தமிழக அரசியல் களத்தில் கடந்த சில நாட்களாக பெரும் சர்ச்சையை ஏற்படுத்திய விவகாரம், பாஜக மாநிலத் தலைவர் நயினார் நாகேந்திரன் நடிகை திரிஷா குறித்து பேசிய கருத்து. சேலத்தில் நடந்த நிகழ்ச்சியில் த.வெ.க தலைவர் விஜய் பேசியதற்கு பதிலடி கொடுக்கும் வகையில், நயினார் நாகேந்திரன் செய்தியாளர்களிடம் பேசியபோது, “விஜய் முதலில் வெளியில் வர வேண்டும். திரிஷாவிடம் இருந்து அவர் வெளியில் வந்தால் தான் எல்லாமே நடக்கும். 

குடும்பத்தோடு நல்ல உறவு இருக்க வேண்டும். நல்ல தலைவர்கள் வழிநடத்திய இயக்கம் என்று வெளியில் சொல்ல வேண்டும். களத்தில் ஒரு கவுன்சிலர் கூட இல்லாதவர், 32 சதவீதம் வாக்குகள் இருப்பதாக சொல்கிறார்கள். இது எப்படி முடியும்? நடிகர் என்பதால் இப்படி நடக்குமா?” என்று கூறினார்.

இதில் “திரிஷாவிடம் இருந்து வெளியில் வர வேண்டும்” என்ற கருத்து பெரும் சர்ச்சையை ஏற்படுத்தியது. பெண்களை இழிவுபடுத்தும் வகையில் பேசியதாகவும், தனிப்பட்ட வாழ்க்கையை தொடர்புபடுத்தியதாகவும் பல தரப்பிலிருந்து கண்டனங்கள் எழுந்தன. 

இதையும் படிங்க: தேமுதிகவுடன் கூட்டணியா? மார்ச் 1ல் மோடி வருவார்! அதுவரை பொறுங்க! நயினார் நாகேந்திரன் சூசகம்!

திமுக, அதிமுக, நாம் தமிழர் கட்சி உள்ளிட்ட பல கட்சி தலைவர்கள் கண்டனம் தெரிவித்தனர். குறிப்பாக திமுகவை சேர்ந்த பெண் தலைவர்கள் “எங்கள் கட்சியின் 2-ம் கட்ட தலைவர்கள் கூட இப்படி பேசமாட்டார்கள்” என்று கடுமையாக விமர்சித்தனர். நெட்டிசன்களும் சமூக வலைதளங்களில் நயினார் நாகேந்திரனுக்கு எதிராக கருத்து தெரிவித்து வந்தனர்.

இதனிடையே, பாமக நிறுவனர் டாக்டர் ராமதாஸ் “திரிஷா குறித்த தனது பேச்சுக்கு நயினார் நாகேந்திரன் வருத்தம் தெரிவிக்க வேண்டும்” என்று கூறினார். இந்நிலையில், நடிகை திரிஷா இன்று (பிப்ரவரி 16) அதிகாரப்பூர்வ அறிக்கை வெளியிட்டார்.

 “என்னைப் பற்றி பேசப்பட்ட கருத்துகள் மிகுந்த வருத்தத்தை அளித்தன. பெண்களை இழிவுபடுத்தும் வகையில் பேசுவது ஏற்கத்தக்கதல்ல. இது என் தனிப்பட்ட வாழ்க்கையை மட்டுமல்ல, பெண்களின் கண்ணியத்தையும் பாதித்துள்ளது” என்று அவர் தெரிவித்தார்.

பாஜகவின் அகில இந்திய மகளிர் அணி தலைவி வானதி சீனிவாசன் கட்சியின் சார்பாக வருத்தம் தெரிவித்தார். “நயினார் நாகேந்திரன் பேசியது தனிப்பட்ட கருத்து. கட்சியின் அதிகாரப்பூர்வ நிலைப்பாடல்ல. பெண்களின் கண்ணியத்தை மதிக்கும் கட்சி பாஜக” என்று அவர் கூறினார். 

இதைத் தொடர்ந்து, பாஜக முன்னாள் மாநிலத் தலைவர் கே.அண்ணாமலை இன்று மாலை ஊடகங்களுக்கு அளித்த பேட்டியில், “வானதி சீனிவாசன் அவர்கள் கட்சியின் சார்பாக வருத்தம் தெரிவித்துள்ளார். இந்த பிரச்னை இதோடு முடிந்ததாக நான் கருதுகிறேன். எதிர்காலத்தில் இத்தகைய சர்ச்சைகள் எழாமல் பார்த்துக் கொள்ள வேண்டும்” என்று தெரிவித்தார்.

இந்த சம்பவம் தமிழக அரசியலில் பெண்களின் கண்ணியம் குறித்த விவாதத்தை மீண்டும் எழுப்பியது. நடிகை திரிஷாவின் அறிக்கை, வானதி சீனிவாசனின் வருத்தம், அண்ணாமலையின் முடிவு ஆகியவை இணைந்து இந்த விவகாரத்துக்கு தற்காலிக முடிவு கிடைத்துள்ளது. இருப்பினும், சமூக வலைதளங்களில் விவாதங்கள் தொடர்ந்து வருகின்றன.

இதையும் படிங்க: ஓட்டுக்காக தேசத்தை கூறுபோட முயலுகிறது திமுக! ராஜகண்ணப்பன் சர்ச்சை பேச்சு! வெளுத்து வாங்கும் நைனார்!