தமிழக அரசு மருத்துவமனைகளில் தொகுப்பூதியம் மற்றும் ஒப்பந்த அடிப்படையில் பணியாற்றி வரும் 2,500 செவிலியர்களைப் பணி நிரந்தரம் செய்வதற்கான அதிகாரப்பூர்வ அரசாணை இன்னும் 2 அல்லது 3 வாரங்களுக்குள் வெளியிடப்படும் என்று மக்கள் நல்வாழ்வுத்துறை அமைச்சர் அருண்ராஜ் அறிவித்துள்ளார்; மேலும், கன்னியாகுமரி அரசு மருத்துவக் கல்லூரி மருத்துவமனையில் புற்றுநோயைக் கண்டறியும் அதிநவீன 'பெட் ஸ்கேன்' (PET Scan) கருவி விரைவில் பயன்பாட்டுக்குக் கொண்டுவரப்படும் என்றும் அவர் தெரிவித்துள்ளார்.  

 கன்னியாகுமரி மாவட்டத்தில் நடைபெற்று வரும் பல்வேறு அரசு மருத்துவமனை மேம்பாட்டுப் பணிகள் மற்றும் நலத்திட்டங்களை நேரில் பார்வையிட்டு ஆய்வு செய்த மக்கள் நல்வாழ்வுத்துறை அமைச்சர் அருண்ராஜ், பின்னர் செய்தியாளர்களைச் சந்தித்துப் பேசினார்.அப்போது அவர் தெரிவித்ததாவது:"தமிழ்நாடு முழுவதும் உள்ள அரசு ஆரம்ப சுகாதார நிலையங்கள், தாலுகா மருத்துவமனைகள் மற்றும் அரசு மருத்துவக் கல்லூரி மருத்துவமனைகளில் ஒப்பந்த மற்றும் தொகுப்பூதிய அடிப்படையில் பணியாற்றி வரும் செவிலியர்களின் நீண்ட நாள் கோரிக்கையை முதலமைச்சர் தலைமையிலான அரசு கனிவுடன் பரிசீலித்து வருகிறது. முதற்கட்டமாக 2,500 தற்காலிகச் செவிலியர்களைப் பணி நிரந்தரம் செய்வதற்கான இறுதிக்கட்ட நடவடிக்கைகள் தீவிரமாக நடைபெற்று வருகின்றன. 

இதற்கான அரசாணை இன்னும் 2 முதல் 3 வார காலத்திற்குள் முறைப்படி வெளியிடப்படும்.மேலும், கன்னியாகுமரி மாவட்ட மக்களின் நீண்ட நாள் மருத்துவத் தேவையைப் பூர்த்தி செய்யும் வகையில், ஆசாரிப்பள்ளம் அரசு மருத்துவக் கல்லூரி மருத்துவமனையில் புற்றுநோயை ஆரம்ப நிலையிலேயே துல்லியமாகக் கண்டறிய உதவும் 'பெட் ஸ்கேன்' (PET Scan) வசதி விரைவில் ஏற்படுத்தப்படும். இதற்காகத் தேவையான நிதி ஒதுக்கீடு மற்றும் உள்கட்டமைப்புப் பணிகள் துரிதப்படுத்தப்பட்டுள்ளன. 

இதையும் படிங்க: மதம் மாறியவர்களின் இடஒதுக்கீட்டை பறிப்பதா? சட்டத்திருத்தம் கோரும் மார்க்சிஸ்ட் கம்யூனிஸ்ட் கட்சி!

இதன் மூலம் தென் மாவட்டங்களைச் சேர்ந்த ஏழை, எளிய மக்கள் உயர் சிகிச்சைக்காகத் தொலைதூர நகரங்களுக்குச் செல்ல வேண்டிய சிரமம் தவிர்க்கப்படும்" என்று அமைச்சர் குறிப்பிட்டார்.நீண்ட காலமாகத் தங்களது வாழ்வாதாரப் பாதுகாப்பிற்காகப் போராடி வந்த ஒப்பந்தச் செவிலியர்களுக்குப் பணி நிரந்தர அரசாணை விரைவில் வரவுள்ள செய்தி, அரசு மருத்துவமனை ஊழியர்கள் மற்றும் செவிலியர்கள் சங்கங்கள் மத்தியில் பெரும் நிம்மதியையும் மகிழ்ச்சியையும் ஏற்படுத்தியுள்ளது.

இதையும் படிங்க: இஸ்லாம் தழுவியவர்களுக்கு இடஒதுக்கீடு மறுப்பா?உச்சநீதிமன்றத்தில் சீராய்வு மனு தாக்கல் செய்ய கனிமொழி எம்.பி வலியுறுத்தல்!