுத்துள்ள இந்த அதிரடி முடிவு, திரையுலகில் அவரது கண்ணியத்தை மேலும் உயர்த்தியுள்ளது.

இதையும் படிங்க: ரசிகைகளுடன் செல்பி எடுத்த விஜய்! கன்னியாகுமரியில் இன்று பிரம்மாண்ட 'ரோடு ஷோ'!