கோயம்பேடு மொத்த காய்கறி சந்தையில் தக்காளியின் வரத்து திடீரென அதிகரித்ததால், விலை கடுமையாக சரிந்துள்ளது. கடந்த சில நாட்களாக படிப்படியாக அதிகரித்து வந்த தக்காளி வரத்து இன்று 50-க்கும் மேற்பட்ட லாரிகளில் குவிந்ததால், மொத்த விற்பனையில் ஒரு கிலோ தக்காளி ரூ.6-க்கு விற்கப்பட்டது. இதனால் சில்லறை கடைகளிலும் விலை கணிசமாக குறைந்து, ஒரு கிலோ ரூ.15-க்கு விற்பனையாகியுள்ளது.

கடந்த சில மாதங்களாகவே தக்காளி விலை உயர்ந்து வந்த நிலையில், இது கடந்த மூன்று மாதங்களில் ஏற்பட்ட மிகப்பெரிய வீழ்ச்சியாகும். கடந்த வாரம் வரை சில்லறை கடைகளில் ஒரு கிலோ தக்காளி ரூ.40 வரை விற்கப்பட்டது குறிப்பிடத்தக்கது. இன்றைய விலை சரிவால் இல்லத்தரசிகள் மிகுந்த நிம்மதி அடைந்துள்ளனர்.

இதையும் படிங்க: தமிழகத்தின் இருண்ட காலம்! சில நாட்களில் முடிந்துவிடும்! திமுக ஆட்சிக்கு தேதி குறித்த அண்ணாமலை!

ஆந்திரா மற்றும் கர்நாடகா மாநிலங்களில் இருந்து தினசரி கோயம்பேடு சந்தைக்கு தக்காளி வரும் வழக்கம். கடந்த சில வாரங்களாக பரவலாக பெய்த மழை மற்றும் வெளிமாநில வியாபாரிகளின் அதிக கொள்முதல் காரணமாக, தக்காளி வரத்து கடுமையாக குறைந்தது. தினசரி 30 லாரிகளுக்கு மேல் வராத நிலையில், விலை உயர்ந்து ஒரு கிலோ ரூ.70 வரை சென்றது. இதனால் வெளிமார்க்கெட்டுகளில் உள்ள காய்கறி மற்றும் மளிகை கடைகளில் தக்காளி விலை பெரிதும் உயர்ந்திருந்தது.

இந்நிலையில், கடந்த சில நாட்களாக மழை குறைந்து, வெளிமாநிலங்களில் இருந்து தக்காளி கொள்முதல் குறைந்ததால், வரத்து படிப்படியாக அதிகரித்தது. இன்று காலை முதலே லாரிகள் தொடர்ந்து வந்து குவிந்தன. மொத்த விற்பனை முடிந்த நிலையில், தக்காளி விலை மிகக் குறைவாக இருப்பதால், வியாபாரிகளும் ஆச்சர்யத்தில் உள்ளனர்.

“கடந்த இரண்டு மாதங்களாக தக்காளி விலை உயர்ந்து வந்ததால், வீட்டு செலவு அதிகரித்திருந்தது. இன்று ரூ.15-க்கு கிடைப்பதால் மிகுந்த மகிழ்ச்சி” என்கிறார் சென்னை, அண்ணா நகரைச் சேர்ந்த இல்லத்தரசி ஒருவர். இதேபோல் பல இல்லத்தரசிகளும் இந்த விலை குறைவால் நிம்மதி அடைந்துள்ளனர். விவசாயிகள் மற்றும் வியாபாரிகள் தரப்பில், வரத்து அதிகரிப்பு தொடர்ந்தால் விலை மேலும் குறைய வாய்ப்புள்ளதாகக் கூறுகின்றனர்.

இருப்பினும், வரும் நாட்களில் வானிலை மாற்றம் ஏற்பட்டால் மீண்டும் விலை உயர வாய்ப்பு உள்ளதாகவும் தெரிவிக்கின்றனர். கோயம்பேடு சந்தை தமிழ்நாட்டின் மிகப்பெரிய காய்கறி மொத்த விற்பனை மையமாக இருப்பதால், இங்கு ஏற்படும் விலை மாற்றங்கள் மாநிலம் முழுவதும் பிரதிபலிக்கும். தற்போதைய விலை சரிவு பொதுமக்களுக்கு பெரும் நிவாரணமாக அமைந்துள்ளது.

இதையும் படிங்க: அதிமுகவில் இணையவே விருப்பம்..!! டிடிவி நினைத்தால் அது நடக்கும்..!! ஓபிஎஸ் ஓபன் டாக்..!!