தமிழகம் மற்றும் புதுச்சேரியில் 12-ஆம் வகுப்பு (பிளஸ் 2) பொதுத்தேர்வுகள் இன்று உற்சாகமாகத் தொடங்கின. முதல் நாளான இன்று தமிழ் உள்ளிட்ட மொழிப்பாடத் தேர்வுகள் நடைபெற்ற நிலையில், சுமார் 10,000 மாணவர்கள் தேர்வில் பங்கேற்கவில்லை என்ற அதிர்ச்சிகரமான தகவலை அரசுத் தேர்வுகள் இயக்ககம் வெளியிட்டுள்ளது.

தமிழ்நாடு மற்றும் புதுச்சேரியில் உள்ள 3,300-க்கும் மேற்பட்ட மையங்களில் இன்று காலை 10:00 மணிக்குத் தேர்வு தொடங்கியது. சுமார் 8,20,000-க்கும் மேற்பட்ட மாணவ, மாணவிகள் இன்றைய மொழிப்பாடத் தேர்வை எழுதினர்.

தேர்வுகள் கட்டுப்பாட்டு இயக்ககம் வெளியிட்டுள்ள அதிகாரப்பூர்வ அறிவிப்பின்படி, இன்று நடந்தத் தேர்வில் மொத்தம் 9,919 மாணவர்கள் தேர்வு எழுத வரவில்லை (Absent). கடந்த ஆண்டைக் காட்டிலும் இந்த எண்ணிக்கை சற்றுக் கூடுதலாக இருப்பதாகக் கருதப்படுகிறது.

இதையும் படிங்க: CBSE மாணவர்களே.. ரெடியா..!! நாளை தொடங்குகிறது 10, 12-ம் வகுப்பு பொதுத்தேர்வு..!!

10,000-க்கும் நெருக்கமான மாணவர்கள் முதல் நாளிலேயேத் தேர்வைப் புறக்கணித்தது ஏன் என்பது குறித்துப் பள்ளிக் கல்வித்துறை ஆய்வு செய்ய உள்ளது. நீண்டகால விடுப்பு, குடும்பச் சூழ்நிலை அல்லது போதியத் தயாரிப்பு இல்லாமை போன்ற காரணங்களால் இவர்கள் வராதிருக்கலாம் எனத் தெரிகிறது.

தேர்வு மையங்களில் முறைகேடுகளைத் தடுக்க 3,500-க்கும் மேற்பட்ட பறக்கும் படைகள் அமைக்கப்பட்டிருந்தன. செல்போன் உள்ளிட்ட மின்னணு சாதனங்களுக்குக் கடும் தடை விதிக்கப்பட்டிருந்தது.

இன்றையத் தமிழ் வினாத்தாள் மிகவும் எளிமையாக இருந்ததாகத் தேர்வு எழுதிவிட்டு வந்த மாணவர்கள் மகிழ்ச்சி தெரிவித்தனர். பெரும்பாலான கேள்விகள் நேரடியாகக் கேட்கப்பட்டிருந்ததால், அதிக மதிப்பெண்கள் பெற வாய்ப்புள்ளதாக ஆசிரியர்கள் கருத்து தெரிவித்துள்ளனர்.

பிளஸ் 2 பொதுத்தேர்வுகள் வரும் மார்ச் 24-ஆம் தேதி வரை நடைபெற உள்ளன. அடுத்ததாக மார்ச் 5-ஆம் தேதி ஆங்கிலப் பாடத் தேர்வு நடைபெற உள்ளது. மாணவர்கள் எஞ்சியுள்ள தேர்வுகளில் முழுமையாகப் பங்கேற்க வேண்டும் எனப் பள்ளிக் கல்வித்துறை அறிவுறுத்தியுள்ளது.

இதையும் படிங்க: சாத்தான்குளம் தந்தை - மகன் கொலை வழக்கு! மார்ச் 23-ம் தேதி இறுதி தீர்ப்பு!